କରୋନା ଓ କମଳା ପାଇଁ ମାରପିଟ ନେଇଯିବ କି ସିନ୍ ଜିଙ୍ଗ ପିଙ୍ଗଙ୍କ ଗାଦି ?

ଚୀନର ଜିରୋ କରୋନା ନୀତି ଫେଲ ମାରିଛି । କଠୋର କଟକଣା ଲାଗୁ କରିବା ପରେ ତାକୁ ପ୍ରତ୍ୟାହାର କରିନେବା ଚୀନକୁ ମହଙ୍ଗା ପଡ଼ିବା ଭଳି ଲାଗିଲାଣି । ଚୀନ୍ ସରକାର ଯେତେ ଲୁଚାଇଲେ ମଧ୍ୟ କରୋନା ସତ ଧିରେ ଧିରେ ପଦାକୁ ଆସିବାକୁ ଲାଗିଲାଣି । କୁହାଯାଉଛି ଯେ, ଚୀନରେ ଦୈନିକ ୧୦ ଲକ୍ଷ କରୋନା ସଂକ୍ରମଣ ମାମଲା ଆସୁଛି । ଆଉ ଏହି ଧାରା ଯଦି ଜାରି ରହେ ତେବେ ଅତିକମରେ ୨୭ ଲକ୍ଷ ଲୋକ ପ୍ରାଣ ହରାଇବେ ବୋଲି ଆଶଙ୍କା କରାଯାଉଛି ।

କମଳା ପାଇଁ ମାରପିଟ୍

ଚୀନରେ ଔଷଧ ମିଳୁନି । ରୋଗୀଙ୍କୁ ବେଡ୍ ମିଳୁନାହିଁ । ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓ ଭୟାବହ । ଗୋଟିଏ ଭିଡିଓରେ ଏକ ହସ୍ପିଟାଲ ବାହାର ଦୃଷ୍ୟ ରହିଛି । ଯେଉଁଥିରେ ସଂକ୍ରମିତଙ୍କୁ ତଳେ ଶୁଆଇ ଅକ୍ସିଜେନ୍ ଦିଆଯାଉଛି । କିନ୍ତୁ ଅକ୍ସିଜେନ୍ ପାଇପକୁ ଲୁଗା ସୁଖାଇବାକୁ ଯେପରି ରଶି ବନ୍ଧା ଯାଏ ସେହି ଭଳି ରଶିରେ ଅକ୍ସିଜେନ୍ ପାଇପକୁ ଝୁଲାଇ ରଖାଯାଇଛି ।

ଅନ୍ୟ ଏକ ଭିଡଓରେ କରୋନା ଡିଟେନସନ୍ ସେଣ୍ଟରରେ ଜଣେ ମହିଳା କବଟାକୁ ଜୋରଦାର ଧକ୍କା ମାରି ରାଷ୍ଟ୍ରପତି ସିନ୍ ଜିନ୍ ପିଙ୍ଗଙ୍କୁ ଗାଳି କରୁଥିବା ଦେଖିବାକୁ ମିଳିଛି । ଭିଡିଓରେ ମହିଳା ଜଣକ କହୁଛନ୍ତି ଯେ, ‘‘ତୁମେ (ସିନ୍ ଜିନ୍ ପିଙ୍ଗ୍) ମୋତେ ମିଛ କହିଥିଲ । ତୁମେ କହିଥିଲ ଯେ, କୋରୋନା ଚାଲିଗଲା । ତେବେ ମୁଁ କ’ଣ ପାଇଁ ଏଠାରେ ଅଛି’’

ସଂକ୍ରମିତଙ୍କୁ ହସ୍ପିଟାଲରେ ବେଡ୍ ଓ ବଟିକା ମିଳୁନଥିବା ବେଳେ ଲୋକ ରୋଗ ପ୍ରତିହତକାରୀ ଶକ୍ତି ପାଇଁ କମଳା ଖୋଜୁଛନ୍ତି । ଗୋଟିଏ ଭିଡିଓରେ ଏକ ଫଳଦୋକାନରେ ଲୋକ କମଳା ନେବା ପାଇଁ ନିଜ ନିଜ ମଧ୍ୟରେ ମାରପିଟ୍ ହେଉଥିବାର ଦେଖିବାକୁ ମିଳିଛି ।

ଆର୍ୟୁବେଦର ଚାହିଦା ବଢିଛି

ଏହା ଭିତରେ ଚୀନରେ ଭାରତୀୟ ଔଷଧ ଆର୍ୟୁବେଦର ଚାହିଦା ବଢିଛି । ଚୀନ୍ ନାଗରିକ ଆର୍ୟୁବେଦ ଔଷଧ ଖୋଜୁଥିବା ବେଳେ ଯୋଗ କରୁଥିୂବା ଦେଖିବାକୁ ମିଳିଛି । ଏପରିକି କିଛି ଜଳଯୋଗ କରୁଥିବା ଦେଖିବାକୁ ମିଳିଛି

କରୋନା ଡ଼ର ଆଗରେ ଜିନ୍ ପିଙ୍ଗ ଫିକା

ଚୀନ୍ ନାଗରିକଙ୍କୁ କରୋନା ଏତେ ଡରାଇଲାଣି ଯେ, ସେମାନେ କମ୍ୟୁନିଷ୍ଟ୍ ପାର୍ଟି ବିରୋଧରେ ଖୋଲାଖୋଲି ବିଦ୍ରୋହ ଆରମ୍ଭ କଲେଣି । ଗତ ୩୪ ବର୍ଷ ମଧ୍ୟରେ ସରକାର ବିରୋଧରେ ଲୋକଙ୍କର ଏଭଳି ଖୋଲା ବିଦ୍ରୋହ କେବେ ମଧ୍ୟ ଦେଖିବାକୁ ମିଳିନଥିଲା ଯାହା ଏବେ ଦେଖିବାକୁ ମିଳୁଛି । ଲୋକଙ୍କ ମଧ୍ୟରେ ଗୋଟିଏ ଧାରଣା ବଳବତ୍ତର ହେଲାଣି ଯେ, ଏମିତିରେ କରୋନାରେ ଯଦି ମରିବାର ଅଛି ତେବେ ସରକାରଙ୍କୁ ବିରୋଧ କରି କାହିଁକି ମରିବୁ ନାହିଁ ? ତେଣୁ ସାଧାରଣ ଲୋକ ରାଷ୍ଟ୍ରପତି ସି ଜିନ୍ ପିଙ୍ଗଙ୍କ ବିରୋଧରେ ଖୋଲାଖୋଲି ରାସ୍ତା ଉପରକୁ ଆସିଲେଣି । କୁହାଯାଉଛି ଯେ, ଜିନ୍ ପିଙ୍ଗଙ୍କ ବିରୋଧରେ ଲୋକଙ୍କୁ କରୋନା ନିର୍ଭୟ କରିଦେଇଛି । ସେମାନେ ଜିନ୍ ପିଙ୍ଗ କିମ୍ବା ତାଙ୍କ ସେନାକୁ ଭୟ କରିବା ଛାଡି ଦେଲେଣି ।