ଶ୍ରୀଲଙ୍କାର ପୁରୁଣା ନାମ ଥିଲା ସିଲୋନ୍,ନାମ ବଦଳାଇ ବାରେ ଖର୍ଚ୍ଚ ହୁଏ କୋଟି କୋଟି ଟଙ୍କା

ନାମକୁ ନେଇ ରାଜନୀତି କିଛି ନୁଆ ନୁହେଁ ।ବିଶେଷକରି ଭାରତରେ । ସହରଠାରୁ ରାଜ୍ଯ,ସମସ୍ତଙ୍କର ଭାରତରେ ହୋଇଛି ନାମ ପରିବର୍ତ୍ତନ । ତେବେ ଏବେ ଭାରତର ଦୁଇଟି ନାମରୁ ଗୋଟିଏ ନାମ ‘ଇଣ୍ଡିଆ’କୁ ବାଦ ଦେବାକୁ ନେଇ ସରକାର ଯୋଜନା କରୁଛନ୍ତି ବୋଲି ଆଲୋଚନା ହେଉଛି । ଜି-୨୦ ଶିଖର ସମ୍ମିଳନୀ ପୂର୍ବରୁ ରାଷ୍ଚ୍ରପତି ଭବନ ପକ୍ଷରୁ ଦିଆଯାଇଥିବା ନିମନ୍ତ୍ରଣ ପତ୍ରରେ ପ୍ରେସିଡେଣ୍ଟ୍ ଅଫ୍ ଇଣ୍ଡିଆ ଉଲ୍ଲେଖ କରାଯାଇଥିଲା । ଯାହାକୁ ନେଇ ଏହି ଆଲୋଚନା ଆରମ୍ଭ ହୋଇଛି । ବିରୋଧି ‘ଇଣ୍ଡିଆ’ ମେଣ୍ଟକୁ ଡରି ସରକାର ଦେଶର ନାମରୁ ଇଣ୍ଡିଆ ବାଦ ଦେଉଛନ୍ତି ବୋଲି ବିରୋଧୀ ଅଭିଯୋଗ କରିଛନ୍ତି । ତେବେ ଦେଶର ନାମ ପରିବର୍ତ୍ତନ କିଛି ନୂଆ କଥା ନୁହେଁ । ଇତିହାସରେ ଏମିତି ଅନେକ ଉଦାହରଣ ଅଛି ଯେଉଁଠି ଦେଶ ନିଜର ନାମ ବଦଳାଇଛନ୍ତି । କେତେବେଳେ ସେମାନେ ନିଜର ଅତିତକୁ ଭୁଲିବାକୁ ନାମ ବଦଳାଇଛନ୍ତି ତ’ କେତେବେଳେ ନିଜ ଅତିତ ସହିତ ଯୋଡି ହେବାକୁ ନାମ ବଦଲାଇଛନ୍ତି । ୨୦୧୮ରୁ ୨୦୨୦ ମଧ୍ଯରେ ୩ଟି ଦେଶ ନିଜ ନାମ ବଦଳାଇଛନ୍ତି । ଗତ ଶହେ ବର୍ଷ ମଧ୍ଯରେ ପାଖାପାଖି ୧୦ ଦେଶ ନିଜ ନାମ ବଦଳାଇଛନ୍ତି ଆସନ୍ତୁ ଜାଣିବା ନାମ ବଦଳାଇବା ଦ୍ୱାରା ଦେଶର ଅର୍ଥନୀତି ଉପରେ କିଛି ପ୍ରଭାବ ପଡେ କି ନାହିଁ ଓ କେଉଁ ଦେଶ ସବୁ ନିଜ ନାମ ବଦଳାଇଛନ୍ତି ।

୫ ବର୍ଷରେ ୩ ଦେଶ ବଦଳାଇଛନ୍ତି ନାମ

ଗତ ୫ ବର୍ଷ ମଧ୍ଯରେ ବିଶ୍ୱର ୩ଟି ଦେଶ ନିଜ ନାମ ବଦଳାଇଛନ୍ତି । ଏହି ଦେଶଙ୍କ ମଧ୍ଯରେ ଅଛନ୍ତି ହଲାଣ୍ଡ,ମାସିଡୋନିଆ ଓ ସ୍ୱାଜିଲାଣ୍ଡ୍ । ହଲାଣ୍ଡ ୨୦୧୮ରେ ନିଜ ନାମ ବଦଳାଇ ନେଦରଲାଣ୍ଡ୍ କରିଥିଲା । ସେହିଭଳି ସ୍ଲାଜିଲାଣ୍ଡ୍ ମଧ୍ଯ ୨୦୧୮ରେ ନିଜକୁ ଇସୱାତିନି ନାମ ଦେଇଥିଲା । ୨୦୨୦ରେ ରିପବ୍ଲିକ୍ ଅଫ୍ ମାସିଡୋନିଆ ନିଜ ନାମ ପରିବର୍ତ୍ତନ କରି ରିପବ୍ଲିକ୍ ଅଫ୍ ନର୍ଥ୍ ମାସିଡୋନିଆ କରିଥିଲା । ଏବେ ଆସନ୍ତୁ ନିଜ ନାମ ପରିବର୍ତ୍ତନ କରିଥିବା କିଛି ଜଣାଶୁଣା ଦେଶଙ୍କ ନୂଆ ଓ ପୁରୁଣା ନାମ କ’ଣ ଥିଲା ଜାଣିବା ।

୧. ଇରାନ୍

ଇରାନର ନାମ ୧୯୩୫ ମସିହା ପର୍ଯ୍ଯନ୍ତ ପର୍ସିଆ ଥିଲା । ବିଶେଷକରି ୟୁରୋପରେ ଏହା ପର୍ସିଆ ଭାବେ ପରିଚିତ ଥିଲା ।କିନ୍ତୁ ୧୯୩୫ରେ ଇରାନର ତତ୍କାଳୀନ ସରକାର ୟୁରୋପରେ ଯେଉଁସବୁ ଦେଶଙ୍କ ସହିତ ତାଙ୍କର କୂଟନୈତିକ ସମ୍ପର୍କ ଥିଲା ସେମାନଙ୍କୁ ପାର୍ସିଆ ବଦଳରେ ଇରାନ ଶବ୍ଦ ବ୍ଯବହାର କରିବାକୁ ଅନୁରୋଧ କରିଥିଲେ ।

୨. ଥାଇଲାଣ୍ଡ୍

ଥାଇଲାଣ୍ଡ ହେଉଛି ଏସିଆର ସେଇ କେତୋଟି ହାତଗଣତି ଦେଶ ମଧ୍ଯରୁ ଗୋଟିଏ ଯାହାକୁ କେବେ ମଧ୍ଯ କୌଣସି ବିଦେଶୀ ରାଷ୍ଟ୍ର ଅଧିକାର କରିନଥିଲା । ଏହି ଦେଶରେ ରାଜତନ୍ତ୍ର ପ୍ରଚଳିତ ଥିଲା । ୧୯୩୫ ପର୍ଯ୍ଯନ୍ତ ଏହାର ନାମ ଥିଲା ଶ୍ଯାମ । ଭାରତୀୟ ପୁରାଣ ଓ ଇତିହାସରେ ଏହା ଶ୍ଯାମ ନାମରେ ପରିଚିତ ଥିଲା । କିନ୍ତୁ ୧୯୩୫ରେ ଶ୍ଯାମରେ ସାମ୍ବିଧାନିକ ଗଣତନ୍ତ୍ର ପ୍ରତିଷ୍ଠା ହେବା ପରେ ଦେଶର ନାମ ପରିବର୍ତ୍ତନ ହୋଇଥିଲା । ଶ୍ୟାମର ନୂଆ ନାମ ଥିଲା ଥାଇଲାଣ୍ଡ୍ , ଯାହାର ଅର୍ଥ ହେଉଛି ସ୍ୱାଧୀନ ନାଗରିକଙ୍କ ରାଷ୍ଟ୍ର’ ।

୩. କାମ୍ବୋଡିଆ

କାମ୍ବୋଡିଆ ଅନେକ ଥର ନିଜର ନାମ ପରିବର୍ତ୍ତନ କରିଛି । ୧୯୫୩ ଏବଂ ୧୯୭୦ ଏହାର ନାମ ପରିବର୍ତ୍ତନ ହୋଇଥିଲା ।୧୯୫୩ରେ ଏହାର ନାମ ଥିଲା କିଙ୍ଗଡମ୍ ଅଫ୍ କାମ୍ବୋଡିଆ ଓ ୧୯୭୦ରେ ଥିଲା ଖାମେର ରିପବ୍ଲିକ୍ । ୧୯୭୫ରେ କମ୍ଯୁନିଷ୍ଟ ସରକାର କ୍ଷମତାକୁ ଆସିବା ପରେ ଏହାର ନାମ ହୋଇଥିଲା ଡେମୋକ୍ରାଟିକ୍ କାମ୍ପୁଚିଆ । ତେବେ କମ୍ୟୁନିଷ୍ଟ ସରକାରର ପତନ ପରେ ୧୯୮୯ରୁ ୧୯୯୩ ପର୍ଯ୍ଯନ୍ତ ଏହାର ନୂଆ ନାମ ଥିଲା ଷ୍ଟେଟ୍ ଅଫ୍ କାମ୍ବୋଡିଆ । ତେବେ ୧୯୯୩ରେ ରାଜତନ୍ତ୍ରର ପୁନଃପ୍ରତିଷ୍ଠା ସହିତ ପୁଣି ପୁରୁଣା ନାମ କାମ୍ବୋଡିଆ ଫେରିଥିଲା ।

୪. ମିଆଁମାର

ଭାରତର ପଡୋଷୀ ରାଷ୍ଟ୍ର ମିଆଁମାରର ପୁରୁଣା ନାମ ଥିଲା ବର୍ମା । ୧୯୮୯ରେ ସାମରିକ ପ୍ରଶାସନ ଏହାର ନାମ ବର୍ମାରୁ ମିଆଁମାର କରିଥିଲା । ମିଆଁମାରର ଅର୍ଥ ହେଉଛି ମୋ ଦେଶ । ଜାତିସଂଘ ନାମ ପରିବର୍ତ୍ତନକୁ ସ୍ୱିକୃତୀ ପ୍ରଦାନ କରିଛି କିନ୍ତୁ ଆମେରିକା ଓ ଇଂଲଣ୍ଡ ଭଳି ଦେଶ ଏବେ ମଧ୍ଯ ପୁରୁଣା ନାମ ବ୍ଯବହାର କରନ୍ତି ।

୫. ନେଦରଲ୍ଯାଣ୍ଡ୍

୨୦୨୦ରେ ହଲାଣ୍ଡର ନେଦରଲାଣ୍ଡରେ ବିଲୟ ସହିତ ନାମ ବଦଳି ହୋଇଥିଲା ନେଦରଲ୍ଯାଣ୍ଡ୍ । ଏହା ଦୁଇଟି ଭାଗକୁ ନେଇ ଗଠିତ । ଗୋଟିଏ ହେଉଛି ଦକ୍ଷୀଣ ହଲାଣ୍ଡ ଓ ଅନ୍ୟଟି ହେଉଛି ଉତ୍ତର ହଲାଣ୍ଡ୍ । ନାମ ପରିବର୍ତ୍ତନ ପଛରେ ମୁଖ୍ଯ କାରଣ ଥିଲା ମାର୍କେଟିଂ । ଅଧିକ ପର୍ଯ୍ଯଟକଙ୍କୁ ନିଜ ଦେଶକୁ ଆକୃଷ୍ଟ କରିବାକୁ ହଲାଣ୍ଡ ନିଜ ନାମ ବଦଳାଇ ଥିଲା । କେବଳ ଏତିକି ନୁହେଁ ଏହାର ଫୁଟବଲ ଟିମର ମଧ୍ଯ ନାମ ପରିବର୍ତ୍ତନ ହୋଇଛି ।

୬. ଆର୍ୟଲାଣ୍ଡ୍

୧୯୩୭ ମସିହାରେ ଆଇରିସ୍ ଫ୍ରିଷ୍ଟେଟ୍ ନିଜ ନାମ ବଦଳାଇ ଆର୍ୟଲାଣ୍ଡ୍ କରିଥିଲା ।ଇଂଲଣ୍ଡ ସହିତ ନିଜର ସବୁ ସମ୍ପର୍କକୁ ବିଛିନ୍ନ କରିବାକୁ ଏହି ଦେଶ ଏମିତି କରିଥିଲା । ନାମ ପରିବର୍ତ୍ତନ ପୂର୍ବରୁ ଦୁଇ ଦେଶ ମଧ୍ଯରେ ଦୁଇ ବର୍ଷ ପାଇଁ ଯୁଦ୍ଧ ହୋଇଥିଲା ।

୭. ଶ୍ରୀଲଙ୍କା

ପଂଚଦଶ ଶତାବ୍ଦୀରେ ଡଚ୍ ମାନେ ଶ୍ରୀଲଙ୍କା ସହିତ ବ୍ଯବସାୟ ଆରମ୍ଭ କରିଥିଲେ । ସେମାନେ ଏହାକୁ ‘ସେଇଲୋନ୍’ ବୋଲି ନାମିତ କରିଥିଲେ । ଉନଂବିଶ ଶତାବ୍ଦୀରେ ଶ୍ରୀଲଙ୍କା ବ୍ରିଟିଶ ଅଧିନକୁ ଆସିଥିଲା । ବ୍ରିଟେନ ଏହାର ନାମ ପରିବର୍ତ୍ତନ କରି ସିଲୋନ୍ କରିଥିଲା । ତେବେ ସ୍ୱାଧୀନ ହେବା ପରେ ଦେଶର ନାମ ସିଲୋନରୁ ଶ୍ରୀଲଙ୍କା ଭାବେ ପରିବର୍ତ୍ତିତ ହୋଇଥିଲା । ୨୦୧୧ରେ ଶ୍ରୀଲଙ୍କା ସରକାର ବିଭିନ୍ନ ଅଫିସ୍ ଓ କମ୍ପାନୀର ନାମରେ ଥିବା ସିଲୋନ୍ ଶବ୍ଦକୁ ହଟାଇ ଦେଇଥିଲେ ।

୮. ଜିମ୍ୱାୱେ

ଜିମ୍ବାୱେର ପୁରୁଣା ଔପନିବେସିକ ନାମ ଥିଲା ରୋଡେସିଆ । ବ୍ରିଟିଶ ଅଧିନରେ ଏହାର ନାମ ରୋଡେସିଆ ଥିଲା । ତେବେ ୧୯୮୦ରେ ସ୍ୱାଧୀନ ହେବା ପରେ ରୋଡେସିଆ ନିଜର ନାମ ବଦଳାଇ ଜିମ୍ବାୱେ କରିଥିଲା ।