ବିହାର ପୋଲିସ ହାତରେ ଜଣେ ପୂର୍ବତନ ପୋଲିସ ଅଧିକାରୀ ଧରା ପଡିଛନ୍ତି । ଏହି ଅଧିକାରୀ ଜଣକ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ଆକ୍ରମଣର ଷଡ଼ଯନ୍ତ୍ର କରୁଥିଲେ । ତାଙ୍କ ସହିତ ଆଉ ଜଣେ ବ୍ୟକ୍ତି ମଧ୍ୟ ଧରା ପଡିଛନ୍ତି ଯାହାର ଭାଇ ୨୦୧୩ ପାଟନା ବୋମା ବିସ୍ଫୋରଣ ମାମଲାରେ ଏବେ ଜେଲରେ ଅଛି । ସେତେବେଳେ ମଧ୍ୟ ମୋଦିଙ୍କୁ ଟାର୍ଗେଟ୍ କରାଯାଇଥିଲା । ତେବେ ଏହି ସବୁ ବ୍ୟକ୍ତିଙ୍କ ତାର ପପୁଲାର ଫ୍ରଣ୍ଟ୍ ଅଫ୍ ଇଣ୍ଡିଆ ନାମକ ସଂଗଠନ ସହିତ ଯୋଡି ହୋଇଛି । ଭାରତରେ ମଝିରେ ମଝିରେ ଏମିତି ଆତଙ୍କବାଦୀ ଧରା ପଡିବା କିଛି ନୁଆ କଥା ନୁହେଁ । ନୂଆ ହେଉଛି ଏହି ବ୍ୟକ୍ତି ମାନଙ୍କ ପ୍ଲାନ୍ ହେଉଛି ୨୦୪୭ ସୁଧା ଭାରତକୁ ଇସଲାମିକ ରାଷ୍ଟ୍ରରେ ପରିଣତ କରିବା । ଏଥିପାଇଁ ସେମାନେ ଏକ ମିଶନ ମଧ୍ୟ ପ୍ରସ୍ତୁତ କରିଛନ୍ତି । ଯାହାର ନାମ ହେଉଛି ‘ଇସଲାମ-୨୦୪୭’ ।
କେଉଁଠୁ ଆସିଲା ‘ମିଶନ ଇସଲାମ୍ ୨୦୪୭’ ନାମ
ପାଟନା ପୋଲିସ ପାଟନାର ନୟାଟୋଲା ଅଂଚଳରେ ଚଢାଉ କରି ପିଏଫଆଇର କାର୍ଯ୍ୟାଳୟରୁ ଦୁଇ ଜଣ ସଂଦିଗ୍ଧଙ୍କୁ ଗିରଫ କରିଛି । ସେମାନଙ୍କ ପାଖରୁ କିଛି ଆପତିଜନକ ସାମଗ୍ରୀ ଜବତ ହୋଇଛି । ବହି, ପ୍ରଚାରପତ୍ରରୁ ଏହି ମିଶନ ଇସଲାମ ୨୦୪୭ ବାବଦରେ ଜଣା ପଡିଥିଲା । ଯେଉଁଥିରେ ୨୦୪୭ ସୁଧା ଭାରତକୁ ଇସଲାମିକ ରାଷ୍ଟ୍ରରେ ପରିଣତ କରିବାର ବ୍ଲୁ ପ୍ରିଣ୍ଟ୍ ରହିଛି ।
ମିଶନ ସହିତ କେଉଁମାନେ ଜଡ଼ିତ ?
ମିଶନ ଇସଲାମ ୨୦୪୭ ସହିତ ଅନେକ ବ୍ୟକ୍ତି ଜଡ଼ିତ ଥିବା ସନ୍ଦେହ କରାଯାଉଛି । ଗିରଫ ପୂର୍ବତନ ପୋଲିସ ଅଧିକାରୀ ଜଣକ ଝାଡଖଣ୍ଡ ସରକାର ପାଇଁ କାମ କରୁଥିଲେ । ଯାହାର ନାମ ହେଉଛି ମହମ୍ମଦ ଜଲାଲୁଦ୍ଦିନ । ଜଣେ ପୂର୍ବତନ ପୋଲିସ ଅଧିକାରୀଙ୍କର ଏଭଳି ସଂଗଠନ ସହିତ ଜଡ଼ିତ ହେବା ପୋଲିସକୁ ଚମକାଇ ଦେଇଛି । ତେଣୁ ପୋଲିସ ଆଶଙ୍କା କରୁଛି ଯେ,ଏହା ସହିତ ଅନେକ ରାଜ୍ୟର ବ୍ୟକ୍ତି ଜଡ଼ିତ ଥିବେ ।
ମିଶନ ଇସଲାମ୍ ୨୦୪୭ର ଲକ୍ଷ୍ୟ କ’ଣ ?
ଏହାର ଲକ୍ଷ୍ୟ ହେଉଛି ୨୦୪୭ ସୁଧା ଭାରତକୁ ଏକ ଇସଲାମିକ ରାଷ୍ଟ୍ରରେ ପରିଣତ କରିବା । ମିଶନକୁ ସଫଳ କରିବା ପାଇଁ ଅନେକ ସ୍ତରରେ ପ୍ଲାନିଂ ହୋଇଛି । ଉଦାହରଣ ସ୍ୱରୁପ ଏଭଳି ଲୋକଙ୍କୁ ବଛା ଯିବା ଉପରେ ଗୁରୁତ୍ୱ ଦିଆଯାଇଛି ଯେଉଁମାନେ ଏହି ମିଶନ ଉପରେ ବିଶ୍ୱାସ କରୁଥିବେ । ଏଭଳି ଲୋକଙ୍କୁ ଟ୍ରେନିଂ ଦେବା ଉପରେ ଗୁରୁତ୍ୱ ଦିଆଯାଇଛି । ପ୍ରଶିକ୍ଷିତ ଲୋକଙ୍କୁ ମୁସଲିମ୍ ବହୁଳ ଅଂଚଳକୁ ପଠାଇ ଅଧିକ କ୍ଯାଡର ଯୋଗାଡ କରିବା ଏହି ମିଶନର ଲକ୍ଷ୍ୟ ।
ଟ୍ରେନିଂ କ୍ୟାମ୍ପ୍
ପାଟନା ପୋଲିସ ଅନୁସାରେ ଜୁଲାଇ ୬ ଓ ୭ରେ ମାର୍ଶାଲ ଆର୍ଟ ପ୍ରଶିକ୍ଷଣ ନାମରେ ଫୁଲବାରୀ ଶରିଫରେ କ୍ୟାମ୍ପ ଲଗା ଯାଇଥିଲା । ଏହି କ୍ୟାମ୍ପରେ ଅଂଶଗ୍ରହଣ କରିଥିବା ବ୍ୟକ୍ତିଙ୍କୁ ଛୁରା, ଖଣ୍ଡା ଚଳାଇବା ପ୍ରଶିକ୍ଷଣ ଦିଆଯାଇଥିଲା । ପୋଲିସ ପାଖରେ ଏସବୁର ସିସିଟିଭି ଫୁଟେଜ୍ ମଧ୍ୟ ରହିଛି ।
କେଉଁ କେଉଁ ରାଜ୍ୟରେ ଚାଲିଛି ମିଶନର କାର୍ଯ୍ୟ ?
ବିହାର, ଉତ୍ତର ପ୍ରଦେଶ, ପଶ୍ଚିମ ବଙ୍ଗ, କର୍ଣ୍ଣାଟକ, ତାମିଲନାଡୁ ଓ କେରଳ ଭଳି ରାଜ୍ୟରେ ଚରମପନ୍ଥୀ ଏହି ମିଶନକୁ ନେଇ କାର୍ଯ୍ୟ କରୁଛନ୍ତି । ହିନ୍ଦୁଙ୍କ ବିରୋଧରେ ବିଦ୍ୱେଶ ଭାବ ସୃଷ୍ଟି ପାଇଁ ଅଧିକ ଗୁରୁତ୍ୱ ଦିଆଯାଉଛି । ମୁସଲିମ ଯୁବକଙ୍କ ବ୍ରେନ୍ ୱାସ୍ କରାଯାଉଛି ।
ମିଶନ ଇସଲାମ ୨୦୪୭କୁ କିଏ ଦେଉଛି ପାଣ୍ଠି ?
ତୁର୍କି ଓ ପାକିସ୍ତାନରୁ ଏହି ମିଶନ ପାଇଁ ପାଣ୍ଠି ଆସୁଛି । ନିଜେ ଦେବାଳିଆ ହୋଇ ସାରିଥିବା ପାକିସ୍ତାନ ଭାରତକୁ ଅସ୍ଥିର କରିବା ପାଇଁ ପାଣ୍ଠି ଯୋଗାଉ ଥିବା ବେଳେ ତୁର୍କୀ ଇସଲାମିକ ଦୁନିଆରେ ନିଜକୁ ପ୍ରତିଷ୍ଠିତ କରିବା ପାଇଁ ଏଭଳି ମିଶନକୁ ସାହାଯ୍ୟ କରୁଥିବା ସନ୍ଦେହ କରାଯାଉଛି ।
