ମୁମ୍ବାଇରେ ଦେଶର ବିଜେପି ବିରୋଧୀ ରାଜନୈତିକ ଦଳ ୨୦୨୪ ରଣନୀତି ନିର୍ଧାରଣ ପାଇଁ ଏକାଠି ହୋଇଛନ୍ତି । କିନ୍ତୁ କୋଟିଏ ଟଙ୍କାର ପ୍ରଶ୍ନର ଉତ୍ତର ଦେବାକୁ କୌଣସି ଦଳ କିମ୍ବା ନେତା ଆଗକୁ ଆସୁନାହାନ୍ତି । ବିରୋଧୀ ମେଣ୍ଟର ପ୍ରଧାନମନ୍ତ୍ରୀ ପ୍ରାର୍ଥୀ କିଏ ହେବେ ? କାହାକୁ ଚେହେରା କରି I.N.D.I.A ମୋଦିଙ୍କ ମୁକାବିଲା କରିବ ? । ରାହୁଲଙ୍କଠାରୁ ନୀତିଶ ଓ ଉଦ୍ଧବ ଠାକରେଙ୍କ ପର୍ଯ୍ୟନ୍ତ ସମସ୍ତଙ୍କ ନାମ ପ୍ରଧାନମନ୍ତ୍ରୀ ଚେହେରା ଭାବେ ସେମାନଙ୍କ ଦଳର ନେତା ଆଗକୁ ଆଣୁଛନ୍ତି । ଏହାରି ଭିତରେ ଆରଜେଡିର ତେଜସ୍ୱୀ ଯାଦବ ନିର୍ବାଚନ ପରେ ନେତା ନିର୍ବାଚନ ହେବ ବୋଲି କହିଛନ୍ତି । ନେତୃତ୍ୱର ଏହି କନଫ୍ୟୁଜନ କାରଣରୁ I.N.D.I.A ନିର୍ବାଚନ ପୂର୍ବରୁ ହିଁ ପରସେପସନ୍ ବା ଅବଧାରଣାର ଲଢେଇରେ ପଛୁଆ ହୋଇ ଯାଇଛି ।
ଯିଏ ନେତା ହେବ ସିଏ ରାଲିରେ ମୋଦିଙ୍କ ନିଶାନାରେ ରହିବେ
ଏହା ସୁନିଶ୍ଚିତ ଯେ, ୨୦୨୪ ନିର୍ବାଚନ ବିଜେପି ଆଗଭଳି ମୋଦିଙ୍କ ଚେହେରାକୁ ଅସ୍ତ୍ର କରି ଲଢିବ । ନିର୍ବାଚନୀ ରାଲିରେ I.N.D.I.Aର ନିଶାନାରେ ପ୍ରଧାନମନ୍ତ୍ରୀ ମୋଦି ରହିବେ । ଆଉ ସେଭଳି ପରିସ୍ଥିତିରେ ବିଜେପି ନିଶାନାରେ I.N.D.I.A ମେଣ୍ଟର ପ୍ରଧାନମନ୍ତ୍ରୀ ଚେହେରା ମଧ୍ଯ ରହିବେ । ୨୦୧୪ ଓ ୨୦୧୯ ନିର୍ବାଚନରେ ବିଜେପି କଂଗ୍ରେସ ବିରୋଧରେ ଆକ୍ରମଣାତ୍ମକ ପ୍ରଚାର କରିଥିଲା । ଗତ ଦୁଇ ସାଧାରଣ ନିର୍ବାଚନରେ ବିଜେପି ଓ ମୋଦିଙ୍କ ନିଶାନାରେ ରାହୁଲ ଥିଲେ । ଏହି ଦୁଇ ନିର୍ବାଚନରେ ବିଜେପି ବ୍ଯତିତ କୌଣସି ଦଳ ନିଜର ପ୍ରଧାନମନ୍ତ୍ରୀ ପ୍ରାର୍ଥୀଙ୍କ ନାମ ଘୋଷଣା କରିନଥିଲେ । ଯାହାର ଲାଭ ବିଜେପି ପାଇଥିଲା । ଟିମ୍ I.N.D.I.A ଏପର୍ଯ୍ଯନ୍ତ ସଂଯୋଜକଙ୍କ ନାମକୁ ନେଇ ଏକମତ ହୋଇନଥିବା ବେଳେ ପ୍ରଧାନମନ୍ତ୍ରୀ ଭାବେ କାହାକୁ କେମିତି ବାଛିବ ? ଆଉ ଗୋଟିଏ କଥା ହେଉଛି I.N.D.I.Aର ପ୍ରଧାନମନ୍ତ୍ରୀ ପ୍ରାର୍ଥୀଙ୍କ ନାମ ଘୋଷଣା ହେବା ସହିତ ନିର୍ବାଚନ ମୋଦି ବନାମ ସେହି ନେତାଙ୍କ ମଧ୍ଯରେ ଲଢେଇ ହେବ । ଏଥିରୁ I.N.D.I.A ଗାଏବ ହୋଇଯିବ । ଏହା ସହିତ ମୋଦିଙ୍କ ରାଲିରେ I.N.D.I.Aର ପ୍ରଧାନମନ୍ତ୍ରୀ ପ୍ରାର୍ଥୀ ହିଁ ତାଙ୍କର ମୁଖ୍ଯ ଟାର୍ଗେଟ୍ ରହିବେ ।
I.N.D.I.Aର ମନେ ଅଛି ପିଏମ୍ ଇନ୍ ୱେଟିଂ ମଜାକ୍
୯୦ ଦଶକରେ ବିଜେପି ସବୁ ନିର୍ବାଚନ ନିଜର ପ୍ରଧାନମନ୍ତ୍ରୀ ଚେହେରା ସହିତ ଲଢୁଥିଲା । ୧୯୯୦ ଦଶକର ଆରମ୍ଭରୁ ବିଜେପି ବାଜପାୟୀଙ୍କୁ ନିଜ ପ୍ରଧାନମନ୍ତ୍ରୀ ପ୍ରାର୍ଥୀ ଭାବେ ଭୋଟରଙ୍କ ଆଗରେ ଉପସ୍ଥାପନ କରୁଥିଲା । ଅବକି ବାର ଅଟଲ ବିହାରୀ ୧୯୯୦ ଦଶକର ପ୍ରସିଦ୍ଧ କିନ୍ତୁ ଫ୍ଲପ୍ ସ୍ଲୋଗାନ ଥିଲା । ୧୯୯୬ର ୧୩ ଦିନିଆ ସରକାର ପରେ ୧୯୯୯ରେ ଅଟଳ ବିହାରୀ ଶେଷକୁ ପ୍ରଧାନମନ୍ତ୍ରୀ ହୋଇପାରିଥିଲେ । ଏହା ସହିତ ତାଙ୍କ ସହିତ ଲାଗିଥିବା ପିଏମ୍ ଇନ୍ ୱେଟିଂ ଟାଗ୍ ଲାଇନ୍ ହଟିଥିଲା । କିନ୍ତୁ ଲାଲକୃଷ୍ଣ ଆଡଭାନୀଙ୍କ ସହିତ ପୁରା ଜୀବନ ପାଇଁ ଏହି ଟାଗ୍ ଲାଗି ରହିଗଲା । ୨୦୦୯ରେ ଲାଲକୃଷ୍ଣ ଆଡଭାନୀଙ୍କୁ ବିଜେପି ପ୍ରଧାନମନ୍ତ୍ରୀ ଚେହେରା କରିଥିଲା । କିନ୍ତୁ ଫଳାଫଳ ତାଙ୍କ ବିରୋଧରେ ଯାଇଥିଲା । ତାଙ୍କ ବିରୋଧୀ ତାଙ୍କୁ ପିଏମ୍ ଇନ୍ ୱେଟିଂ କହି ଥଟା ଉଡ଼ାଉଥିଲେ । I.N.D.I.Aର ନେତା ଏହି କଥା ଭୁଲି ନାହାନ୍ତି । ସେମାନେ ମଧ୍ଯ ଚାହୁଁନାହାନ୍ତି ଯେ, ସେମାନଙ୍କ ନାମ ସହିତ ଏମିତି ଟ୍ୟାଗ୍ ଲାଗି ଯାଉ ।
