ମୁମ୍ବାଇ: ଦ୍ୱିତୀୟ ଥର ପାଇଁ ମାଆ ହେବାକୁ ଯାଉଛନ୍ତି ବଲିଉଡ ଅଭିନେତ୍ରୀ ଅନୁଷ୍କା ଶର୍ମା । ଦ୍ୱିତୀୟ ଥର ଗର୍ଭବତୀ ଥିବା ଖବରକୁ ନେଇ ସେ କିଛି ଦିନ ହେଲା ଚର୍ଚ୍ଚାରେ ଅଛନ୍ତି । ଅନୁଷ୍କାଙ୍କ ଗର୍ଭବତୀ ଥିବା ଖବର ଭାଇରାଲ ହେବାରେ ଲାଗିଥିଲେ ବି ଅଭିନେତ୍ରୀ ବର୍ତ୍ତମାନ ପର୍ଯ୍ୟନ୍ତ ଏହା ଉପରେ କୌଣସି ପ୍ରତିକ୍ରିୟା ଦେଇ ନ ଥିଲେ । ହେଲେ ଇନଷ୍ଟାରେ ଏବେ ସେ ଯେଉଁ ଫଟୋ ସେୟାର କରିଛନ୍ତି, ସେଥିରେ ତାଙ୍କ ‘ବେବି ବମ୍ପ’ ଥିବା ଦେଖିବାକୁ ମିଳିଛି । ଏହି ଫଟୋ ଏବେ ଖୁବ୍ ଭାଇରାଲ ହେବାରେ ଲାଗିଛି । ଏହି ଫଟୋକୁ ଦେଖିବା ପରେ ଅନୁଷ୍କା ଗର୍ଭବତୀ ଥିବା ନେଇ ପ୍ରଶଂସକମାନେ ସ୍ପଷ୍ଟ ହୋଇଯାଇଛନ୍ତି । ଅନେକ ତାଙ୍କୁ ଶୁଭେଚ୍ଛା ଓ ଶୁଭକାମନା ଜଣାଇଛନ୍ତି ।
ଫଟୋ ସେୟାର କରି ଗର୍ଭବତୀ ଥିବା ନେଇ ଦେଲେ ସଙ୍କେତ
ନିକଟରେ ଅନୁଷ୍କା ୱାନ ପ୍ଲସ ଫୋନର ବିଜ୍ଞାପନ କରୁଥିଲେ । ଏହି ସମୟର ୨ଟି ଫଟୋ ସେ ସୋସିଆଲ ମିଡ଼ିଆରେ ସେୟାର କରିଛନ୍ତି । ୨ଟି ଫଟୋରେ ସେ ୱାନ ପ୍ଲସର ୨ଟି ଫୋନ ଧରିଛନ୍ତି । ଗୋଟିଏ ଫଟୋରେ ସେ ୱାନ ପ୍ଲସର ପୁରୁଣା ଫୋନ ଧରିଥିବା ବେଳେ ଅନ୍ୟ ଏକ ଫଟୋରେ ସେ ୱାନ ପ୍ଲସର ନୂଆ ଲଞ୍ଚ ହୋଇଥିବା ଫୋନ ଧରିଛନ୍ତି । ତେବେ ୱାନ ପ୍ଲସର ପୁରୁଣା ଫୋନ ଧରିଥିବାର ସେ ଯେଉଁ ଫଟୋ ସେୟାର କରିଛନ୍ତି, ସେଥିରେ ଅନୁଷ୍କାଙ୍କ ‘ବେବି ବମ୍ପ’ ଥିବା ଦେଖିବାକୁ ମିଳିଛି । ହେଲେ ‘ବେବି ବମ୍ପ’ଟି ଏବେର ନୁହେଁ ବରଂ ପ୍ରଥମ ଗର୍ଭବସ୍ଥାର ବୋଲି ଜଣାପଡ଼ିଛି । ଦ୍ୱିତୀୟ ଥର ଗର୍ଭବତୀ ଥିବା ନେଇ ଅନୁଷ୍କା ସ୍ପଷ୍ଟୀକରଣ ରଖିନଥିବା ବେଳେ ଫୋନର ବିଜ୍ଞାପନ ପାଇଁ ‘ବେବି ବମ୍ପ’ର ଫଟୋ ବାଛି ସେ ନିଜ ପ୍ରଶଂସକଙ୍କ ଉତ୍ସାହ ବଢ଼ାଇଛନ୍ତି । ପୁରୁଣା ଫଟୋ ସେୟାର କରି ଅନୁଷ୍କା ଦ୍ୱିତୀୟ ଥର ଗର୍ଭବତୀ ଥିବା ନେଇ ସଙ୍କେତ ଦେଇଥିବା ଲୋକେ ଚର୍ଚ୍ଚା କରିବା ଆରମ୍ଭ କରିଛନ୍ତି ।
