କଲମ୍ବିଆ: ନିଜ ଜନ୍ମ ସହରରେ ନିଜର ପ୍ରତିମୂର୍ତ୍ତି । ତାହାପୁଣି ବିଶାଳକାୟ ପ୍ରତିମୂର୍ତ୍ତି । ଏପରି ପ୍ରତିମୂର୍ତ୍ତି ଶୋଭା ପାଇବା କିଛି କମ୍ କଥା ନୁହେଁ । ଏ ପରିପ୍ରେକ୍ଷୀରେ ଗତ ମଙ୍ଗଳବାର ପ୍ରଖ୍ୟାତ କଲମ୍ବୀୟ ପପ୍ ଗାୟିକା ସାକିରାଙ୍କର ଏକ ବିଶାଳ ପ୍ରତିମୂର୍ତ୍ତି ତାଙ୍କ ଜନ୍ମ ସହର ବାରାଙ୍କ୍ୱିଲ୍ଲାରେ ସ୍ଥାପିତ ହୋଇଛି । ଏହାକୁ ନେଇ ଏବେ ଚର୍ଚ୍ଚା ଜୋର ଧରିଛି । ଦୀର୍ଘ ସାଢ଼େ ୬ ମିଟର ଉଚ୍ଚର ବ୍ରୋଞ୍ଜରେ ନିର୍ମିତ ହୋଇଛି ସାକିରାଙ୍କର ଏହି ପ୍ରତିମୂର୍ତ୍ତି । ତାଙ୍କର ଲୋକପ୍ରିୟ ଗୀତ ‘ହିପ୍ସ ଡୋଣ୍ଟ୍ ଲାଏ’ର ଏକ ନୃତ୍ୟମୁଦ୍ରାକୁ ଦର୍ଶାଉଛି । ଉକ୍ତ ପ୍ରତିମୂର୍ତ୍ତି ଲୋକାର୍ପଣ ଉତ୍ସବରେ ତାଙ୍କ ପିତା ୱ୍ୱିଲିଅମ୍ ମେବାରକ ଓ ମାଆ ନିଦିଆ ରିପୋଲିଙ୍କ ସହିତ ବାରାଙ୍କ୍ୱିଲ୍ଲାର ମେୟର ମଧ୍ୟ ଉପସ୍ଥିତ ଥିଲେ । ପ୍ରତିମୂର୍ତ୍ତିଟିର ପାଦ ତଳେ ଏକ ଫଳକ ଲଗାଯାଇଛି, ଯେଉଁଥିରେ ସାକିରାଙ୍କୁ ଖୁବ୍ ପ୍ରଶଂସା କରାଯାଇଛି । ଏଥିରେ ଉଲ୍ଲେଖ ରହିଛି ଯେ, ‘ମିଛ କହୁ ନ ଥିବା , ଏକ ଅନନ୍ୟ ପ୍ରତିଭା, ଜନମାନସକୁ ଗତିଶୀଳ କରୁଥିବା ସ୍ୱର’ ।
ସୋସିଆଲ ମିଡ଼ିଆରେ ନିଜେ ସେୟାର କଲେ ଫଟୋ
ଏହା ମଧ୍ୟ ପ୍ରାରମ୍ଭିକ ଶିଶୁବିକାଶକୁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ତାଙ୍କ ଦ୍ୱାରା ସ୍ଥାପିତ ସାମାଜିକ ସଂଗଠନ ‘ପାଇସ୍ ଡେସ୍କାଲୋଜୋସ’(ଖାଲି ପାଦ)ର ଦାନକାର୍ଯ୍ୟକୁ ସୂଚୀତ କରୁଛି । ଏଥିରେ ଉତ୍ସାହିତ ହୋଇ ସାକିରା ଏକ ଫଟୋ ସୋସିଆଲ ମିଡ଼ିଆରେ ସେୟାର କରିଛନ୍ତି । ଯେଉଁଥିରେ ତାଙ୍କ ପିତାମାତା ତାଙ୍କର ଏହି ପ୍ରତିମୂର୍ତ୍ତି ପାଖରେ ଛିଡ଼ା ହୋଇଥିବା ଦେଖାଯାଇଛି । ଏହି ଅବସରରେ ସେ ପ୍ରତିମୂର୍ତ୍ତି ଗଢ଼ିଥିବା ଭାସ୍କର୍ଯ୍ୟ ଶିଳ୍ପୀ ୟିନୋ ମାକ୍ୱେର୍ଜ୍ ଓ ତାଙ୍କ ଛାତ୍ରମାନଙ୍କୁ ସାଧୁବାଦ ଜଣାଇ ତାହା ଏକ ‘ବିଶାଳ କଳାତ୍ମକ ପ୍ରତିଭା’ ବୋଲି ଦର୍ଶାଇଛନ୍ତି ।
୨୦୦୩ ଥିଲା ସାକିରାଙ୍କ ପାଇଁ ସଫଳତାର ବର୍ଷ
ସାକିରାଙ୍କର ଏହି ପ୍ରତିମୂର୍ତ୍ତି ଉନ୍ମୋଚନ ପୂର୍ବରୁ ସେ ଏକାଧିକ ବାର ଚର୍ଚ୍ଚାରେ ରହିଥିଲେ । ସେଥି ମଧ୍ୟରୁ ପ୍ରମୁଖ ଖବରଟି ହେଉଛି ତାଙ୍କର ପୂର୍ବତନ ପୁରୁଷବନ୍ଧୁ ତଥା ପ୍ରାକ୍ତନ ଫୁଟବଲ ଖେଳାଳି ଜେରାର୍ଡ ପିକ୍ୟୁଙ୍କ ସମ୍ପର୍କିତ ସାକିରାଙ୍କର ଏକ ଗୀତର ଶୁଭମୁକ୍ତି ଯାହା ଲାଟିନ୍ ଆମେରିକା ୟୁଟ୍ୟୁବ୍ରେ ନୂତନ ରେକର୍ଡ ସୃଷ୍ଟି କରିଥିଲା । ସେହିପରି ଆୟକର ହେରଫେର ଅଭିଯୋଗ ପରେ ୭୫ ଲକ୍ଷ ୟୁରୋ ଦାଖଲ କରି ତାହାର ସମାଧାନ କରିବା ଘଟଣା ମଧ୍ୟ ସାକିରାଙ୍କୁ ଚର୍ଚ୍ଚାରେ ରଖିଥିଲା । ତେବେ ୨୦୦୩ ସାକିରାଙ୍କ ପାଇଁ ସଫଳତାର ବର୍ଷ ଥିଲା । ଯହିଁରେ ସେ ତିନିଟି ଲାଟିନ୍ ଗ୍ରାମି ପୁରସ୍କାର ହାସଲ କରିଥିଲେ, ଯେଉଁଥିରୁ ଗୋଟିଏ ତାଙ୍କ ସାଥୀ କଳାକାର କରୋଲ ଜି’ଙ୍କ ସହ ରହିଥିଲା ।
