ଖବର କାଗଜ ହକରଙ୍କୁ ମିଳିବ ସାମାଜିକ ସୁରକ୍ଷା, ଆଲୋଚନାର ଗୋଟିଏ ଦିନ ପରେ ଉପହାର

ଖବର କାଗଜ ହକରଙ୍କୁ ଓଡ଼ିଶା ସରକାର ସାମାଜିକ ସୁରକ୍ଷା ପ୍ରଦାନ କରିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଙ୍ଗଳବାର ଦିନ ଏନେଇ ଯେଉଁ ଘୋଷଣ କରିଛନ୍ତି ତାହା ହୁଏତ ପୁରା ଦେଶରେ ପ୍ରଥମ । ଖବର କାଗଜକୁ ଲୋକଙ୍କ ପାଖରେ ପହଂଚାଇବାରେ ପ୍ରମ୍ମୁଖ ଭୂମିକା ଗ୍ରହଣ କରିଥାନ୍ତି ହକର । ଖରା, ବର୍ଷା, ବାତ୍ୟା ହେଉ କି ବନ୍ୟା ହକର ସବୁବେଳ ଖବର କାଗଜ ଲୋକଙ୍କ ପାଖରେ ପଂହଚାଇଥାନ୍ତି । ବର୍ଷକ ୩୬୫ ଦିନ । ବିନା ହକରରେ ଖବର କାଗଜ ଶିଳ୍ପ ନଥାନ୍ତା । କିନ୍ତୁ ସେହି ହକରଙ୍କ ସାମାଜିକ ସୁରକ୍ଷା ନେଇ ସମ୍ଭବତଃ କୌଣସି ସରକାର ଚିନ୍ତା କରିନଥିଲେ । ଗଣତନ୍ତ୍ରର ଚତୁର୍ଥ ସ୍ତମ୍ବ କୁହାଯାଉଥିବା ଖବର କାଗଜର କଳ୍ପନା ହକରଙ୍କ ବିନା ଅସମ୍ଭବ । ସେହି ହକରଙ୍କୁ ସାମାଜିକ ସୁରକ୍ଷା ଦେବାକୁ ଚିନ୍ତା କରିଛନ୍ତି ନବୀନ ପଟ୍ଟନାୟକ ।

ଦିନକ ତଳେ ଆଲୋଚନା, ଦିନକ ପରେ ଘୋଷଣା

ଖବର କାଗଜ ହକରଙ୍କ ସ୍ୱାର୍ଥ ଓ ସୁରକ୍ଷାକୁ ନେଇ ନବୀନ ସରକାର କେତେ ଚିନ୍ତିତ ତାହା ଏହି ଗୋଟିଏ ଘଟଣାରୁ ଜଣା ପଡେ ଯେ, ଦିନକ ତଳେ ସୋମବାର ଦିନ ହକର ସଂଘର କର୍ମକର୍ତ୍ତା ୫ ଟି ସଚିବ ଭି.ପାଣ୍ଡିଆନଙ୍କୁ ଭେଟି ନିଜ ଦାବି ବାବଦରେ ଜଣାଇଥିଲେ । ସେତେବେଳେ ୫-ଟି ସଚିବ ଖୁବଶୀଘ୍ର ସେମାନଙ୍କ ଦାବି ଉପରେ ବିଚାର କରାଯିବ ବୋଲି ଆଶ୍ୱାସନା ଦେଇଥିଲେ । ଆଉ ଆଲୋଚନାର ୨୪ ଘଣ୍ଟା ଭିତରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ହକରଙ୍କ ସାମାଜିକ ସୁରକ୍ଷା ନେଇ ଘୋଷଣା କରାଯାଇଥିଲା । ଯାହାକୁ ଇଂରାଜୀରେ ‘ପ୍ରୋ-ଆକ୍ଟିଭ୍’ ସରକାର ବୋଲି କୁହାଯାଏ ତା’ର ଉଦାହରଣ ହେଉଛି ଏଭଳି ଘୋଷଣା ।

ସମ୍ଭବତଃ ଏହା ପ୍ରଥମ

ହକରଙ୍କୁ ସାମାଜିକ ସୁରକ୍ଷା ପ୍ରଦାନ କରିବାରେ ଓଡ଼ିଶା ସମ୍ଭବତଃ ପ୍ରଥମ ରାଜ୍ୟ । ବିଦେଶରେ ହକରଙ୍କ ସ୍ୱାର୍ଥ ପାଇଁ ଅନେକ ଆନ୍ଦୋଳନ ହୋଇଛି । ଉଦାହରଣ ଭାବେ ବିଂଶ ଶତାବ୍ଦୀର ଆରମ୍ଭରେ ଆମେରିକାରେ ଖବର କାଗଜ ପକାଉଥିବା ଶିଶୁ ମାନେ ବଡ଼ ଧରଣର ଆନ୍ଦୋଳନ କରିଥିଲେ । ସେମାନଙ୍କ ଲଢେଇ ଥିଲା ଆମେରିକାର ବଡ଼ ଖବର କାଗଜଙ୍କ ଏକାଧିପତ୍ୟ ଓ ଶ୍ରମିକ ସ୍ୱାର୍ଥ ବିରୋଧୀ କାର୍ଯ୍ୟ ବିରୋଧରେ । ଏହି ଶିଶୁ ଖବର କାଗଜ ହକର ମାନଙ୍କ ଦାବି ଥିଲା ସେମାନଙ୍କୁ ପ୍ରତି ଖବର କାଗଜ ପିଛା ଅଧିକ କମିଶନ ଦିଆ ଯାଉ । ଆମେରିକାର ଦୁଇଟି ବଡ଼ ଖବର କାଗଜ ମାଲିକ ସେମାନଙ୍କ ଦାବିକୁ ଗ୍ରହଣ କରିନଥିଲେ । ପିଲାଙ୍କ ଆନ୍ଦୋଳନ ଭାବି ଏହାକୁ ଗୁରୁତ୍ୱ ଦେଇନଥିଲେ । କିନ୍ତୁ କେଇ ଦିନ ମଧ୍ୟରେ ସେମାନଙ୍କୁ ହକରଙ୍କ ଆଗରେ ମୁଣ୍ଡ ନୁଆଁଇବାକୁ ପଡିଥିଲା । ଶିଶୁ ହକରଙ୍କ ଦାବି ପୁରଣ କରିବାକୁ ପଡିଥିଲା । କିନ୍ତୁ ଓଡ଼ିଶାରେ ସମ୍ବାଦପତ୍ର ହକରଙ୍କୁ ସେଭଳି କୌଣସି ଆନ୍ଦୋଲନ କରିବାକୁ ପଡିନାହିଁ । ଗୋଟିଏ ଦିନରେ ହିଁ ସେମାନଙ୍କ ଦାବି ପୁରଣ ହୋଇଛି ।

ସାମାଜିକ ସୁରକ୍ଷା ଭାବେ କ’ଣ ମିଳିବ ?

• ଦୁର୍ଘଟଣା ଜନିତ ମୃତ୍ୟୁ ହେଲେ ୨ ଲକ୍ଷ ଟଙ୍କାର ସହାୟତା
• ସ୍ବାଭାବିକ ମୃତ୍ୟୁ କ୍ଷେତ୍ରରେ ୧ ଲକ୍ଷ ଟଙ୍କାର ସହାୟତା
• ଦୁର୍ଘଟଣାରେ ସଂପୂର୍ଣ୍ଣ ଅକ୍ଷମଙ୍କୁ ମିଳିବ ଦେଢ ଲକ୍ଷ ଟଙ୍କା
• ଆଂଶିକ ଅକ୍ଷମତା କ୍ଷେତ୍ରରେ ଉଭୟ ଅଙ୍ଗ ହରାଇଥିଲେ ମିଳିବ ୮୦ ହଜାର
• ଗୋଟିଏ ଅଙ୍ଗ ହରାଇଥିଲେ ମିଳିବ ୪୦ ହଜାର ଟଙ୍କାର ସହାୟତା
• ପଞ୍ଜୀକୃତ ହକର୍ଙ୍କୁ ଦୁଇଟି ପର୍ଯ୍ୟାୟରେ ୩୦୦୦ ଟଙ୍କାର ସ୍ବତନ୍ତ୍ର ସହାୟତା
• କାମ କରିବା ପାଇଁ ନିମାର୍ଣ ହେବ ୱାର୍କସେଡ୍
• ସୂଚନା ଓ ଲୋକସଂପର୍କ ବିଭାଗ ପ୍ରସ୍ତୁତ କରିବ ଡାଟାବେସ୍
• ସମସ୍ତଙ୍କୁ ମିଳିବ ପରିଚୟ ପତ୍ର