ପ୍ରଧାନମନ୍ତ୍ରୀ ମୋଦି ଏମିତି ଖାଲି ପୁଟିନଙ୍କୁ କହିନଥିଲେ ଏହି କଥା, କାରଣ ଥିଲା ନାଟୋ

ନାଟୋ ଦେଶଙ୍କ ଶିଖର ସମ୍ମିଳନୀର ଠିକ୍ ପରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଋଷ ରାଷ୍ଚ୍ରପତି ଭ୍ଲାଦିମିର ପୁଟିନଙ୍କ ସହିତ ଫୋନରେ କଥା ହୋଇଛନ୍ତି । ଏହି ବୈଠକରେ ନାଟୋ ଘୋଷଣ କରିଥିଲା ଯେ, ଋଷ ସେମାନଙ୍କ ସାମରିକ ମେଣ୍ଟ ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ ଓ ପ୍ରତ୍ଯକ୍ଷ ବିପଦ । ବିଶେଷଜ୍ଞଙ୍କ କହିବା ହେଉଛି ଯେ, ପ୍ରଧାନମନ୍ତ୍ରୀ ମୋଦି,ପୁଟିନଙ୍କ ସହିତ କଥା ହୋଇ ଆମେରିକା ଓ ତା’ର ମିତ୍ର ରାଷ୍ଟ୍ରଙ୍କୁ ଏକ ସନ୍ଦେଶ ଦେଇଛନ୍ତି । ସେ ସ୍ପଷ୍ଟ କରିଦେଇଛନ୍ତି ଯେ, ପାଶ୍ଚାତ୍ୟ ରାଷ୍ଟ୍ର ଆମେରିକା ନେତୃତ୍ୱରେ ଋଷ ବିରୋଧରେ ପ୍ରତିବନ୍ଧକ ଲଗାଇଲେ ମଧ୍ୟ ଭାରତ-ଋଷ ଅର୍ଥନୈତିକ ସହଯୋଗ ଆଗକୁ ଅଧିକ ବଢିବ ।

ମହତ୍ୱପୂର୍ଣ୍ଣ କଥା ହେଉଛି ଯେ, ଋଷ ବିରୋଧରେ ପାଶ୍ଚାତ୍ୟ ରାଷ୍ଟ୍ରଙ୍କ ପ୍ରତିବନ୍ଧକ ପରେ ଋଷ ଓ ଭାରତ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ଅଧିକ ବୃଦ୍ଧି ପାଇଛି । ସୋଭିଏତ ସଂଘର ପତନ ପରେ ଏଭଳି ହେବ ବୋଲି କେହି କେବେ ମଧ୍ୟ କଳ୍ପନା କରିନଥିଲେ । ଭାରତ ଓ ଋଷ ମଧ୍ୟରେ ଏଭଳି ବାଣିଜ୍ୟକ ସମ୍ପର୍କ କେବେ ପ୍ରତିଷ୍ଠା ହେବ ତାହା ଅନେକଙ୍କ କଳ୍ପନା ବାହାରେ ଥିଲା । ଏହି ବାର୍ତ୍ତାଳପ ସେହି ସମୟରେ ହୋଇଛି ଯେତେବେଳେ ପାଶ୍ଚାତ୍ୟ ରାଷ୍ଚ୍ର ବ୍ରିକ୍ସ ସଂଗଠନ ମଧ୍ୟରେ ମତଭେଦ ସୃଷ୍ଟି ପାଇଁ ନିଜ ଉଦ୍ୟମକୁ ଅଧିକ ଜୋରଦାର କରିଛନ୍ତି । ଋଷଠାରୁ ଭାରତ ତୈଳ କିଣିବା ବନ୍ଦ କରୁ ବୋଲି ପାଶ୍ଚାତ୍ୟ ରାଷ୍ଟ୍ର ଚାହାନ୍ତି । ନୂଆ ଶିତଳ ଯୁଦ୍ଧରେ ଭାରତ ଆମେରିକା ମେଣ୍ଟ ସହ ରହୁ ବୋଲି ସେମାନଙ୍କ ଲକ୍ଷ୍ୟ ।

ୟୁକ୍ରେନ ଯୁଦ୍ଧକୁ ନେଇ ଋଷକୁ ‘ନୁଆଁଇବା’ର ବିଫଳ ପ୍ରୟାସ

ୟୁକ୍ରେନ ଯୁଦ୍ଧକୁ ନେଇ ଋଷ ଉପରେ ଚାପ ପ୍ରୟୋଗ କରିବା ପାଇଁ ନାଟୋ ସଦସ୍ୟ ରାଷ୍ଟ୍ର ଯେଉଁ ଉଦ୍ୟମ କରୁଥିଲେ ଏବେ ତାହା ସଫଳ ହେଉନଥିବା ଦେଖିବାକୁ ମିଳୁଛି । ବିଶେଷଜ୍ଞଙ୍କ ଅନୁସାରେ ପାଶ୍ଚାତ୍ୟ ରାଷ୍ଟ୍ର ଋଷ ଓ ଚୀନ ମଧ୍ୟରେ ବଢୁଥିବା ସମ୍ପର୍କର ଦ୍ୱାହି ଦେଇ ଭାରତକୁ ଡରାଇବାକୁ ଚାହୁଁଥିଲେ । କିନ୍ତୁ ଭାରତ ଏଥିରେ ବିଚଳିତ ହୋଇନଥିବା ପ୍ରତିତ ହେଉଛି । ଓଲଟା ଋଷ ବିରୋଧରେ ଲାଗୁ ପ୍ରତିବନ୍ଧକୁ ଭାରତ ଅବସର ଭାବେ ନେଇଛି । ଋଷ ସହିତ ନୂଆ ଅର୍ଥନୈତିକ ସମ୍ପର୍କ ପ୍ରତିଷ୍ଠା କରି ଭାରତ ଲାଭବାନ ହେବାକୁ ଚେଷ୍ଟା କରୁଛି ।

ଏହି କାରଣରୁ ଭାରତ ବିନା କୌଣସି ସନ୍ଦେହରେ ଭାରତ ଓ ଆମେରିକା ଉଭୟଙ୍କ ସହିତ ସନ୍ତୁଳିତ ସଂପର୍କ ରକ୍ଷା ପାଇଁ ଉଦ୍ୟମ କରୁଛି । ବ୍ରିକସ ଶିଖର ସମ୍ମିଳନୀରେ ଋଷ ବିରୋଧୀ ବୟାନରେ ଭାରତ ସାମିଲ ହେଉଛି ନା ନାହିଁ ତା’ଉପରେ ସମସ୍ତଙ୍କ ନଜର ଥିଲା । ପ୍ରଧାନମନ୍ତ୍ରୀ ମୋଦି ବ୍ରିକ୍ସରେ ଦେଇଥିବା ଭାଷଣରେ କାହାରିକି ମଧ୍ୟ ନିଶାନାକୁ ନେଇନଥିଲେ । ପୁଟିନ ମଧ୍ୟ କହିଥିଲେ ଯେ, ଜଟିଳ ଆହ୍ୱାନ ମଧ୍ୟରେ ବର୍ତ୍ତମାନର ବିପଦ ଭିତରେ ଆମକୁ ଏକ ସାମୁହିକ ସୁରକ୍ଷାର ଆବଶ୍ୟକତା ରହିଛି । ଚୀନ୍ ରାଷ୍ଟ୍ରପତି ମଧ୍ୟ ବ୍ରିକସ ସଦସ୍ୟଙ୍କୁ ଶିତଳଯୁଦ୍ଧ କାଳୀନ ମାନସିକତାର ଚାପରେ ନଆସିବାକୁ ଆହ୍ୱାନ କରିଥିଲେ ।

ବିଶେଷଜ୍ଞଙ୍କ କହିବା ହେଉଛି ଯେ, ବ୍ରିକ୍ସ ଶିଖର ସମ୍ମିଳନୀରେ ଚୀନ୍ ନିଜ ପ୍ରାଧାନ୍ୟ ବିସ୍ତାର କରିବାର ଉଦ୍ୟମ କରିନଥିଲା । ଋଷ ଏଥିରେ ବିଶେଷ ସ୍ଥାନ ଅଧିକାର କରିପାରିଛି । ଆମେରିକାର ଆଧିପତ୍ୟ ବିରୋଧରେ ବ୍ରିକସର ସୃଷ୍ଟି କିନ୍ତୁ ଏହି ଶିଖର ବୈଠକରେ ଆମେରିକା ବିରୋଧରେ କୌଣସି ବିଦ୍ୱେଶଭାବ ଦେଖିବାକୁ ମିଳିନଥିଲା ।