ମୁମ୍ବାଇ: ଶାହାରୁଖ ଖାନଙ୍କ ପତ୍ନୀ ଗୌରୀ ଖାନ । ବର୍ତ୍ତମାନ ତାଙ୍କ ପାଇଁ ସମସ୍ୟା ବଢିପାରେ । ଗୌରୀ ଖାନ୍ଙ୍କୁ ନୋଟିସ ପଠାଇଛି ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) । ଲକ୍ଷ୍ନୌସ୍ଥିତ ରିଅଲ ଇଷ୍ଟେଟ କମ୍ପାନୀ ତୁଲସିୟାନୀ ଗ୍ରୁପ୍ ମାମଲାରେ ତାଙ୍କୁ ଏହି ନୋଟିସ୍ ମିଳିଛି । ସେ ଏହାର ବ୍ରାଣ୍ଡ ଆମ୍ବାସଡର ଅଟନ୍ତି । ଏବେ କମ୍ପାନୀ ବ୍ୟାଙ୍କର ୩୦ କୋଟି ଟଙ୍କା ହଡ଼ପ କରିଥିବା ଅଭିଯୋଗ ହୋଇଛି । ଏଣୁ ଇଡି ଗୌରୀଙ୍କୁ ପଚରାଉଚରା କରିପାରେ ବୋଲି କୁହାଯାଉଛି । ଗୌରୀଙ୍କୁ ନୋଟିସ ମିଳିଥିବା ବେଳେ ସେ ଏଯାଏ ଏହା ଉପରେ ଉତ୍ତର ରଖିନାହାନ୍ତି । ହେଲେ ତାଙ୍କୁ ଆମ୍ବାସଡର ଭାବେ କମ୍ପାନୀ କେତେ ଟଙ୍କା ଦେଇଥିଲା ତାର ଯାଞ୍ଚ କରାଯିବ । ତାଙ୍କୁ କିଭଳି ଉକ୍ତ ଟଙ୍କା ମିଳିଥିଲା ତାହା ମଧ୍ୟ ତଦନ୍ତ ପରିସରଭୁକ୍ତ ରହିବ । ଏପରିକି ଉଭୟଙ୍କ ମଧ୍ୟରେ ହୋଇଥିବା ଚୁକ୍ତିନାମାର କାଗଜପତ୍ର ଯାଞ୍ଚ କରାଯାଇପାରେ ବୋଲି ରିପୋର୍ଟରେ କୁହାଯାଇଛି ।
ଗୌରୀଙ୍କୁ ପଚରାଉଚରା କରିବ ଇଡି
ଗୌରୀ ଖାନଙ୍କୁ ନୋଟିସ ଦେବା ପାଇଁ ଏନଫୋର୍ସମେଣ୍ଟ ଡାଇରେକ୍ଟୋରେଟ ମୁଖ୍ୟାଳୟରୁ ଅନୁମତି ନେବାକୁ ପ୍ରସ୍ତୁତି ଚାଲିଛି । ଅନୁମତି ପାଇବା ପରେ ଇଡି ଗୌରୀ ଖାନଙ୍କୁ ପଚରାଉଚରା କରିବ । ମୁମ୍ବାଇ ବାସିନ୍ଦା କିରିଟ ଜସୱନ୍ତ ଶାହା ୨୦୧୫ ରେ ଏହି ପ୍ରକଳ୍ପରେ ୮୫ ଲକ୍ଷ ଟଙ୍କାରେ ଫ୍ଲାଟ କିଣିଥିଲେ, କିନ୍ତୁ କମ୍ପାନୀ ତାଙ୍କୁ ଏହି ସମ୍ପତ୍ତି ଦେଇନାହିଁ କିମ୍ବା ରାଶି ଫେରସ୍ତ କରିନାହିଁ । ଏହି କାରଣରୁ ଜସୱନ୍ତ ଶାହା ନିକଟରେ ତୁଲସିଆନି ଗ୍ରୁପ୍ ନିର୍ଦ୍ଦେଶକ ଅନିଲ କୁମାର ତୁଲସିଆନି, ମହେଶ ତୁଲସିଆନି ଏବଂ ଗୌରୀ ଖାନଙ୍କ ବିରୋଧରେ ମାମଲା ଦାୟର କରିଥିଲେ । ଏହି ମାମଲାରେ କିରିଟ ଜସୱନ୍ତ ଶାହା ଗୌରୀ ଖାନଙ୍କୁ ଅଭିଯୋଗ କରି କହିଛନ୍ତି ଯେ ଏହି ପ୍ରକଳ୍ପ ଗୌରୀଙ୍କ ଦ୍ୱାରା ପ୍ରୋତ୍ସାହିତ ହୋଇଛି । ବର୍ତ୍ତମାନ ଅନୁମତି ପାଇବା ପରେ ଇଡି ଗୌରୀ ଖାନଙ୍କୁ ପଚରାଉଚରା କରିପାରିବ । କିନ୍ତୁ ଅନ୍ୟ ପଟରେ ଏହା ଏକ ମିଛ ଖବର ବୋଲି ସୂଚନା ମିଳିଛି । ଗୌରୀଙ୍କ ଉପରେ ସେଭଳି କିଛି ଆକ୍ସନ ନିଆଯାଇ ନ ଥିବା କହିଛି ଇଡି ।
