କରୋନା ଭାଇରସ ଆକ୍ରମଣ ବିରୋଧରେ ଏବେ ଭ୍ୟାକ୍ସିନ ବଡ଼ ଭରସା । କିନ୍ତୁ ଭ୍ୟାକ୍ସିନର ପାର୍ଶ୍ୱପ୍ରତିକ୍ରିୟାର ଖବର ମଧ୍ୟ ଆସିବାରେ ଲାଗିଲାଣି । ଭ୍ୟାକ୍ସିନେଶନକୁ ନେଇ ହୋଇଥିବା ଏକ ଅଧ୍ୟୟନରେ ଦାବି କରାଯାଇଛି ଯେ, ଏହା ଦ୍ୱାରା ମହିଳାଙ୍କ ପିରୟଡ୍ ବାଧିତ ହୋଇଛି । ବ୍ରିଟେନରେ ହୋଇଥିବା ଏହି ଅଧ୍ୟୟନରେ ପ୍ରାୟ ୩୫ ହଜାର ମହିଳା ଯୋଗ ଦେଇଥିଲେ । ଏହି ସବୁ ମହିଳାଙ୍କ ଦାବି ଯେ, ଟିକା ନେବା ପରେ ସେମାନଙ୍କ ପିରିୟଡ୍ ପ୍ରଭାବିତ ହୋଇଛି । ଅନେକ ମହିଳାଙ୍କ ଦାବି ଯେ, ଟିକା କାରଣରୁ ସେମାନଙ୍କୁ ଅନିୟନ୍ତ୍ରିତ ଓ ଯନ୍ତ୍ରଣାଦାୟକ ପିରିୟଡର ସମ୍ମୁଖୀନ ହେବାକୁ ପଡୁଛି । ଯେଉଁ ମହିଳା ଏଭଳି ଦାବି କରୁଛନ୍ତି ସେମାନଙ୍କ ମଧ୍ୟରୁ ଅଧିକାଂଶ ଫାଇଜର ଓ ମଡର୍ଣ୍ଣାର ଟିକା ନେଇଛନ୍ତି ।
ଟିକାକରଣର ପିରିୟଡ୍ ସହିତ କୌଣସି ସମ୍ପର୍କ ନାହିଁ
ତେବେ ଇମ୍ପେରିୟାଲ କଲେଜ ଲଣ୍ଡନର ରିପ୍ରଡକ୍ଟିଭ ଇମ୍ୟୁନୋଲୋଜିର ପ୍ରାଧ୍ୟାପକ ଡକ୍ଟର ଭିକ୍ଟୋରିଆ ମାଲେଙ୍କ ଡାଟା ଅନୁସାରେ ଟିକା କାରଣରୁ ବର୍ତ୍ତମାନ ପର୍ଯ୍ୟନ୍ତ କାହାରିଠାରେ ପ୍ରଜନନ ସମ୍ବନ୍ଧିତ ସମସ୍ୟା ଦେଖିବାକୁ ମିଳିନାହିଁ । ଏହି ଦାବିର ସତ୍ୟାସତ୍ୟ ଜାଣିବା ପାଇଁ ଅଧିକ ଅଧ୍ୟୟନର ଆବଶ୍ୟକତା ରହିଛି ବୋଲି ସେ କହିଛନ୍ତି । ୟୁକେର ଡ୍ରଗ୍ ୱାଚଡଗ୍ ଦ ମେଡିସିନ୍ସ ଆଣ୍ଡ୍ ହେଲ୍ଥ କେୟାର ପ୍ରଡକ୍ଟସ ରେଗୁଲେଟାରି ଏଜେନ୍ସି(MHRA) ମଧ୍ୟ ଏପର୍ଯ୍ୟନ୍ତ କୋଭିଡ୍ ଭ୍ୟାକ୍ସିନ୍ ଓ ମାସିକ ଧର୍ମ ମଧ୍ୟରେ କୌଣସି ସମ୍ପର୍କକୁ ସ୍ୱୀକାର କରିନାହିଁ ।
ଏହି କାରଣରୁ ପ୍ରଭାବିତ ହୋଇପାରେ ପିରିୟଡ୍ସ
MHRA ଅନୁସାରେ ସେମାନଙ୍କ ଅଧ୍ୟୟନରୁ କୋଭିଡ୍ ଟିକା ଓ ପିରିୟଡ ମଧ୍ୟରେ କୌଣସି ସମ୍ପର୍କ ଥିବା ଜଣା ପଡିନାହିଁ । ଡ.ମାଲେଙ୍କ ଅନୁସାରେ ଟିକା ଡୋଜ୍ ଶରିରର ପ୍ରତିରକ୍ଷା ପ୍ରତିକ୍ରିୟା ମାସିକ ଧର୍ମ ଚକ୍ରରେ ପରିବର୍ତ୍ତନକୁ ଟ୍ରିଗାର କରିପାରେ । ପୁରୁଣା ଅଧ୍ୟୟନର ଉଦାହରଣ ଦେଇ ସେ କହିଛନ୍ତି ଯେ, ଏଚପିଭି ଟିକାକରଣର ଆରମ୍ଭ କାଳରେ ମହିଳାଙ୍କ ଋତୁଚକ୍ର କିଛି ସମୟ ପାଇଁ ପ୍ରଭାବିତ ହୋଇଥିଲା ।
ବିଶେଷଜ୍ଞ ଅଧ୍ୟୟନକୁ ମାନିବାକୁ ପ୍ରସ୍ତୁତ ନୁହନ୍ତି
କିନ୍ତୁ ଅନ୍ୟ ବିଶେଷଜ୍ଞ ମଧ୍ୟ ଡ. ମାଲେଙ୍କ ସିଦ୍ଧାନ୍ତକୁ ଖାରଜ କରିଦେଇଛନ୍ତି । ସେମାନଙ୍କ କହିବା ହେଉଛି ଟିକା ନେବା ପରେ ସମସ୍ୟା ସାମାନ୍ୟ । ଅଧିକ ମହିଳାଙ୍କ କ୍ଷେତ୍ରରେ ଏଭଳି ସମସ୍ୟା ଦେଖିବାକୁ ମିଳୁନାହିଁ ।
ଏପର୍ଯ୍ୟନ୍ତ ୩୦ ହଜାରରୁ ଅଧିକ ମାମଲା
ଡ.ମାଲେଙ୍କ ଅନୁସାରେ ପ୍ରାଇମେରି କେୟାର ଚିକିତ୍ସକ ଓ ରିପ୍ରଡକ୍ଟିଭ ହେଲ୍ଥ ସେକ୍ଟରରେ କାମ କରୁଥିବା ଲୋକ ସେହି ମହିଳାଙ୍କ ସହିତ ସମ୍ପର୍କରେ ଅଛନ୍ତି ଯେଉଁମାନେ ଟିକାକରଣ ପରେ ଏଭଳି ଅନୁଭବ କରିଥିଲେ । ୩୦ ହଜାର ମହିଳା ଟିକା ନେବା ପରେ ଋତୁସ୍ରାବ ଜନିତ ସମସ୍ୟାର ସମ୍ମୁଖୀନ ହୋଇଥିବା ଦାବି କରିଛନ୍ତି । ତେବେ ସେମାନେ କହିଛନ୍ତି ଯେ, ଗୋଟିଏ ପିରିୟଡ ସାଇକଲ ପରେ ପରବର୍ତ୍ତି ପିରିୟଡ ସାମାନ୍ୟ ଥିଲା ।
