କଂଗ୍ରେସର ଅସ୍ଥିତ୍ୱ ପାଇଁ ଏହା ହେଉଛି ସବୁଠାରୁ ଆହ୍ୱାନମୁଳକ ସମୟ । ଦଳରୁ ନେତାଙ୍କ ପଳାୟନ ଥମିବାର ନାଁ ନେଉନାହିଁ । ଦଳଛାଡି ନେତା ଏମିତି ପଳାୟନ କରୁଛନ୍ତି ଯେମିତି ଡୁବୁଥିବା ଜାହାଜରୁ ମୁଷା ପଳାୟନ କରନ୍ତି । ଛୋଟମୋଟ ନେତା ଦଳ ଛାଡିବା ଅଲଗା କଥା କିନ୍ତୁ କଂଗ୍ରେସ ପାଇଁ ସମସ୍ୟା ହେଉଛି ଏହାର ବଡ଼ବଡ଼ ନେତା ଦଳ ଛାଡୁଛନ୍ତି । ପୁଣି ଏମିତି ନେତା ଦଳ ଛାଡୁଛନ୍ତି ଯେଉଁମାନେ କଂଗ୍ରେସର ପିଏମ୍ ଇନ୍ ୱେଟିଂ ରାହୁଲଙ୍କ କୋର୍ ଟିମ୍ ସଦସ୍ୟ । ଉତ୍ତର ପ୍ରଦେଶ ନିର୍ବାଚନ ପୂର୍ବରୁ ମଙ୍ଗଳବାର ଦିନ ଆରପିଏନ୍ ସିଂ ହାତ ଛାଡି ପଦ୍ମ ଧରିଛନ୍ତି । ଆରପିଏନ୍ ଏକଦା ରାହୁଲଙ୍କ ଖାସ୍ ଟିମର ସଦସ୍ୟ ଥିଲେ । ଆରପିଏନଙ୍କ ଭଳି ନେତା କଂଗ୍ରେସ ଛାଡିବା କେବଳ ଦଳ ପାଇଁ ମୁଣ୍ଡବିନ୍ଧାର କାରଣ ନୁହେଁ ଏହା ମଧ୍ୟ ରାହୁଲଙ୍କ ବିଶ୍ୱସନୀୟତାକୁ ନେଇ ପ୍ରଶ୍ନ ଉଠାଉଛି । ରାହୁଲଙ୍କୁ କଂଗ୍ରେସ ଆଗାମୀ ପ୍ରଧାନମନ୍ତ୍ରୀ ଭାବେ ପେସ୍ କରୁଥିବା ବେଳେ ଖୋଦ ତାଙ୍କରି କୋର୍ ଟିମ୍ ସଦସ୍ୟ ଯେମିତି ଦଳ ଛାଡୁଛନ୍ତି ସେଥିରୁ ଲାଗୁଛି କୋର୍ ଟିମ୍ ମଧ୍ୟ ରାହୁଲଙ୍କ ଭିତରେ ପିଏମ୍ ମେଟେରିଆଲ ଦେଖୁନାହିଁ ।
ତେବେ ଏହା ଦିନକର କଥା ନୁହେଁ । ୨୦୧୪ ପରଠାରୁ ରାହୁଲଙ୍କ କୋର୍ ଟିମ୍ ଧିରେ ଧିରେ ଖଣ୍ଡିତ ହେବାରେ ଲାଗିଛି । ଆସନ୍ତୁ ନଜର ପକାଇବା କେମିତି ରାହୁଲଙ୍କ କୋର୍ ଟିମ୍ ଧିରେ ଧିରେ ଭାଙ୍ଗିବାରେ ଲାଗିଛି ।
ଏବଂ ଏମିତି ଭାଙ୍ଗିବାରେ ଲାଗିଛି ରାହୁଲଙ୍କ କୋର୍ ଟିମ୍
ରାହୁଲ କଂଗ୍ରେସ ଅଧ୍ୟକ୍ଷ ହେବା ପରେ ଯୁବ ନେତାଙ୍କୁ ନେଇ ସେ ଗୋଟିଏ କୋର ଟିମ୍ ଗଠନ କରିଥିଲେ । ଆରପିଏନ୍ ରାହୁଲଙ୍କ ନିକଟତରଙ୍କ ମଧ୍ୟରେ ଅନ୍ୟତମ ଥିଲେ । ସେ ଟିମ୍ ରାହୁଲର ସବୁଠାରୁ ଗୁରୁତ୍ୱପୂର୍ଣ୍ଣ ଚେହେରା ଥିଲେ । ଟିମ୍ ରାହୁଲର ସଦସ୍ୟ ଥିଲାବ ଜ୍ୟୋତିରାଦିତ୍ୟ ସିନ୍ଧିଆ ଓ ଜିତିନ୍ ପ୍ରସାଦ ଆଗରୁ ବିଜେପି ହାତ ଧରି ସାରିଛନ୍ତି । କୁହାଯାଉଛି ଯେ, ଆରପିଏନଙ୍କୁ ବିଜେପିକୁ ଟାଣିବାରେ ସିନ୍ଧିଆଙ୍କ ଭୂମିକା ମହତ୍ୱପୂର୍ଣ୍ଣ ଥିଲା । ଟିମ୍ ରାହୁଲର ୫ ମହତ୍ୱପୂର୍ଣ୍ଣ ସଦସ୍ୟଙ୍କ ମଧ୍ୟରୁ ତିନି ଜଣ ଏବେ ବିଜେପିରେ । ଯେଉଁ ଗତିରେ କଂଗ୍ରେସ ନେତା ବିଶେଷକରି ରାହୁଲଙ୍କ ଖାସ୍ ବିଜେପି ଯାଉଛନ୍ତି ଲାଗୁଛି ଖୁବ କମ ଦିନ ଭିତରେ ରାହୁଲଙ୍କୁ ନୂଆ କୋର ଟିମ୍ ଖୋଜିବାକୁ ପଡିବ । ଏହା ସହିତ ଏହାର ମଧ୍ୟ ଗ୍ୟାରେଣ୍ଟି ନାହିଁ ଯେ, ନୂଆ କୋର୍ ଟିମ୍ ମେମ୍ବର ପୁରୁଣାଙ୍କ ଭଳି ଦଳ ଛାଡି ବିଜେପିକୁ ପଳାୟନ କରିବେ ନାହିଁ ।
୭ ବର୍ଷ ଭିତରେ ଏମିତି ଫମ୍ପା ହେଲାଣି କଂଗ୍ରେସ
ଜିତିନ୍ ପ୍ରସାଦ, ଜ୍ୟୋତିରାଦିତ୍ୟ, କ୍ୟାପ୍ଟେନ୍ ଅମରିନ୍ଦର ସିଂହ, ହିମନ୍ତ ବିଶ୍ୱଶର୍ମା । ଏହା କିଛି ବଡ଼ ନାଁ ଭିତରୁ ଗୋଟିଏ ଗୋଟିଏ । ଏହି ସବୁ ନେତା କଂଗ୍ରେସ ଗଲା ୭ ବର୍ଷ ମଧ୍ୟରେ କଂଗ୍ରେସ ଛାଡିଛନ୍ତି । ଆଉ ପ୍ରାୟ ସମସ୍ତେ ଏଥିପାଇଁ କଂଗ୍ରେସର ଫାଷ୍ଟ୍ ଫ୍ୟାମିଲିକୁ ଦାୟି କରିଛନ୍ତି । ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମାଙ୍କୁ ନିଅନ୍ତୁ । ହିମନ୍ତ କଂଗ୍ରେସ ଛାଡିବା ପରେ ବିଜେପିର ଉତ୍ତର ପୂର୍ବ ଭାରତ ଅପରେସନ୍ ବୁଝିଥିଲେ । ପରେ ଆସାମ ମୁଖ୍ୟମନ୍ତ୍ରୀ ହେଲେ । ହିମନ୍ତ ସମ୍ଭବତଃ ଏଭଳି ପ୍ରଥମ ନେତା ଯିଏ ସଂଘ ସହିତ କୌଣସି ସମ୍ପର୍କ ନଥାଇ ବି କେବଳ ନିଜ ରାଜନୈତିକ ଦମରେ ବିଜେପିରେ ମୁଖ୍ୟମନ୍ତ୍ରୀ ହୋଇ ପାରିଛନ୍ତି । କିନ୍ତୁ ସେହି ହିମନ୍ତ କଂଗ୍ରେସ ଛାଡିବା ବେଳେ ରାହୁଲଙ୍କୁ ଟାର୍ଗେଟ୍ କରି କହିଥିଲେ ଯେ, ରାହୁଲଙ୍କ ପାଇଁ ଦଳର ନେତାଙ୍କ ଅପେକ୍ଷ ତାଙ୍କ ପୋଷା କୁକୁର ଅଧିକ ଗୁରୁତ୍ୱ ରଖନ୍ତି । ଏବେ ଆସାମରେ କଂଗ୍ରେସ ରାସ୍ତା ଖୋଜୁଛି ।
ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ-ଏଡିଆର ରିପୋର୍ଟ ଅନୁସାରେ ୨୦୧୪ ପରଠାରୁ କଂଗ୍ରେସ ହିଁ ଅଧିକ ନେତା ହରାଇଛି । ଲାଭରେ ଅଛି ବିଜେପି । ୨୦୧୪ରୁ ୨୧ ଭିତରେ କଂଗ୍ରେସର ୨୨୪ ନିର୍ବାଚନୀ ପ୍ରାର୍ଥୀ ଦଳ ବଦଳାଇଛନ୍ତି । ଏହି ସମୟରେ ୧୭୭ ଜଣ ସାଂସଦ ଓ ବିଧାୟକ ଦଳ ଛାଡିଛନ୍ତି । ଅର୍ଥାତ ଗତ ୭ ବର୍ଷ ଭିତରେ କଂଗ୍ରେସ ୩୯୯ ନେତାଙ୍କୁ ହରାଇଛି । ଅନ୍ୟପକ୍ଷରେ ୨୦୧୪-୨୧ ମଧ୍ୟରେ ୧୭୩ ସାଂସଦ ଓ ବିଧାୟକ ବିଜେପିରେ ସାମିଲ ହୋଇଛନ୍ତି । ମୋଟ ୨୫୩ ଜଣ ପ୍ରାର୍ଥୀ ବିଜେପିକୁ ଆସିଛନ୍ତି ।
