ତାଜମହଲର ୨୨ ରୁମ ଖୋଲିବା ପାଇଁ ଆହ୍ଲାବାଦ ହାଇକୋର୍ଟର ଲକ୍ଷ୍ନୌ ବେଂଚରେ ବିଜେପି ନେତା ଡାକ୍ତର ରଜନୀଶ ସିଂହ ଆବେଦନ କରିଛନ୍ତି । ହାଇକୋର୍ଟରେ ଏହି ଆବେଦନ ପରେ ଲୋକଙ୍କ ମଧ୍ୟରେ ତାଜମହଲର ସେହି ୨୨ ଗୁପ୍ତ ରୁମକୁ ନେଇ ଉତ୍କଣ୍ଠାଂ ବୃଦ୍ଧି ପାଇଛି । ଯଦି ହାଇକୋର୍ଟ୍ ୨୨ ରୁମ୍ ଖୋଲିବାକୁ ଅନୁମତି ଦିଅନ୍ତି ତେବେ କ’ଣ ହେବ ? କେଉଁ ରହସ୍ୟ ପଦାକୁ ଆସିବ ? ଏମିତି ଅନେକ ପ୍ରଶ୍ନ ଲୋକଙ୍କ ମନରେ ସୃଷ୍ଟି ହୋଇଥିବା ବେଳେ ଏଇଠି ଆମେ ଗୋଟିଏ କଥା ଆପଣଙ୍କୁ କହିବାକୁ ଚାହିଁବୁ । ଆଉ ତା’ ହେଉଛି ଯେ, ଆଗରୁ ଥରୁଟିଏ ତାଜମହଲର ୨୨ ଗୁପ୍ତ ରୁମକୁ ଖୋଲାଯାଇଥିଲା । ଆସନ୍ତୁ ଜାଣିବା କେବେ ଓ କାହିଁକି ତାଜମହଲର ଗୁପ୍ତ ଦ୍ୱାର ଖୋଲାଯାଇଥିଲା ?
୮୮ ବର୍ଷ ତଳେ ଖୋଲିଥିଲା ଗୁପ୍ତ କବାଟ
ଐତିହାସିକ ରାଜକିଶୋର ରାଜେଙ୍କ ଅନୁସାରେ ତାଜମହଲର ମୁଖ୍ୟ ସମାଧି ଓ ଚମେଲି ଚଟାଣ ତଳେ ୨୨ ଘର ରହିଛି । ତାଙ୍କ ଅନୁସାରେ ଏହି ରୁମ୍ ସବୁ ମୋଗଲ ଅମଳରୁ ବନ୍ଦ ଅଛି । ୧୯୩୪ ମସିହାରେ ଏହି ରୁମଗୁଡିକର ନିରିକ୍ଷଣ ପାଇଁ ଖୋଲାଯାଇଥିଲା । ନିରିକ୍ଷଣ ପରେ ଏହାକୁ ବନ୍ଦ କରି ଦିଆଯାଇଥିଲା । ତେବେ ଏବାବଦରେ କୌଣସି ସ୍ଥାନରେ ଉଲ୍ଲେଖ ନାହିଁ
ଯମୁନା ନଦୀ ପଟକୁ ଥିବା ଚମେଲି ଚଟାଣର ବେସମେଣ୍ଟରେ ତଳକୁ ଯିବା ପାଇଁ ଦୁଇଟି ସ୍ଥାନରେ ସୀଢି ରହିଛି । ଏହା ଉପରେ ଲୁହା ଜାଲି ଲଗାଇ ବନ୍ଦ କରାଯାଇଛି । ୪୦ରୁ ୪୫ ବର୍ଷ ତଳ ପର୍ଯ୍ୟନ୍ତ ସୀଢି ଖୋଲାଥିଲା । ଅନ୍ୟପକ୍ଷରେ ୮୮ ବର୍ଷ ତଳେ ଏହି ୨୨ ରୁମକୁ ଶେଷଥର ପାଇଁ ଖୋଲାଯାଇଥିଲା ।
ଏହାପରେ ୨୦୧୫ରେ ମରାମତି କାର୍ଯ୍ୟ ପାଇଁ ଗୋପନୀୟ ଭାବେ ଏହାକୁ ଖୋଲାଯାଇଥିବାର ସୂଚନା ମିଳିଥିଲା । ଗତ ୮୮ ବର୍ଷ ମଧ୍ୟରେ ସାର୍ବଜନିକ ଭାବେ ଏହି ୨୨ ରୁମକୁ କେବେ ମଧ୍ୟ ଖୋଲା ଯାଇନାହିଁ ।
ପିଏନ୍ ଓକଙ୍କ ବହିକୁ ନେଇ ବିବାଦ
ତାଜମହଲ କିମ୍ବା ତେଜୋମହାଲୟର ବିବାଦ ଐତିହାସିକ ପିଏନ୍ ଓକଙ୍କ ପୁସ୍ତକ ‘ଟ୍ରୁ ଷ୍ଟୋରି ଅଫ୍ ତାଜ୍’ ପରଠାରୁ ଆରମ୍ଭ ହୋଇଥିଲା । ଐତିହାସିକ ରାଜକୁମାରଙ୍କ କହିବା ହେଉଛି ଯେ,ତାଜମହଲ ଶିବମନ୍ଦିର ଥିବା ନେଇ ପି ଏନ୍ ଓକଙ୍କ ଦାବି ପରଠାରୁ ଏହି ବିବାଦ ସୃଷ୍ଟି ହୋଇଥିଲା । ଓକ୍ ନିଜ ପୁସ୍ତକରେ ରାଜା ଜୟ ସିଂହଙ୍କ ଫର୍ମାନର ଉଲ୍ଲେଖ କରିବା ସହିତ ସ୍ଥାପତ୍ୟ କଳାର ଉଦାହରଣ ଦେଇଥିଲେ । ଏହା ସହିତ ତାଜମହଲରେ ଗଣେଷ, ପଦ୍ମଫୁଲ ଓ ସର୍ପ ଆକାରର ଆକୃତି ଥିବାର ମଧ୍ୟ ସେ ପ୍ରମାଣ ଦେଇଥିଲେ ।
ରାଜା ମାନ ସିଂହଙ୍କ ସହିତ ସଂପର୍କିତ ଅଭିଲେଖା
ଏହା ସହିତ ତାଜମହଲର ରାଜା ଜୟ ସିଂହଙ୍କ ସହିତ ସମ୍ପର୍କ ଥିବା ନେଇ ଏକ ଅଭିଲେଖା ଜୟପୁର ସ୍ଥିତ ସିଟି ପ୍ୟାଲେସ ସଂଗ୍ରାହଳୟରେ ରହିଛି । ଏହି ଅଭିଲେଖା ଅନୁସାରେ ରାଜା ଜୟସିଂହଙ୍କଠାରୁ ଗୋଟିଏ ହାବେଲି (ପ୍ରାସାଦ) ନେବା ବଦଳରେ ଶାହାଜାହାନ ୪ଟି ହାବେଲି ପ୍ରଦାନ କରିଥିଲେ । ଏହି ଫର୍ମାନ ୧୬ ଡିସେମ୍ବର ୧୬୩୩ରେ ଜାରି କରାଯାଇଥିଲା । ଏଥିରେ ରାଜା ଭଗବାନ ଦାସ ରାଜା ମାଧୋ ସିଂହ,ରୂପସୀ ବୈରାଗୀ, ଓ ଚାନ୍ଦ ସିଂହ ହାବେଲି ଦେଇଥିବା କଥା ଉଲ୍ଲେଖ ରହିଛି । ଏହା ସହିତ ଶାହାଜାହାନ ରାଜା ଜୟ ସିଂହଙ୍କଠାରୁ ଯେତିକି ମାର୍ବଲ ମଗାଇଥିଲେ ସେତିକିରେ ତାଜମହଲ ନିର୍ମାଣ ସମ୍ଭବ ନୁହେଁ ବୋଲି ଐତିହାସିକ କୁହନ୍ତି ।
