ନୂଆଦିଲ୍ଲୀ: ସାଧାରଣତଃ ଭାରତରେ ଆପଣଙ୍କୁ ୧୦ଟଙ୍କାରେ ଗୋଟେ ସିଙ୍ଗଡା ମିଳିଯିବ । ଯଦି ଆପଣ କୌଣସି ବଡ ବଡ ରେଷ୍ଟୁରାଣ୍ଟକୁ ଯାଉଛନ୍ତି ତେବେ ସେଠି ଆପଣଙ୍କୁ ଅତି ବେଶୀରେ ଗୋଟେ ସିଙ୍ଗଡା ପାଇଁ ୨୦ଟଙ୍କା ଦେବାକୁ ପଡିବ । କିନ୍ତୁ ପାକିସ୍ତାନରେ ଗୋଟେ ସିଙ୍ଗଡାର ଦର ଶୁଣି ଆପଣଙ୍କର ହୋସ୍ ଉଡିଯିବ । ଯାହା ଏବେ ସୋସିଆଲ ମିଡ଼ିଆରେ ଖୁବ୍ ଭାଇରାଲ ହେବାରେ ଲାଗିଛି ।
ଗୋଟେ ସିଙ୍ଗଡ଼ାର ମୂଲ୍ୟ ୪୦ ଟଙ୍କା
ଜଟିଳ ପରିସ୍ଥିତି ଦେଇ ଗତି କରୁଛି ପାକିସ୍ତାନ । ଜମ୍ମୁ-କଶ୍ମୀରକୁ ନେଇ ଭାରତ ସହିତ ଶତ୍ରୁତା ବୃଦ୍ଧି ପାକିସ୍ତାନ ଅର୍ଥନୀତିର ମେରୁଦଣ୍ଡକୁ ଦୋହଲାଇ ଦେଇଛି । ପନିପରିବାଠାରୁ ଆରମ୍ଭ କରି ସାଧାରଣ ନିତ୍ୟବ୍ୟବହାର୍ଯ୍ୟ ସାମଗ୍ରୀର ଦର ବର୍ତ୍ତମାନ ଆକାଶଛୁଆଁ ହୋଇଛି । ଯାହା ପାକିସ୍ତାନର ସରକାରଙ୍କ ମୁଣ୍ଡବିନ୍ଧାର କାରଣ ପାଲଟିଛି । ପରିସ୍ଥିତି ଏପରି ଯେ ଗୋଟେ ସିଙ୍ଗଡାର ଦାମ ୪୦ ଟଙ୍କା । କାଲର ରକ୍ ନାମକ ଜଣେ ନ୍ୟୁଜିଲାଣ୍ଡର ୟୁଟ୍ୟୁବର ପାକିସ୍ତାନର ଫୈସଲାବାଦ ବୁଲିବାକୁ ଯାଇଥିଲେ । ଫୈସଲାବାଦର ଘଣ୍ଟା ଚୌକରେ ଥିବା ଗୋଟେ ସାଧାରଣ ଦୋକାନରେ ସେ ସିଙ୍ଗଡା ଖାଇଥିଲେ । ସେଠାରେ ସେ ୨ଟି ସିଙ୍ଗଡା ପାଇଁ ୮୦ଟଙ୍କା (ପାକିସ୍ତାନୀ ଟଙ୍କା ହିସାବରେ) ଦେଇଥିଲେ । ଅନ୍ୟପଟେ ପାକିସ୍ତାନର ଅନଲାଇନ ଗ୍ରୋସରୀ ଡେଲିଭରୀ ପ୍ଲାଟଫର୍ମକୁ ଚେକ୍ କରିବା ପରେ ଜଣାପଡିଥିଲା ଯେ, ସେଥିରେ ୩୨ଟି କଞ୍ଚା ଆଳୁ ଦିଆ ସିଙ୍ଗଡାର ଦାମ୍ ୬୫୦ ପାକିସ୍ତାନୀ ଟଙ୍କା ଥିଲା । ସେହିପରି ସମାନ ପ୍ୟାକେଟ୍ ଚିକେନ୍ ସିଙ୍ଗଡାର ମୂଲ୍ୟ ୮୦୦ ପାକିସ୍ତାନୀ ଟଙ୍କା ଥିଲା । ଏହି ମାମଲା ଏପରି ଜଟିଳ ହୋଇଗଲା ଯେ, ଏହା ସିଧାସଳଖ ପାକିସ୍ତାନ କୋର୍ଟରେ ପହଞ୍ଚିଲା ।
୬ ଟଙ୍କାରୁ ଅଧିକ ମୂଲ୍ୟରେ ବିକ୍ରି କଲେ ଦେବାକୁ ପଡ଼େ ଜରିମାନା
୨୦୦୯ ମସିହାରେ ପାକିସ୍ତାନର ଏକ ପ୍ରାଦେଶିକ କୋର୍ଟ ସିଙ୍ଗଡାର ମୂଲ୍ୟ ୬ ଟଙ୍କା ସ୍ଥିର କରିଥିଲେ । ଏହାର ଅର୍ଥ ଯଦି ଜଣେ ଦୋକାନୀ ଗୋଟେ ସିଙ୍ଗଡାକୁ ୬ ଟଙ୍କାରୁ ଅଧିକ ମୂଲ୍ୟରେ ବିକ୍ରି କରନ୍ତି ତେବେ ତାଙ୍କୁ ଜରିମାନା ଦେବାକୁ ପଡିବ । ଏହି ଜରିମାନା ନିଷ୍ପତ୍ତି ବିରୋଧରେ ପଞ୍ଜାବ ବେକର୍ସ ଏବଂ ମିଠା ଫେଡେରେସନ୍ ଦୀର୍ଘ ସମୟ ଧରି କୋର୍ଟରେ ଲଢିଥିଲେ । କିନ୍ତୁ କୌଣସି ସୁଫଳ ନ ମିଳିବାରୁ ସେ ଶେଷରେ ହାଇକୋର୍ଟର ଦ୍ୱାରସ୍ତ ହୋଇଥିଲେ । ପରେ ଲାହୋର ହାଇକୋର୍ଟ ଏହି ମାମଲାକୁ ପ୍ରତ୍ୟାଖ୍ୟାନ କରିଥିଲେ । ଶେଷରେ ସୁପ୍ରିମ କୋର୍ଟରେ ପହଞ୍ଚିଥିଲା ଏହି ମାମଲା । ଏହି ମାମଲାକୁ ନେଇ ସୁପ୍ରିମକୋର୍ଟ ୨୦୧୭ରେ ତାଙ୍କର ରାୟ ଦେଇଥିଲେ । ପାକିସ୍ତାନୀ ସୁପ୍ରିମ କୋର୍ଟଙ୍କ ରାୟ ପଞ୍ଜାବ ବେକର୍ସ ଏବଂ ମିଠା ଫେଡେରେଶନର ସପକ୍ଷରେ ଆସିଥିଲା । ବର୍ତ୍ତମାନ କିନ୍ତୁ ପାକିସ୍ତାନର ଅର୍ଥନୀତି ଜଟିଳ ପରିସ୍ଥିତି ଦେଇ ଗତି କରୁଥିବାରୁ ଏବେ ସିଙ୍ଗଡାର ମୂଲ୍ୟ ଢେର୍ ଗୁଣା ବୃଦ୍ଧି ପାଇଛି ।
