ଭୁବନେଶ୍ୱର: ସେପଟେ ଡିଲ୍ ଆଗେଇଛି, ଏପଟେ ନିଜେ ମାଇଣ୍ଡ୍ ବି ମେକଅପ୍ କରିସାରିଲେଣି । ଯୁଆଡ଼େ ଯାଉଛନ୍ତି ଅନୁଗାମୀ ଓ ପ୍ରଶଂସକଙ୍କୁ ସଂକେତ ବି ଦେଲେଣି ଯେ ଏଥର କଂଗ୍ରେସ ଫେରିବା । ସୂତ୍ର କହୁଛି, ସମ୍ବାଦର ପୂର୍ବତନ ସଂପାଦକ ତଥା ଖଣ୍ଡପଡ଼ା ବିଧାୟକ ସୌମ୍ୟରଂଜନ ପଟ୍ଟନାୟକ ତାଙ୍କ ପୁରୁଣା ଘର କଂଗ୍ରେସକୁ ଫେରିବା ପାଇଁ ସଜବାଜ ହେଲେଣି । ଏହି ସଜବାଜ ଭିତରେ ଖଣ୍ଡପଡ଼ା ଛାଡ଼ି ତାଙ୍କ ସ୍ୱର୍ଗୀୟ ଶ୍ୱଶୂରଙ୍କ ପ୍ରଭାବ ଥିବା ବୋଲଗଡ଼ ବେଗୁନିଆରୁ ବିଧାନସଭାକୁ ଲଢ଼ିବାକୁ ଭିତିରି ପ୍ରସ୍ତୁତି ବି ଆରମ୍ଭ କଲେଣି । ସୂତ୍ରର କହିବା ଆନୁସାରେ, ବିଜେଡିରୁ ବହିଷ୍କାର ହେବା ପରେ ସମ୍ବାଦ ସଂପାଦକ ଓ ଇଷ୍ଟର୍ଣ୍ଣ ମିଡିଆ ଅଧ୍ୟକ୍ଷ ପଦରୁ ଅବ୍ୟାହତି ନେଇଥିବା ବାବୁ ସୌମ୍ୟ ରଂଜନ ଆଗ ବିଜେପିର ନିକଟତର ହେବାକୁ ଉଦ୍ୟମ କରି ଫେଲ ମାରିଥିଲେ୍ । ଏପରିକି ସେ ଜଣେ ଅଭିଯୁକ୍ତ ହୋଇ ସାରିଥିବାରୁ ବିଜେପିର ହେଭିୱେଟ୍ କେନ୍ଦ୍ର ମନ୍ତ୍ରୀମାନେ ତାଙ୍କ ସହ ମଞ୍ଚରେ ଚେୟାର୍ ସେଆର୍ କରିବାକୁ ରୋକଠୋକ୍ ମନା କରିଦେଇଥିବା ବି କିଛି ମାସ ତଳେ ଚର୍ଚ୍ଚା ବି ଚାଲିଥିଲା ।
କିନ୍ତୁ ହାତ ପାର୍ଟିର ନଗଦ ନିର୍ବାଚନୀ ପ୍ରଦର୍ଶନକୁ ନେଇ ରହିଛି ଶଙ୍କା ଓ ଦ୍ୱନ୍ଦ୍ୱ
ଏହା ପରେ ହଠାତ୍ ଆମ ଘର କି ତାଙ୍କ ଘର ହାଲଚାଲ କଥା ନକହି କିଛି ଦିନ ପାଇଁ ପୂରା ନିରବୀ ଯାଇଥିଲେ ସମ୍ବାଦର ଏହି ପୂର୍ବତନ ସଂପାଦକ ତଥା ପ୍ରତିଷ୍ଠାତା । କିନ୍ତୁ ତାଙ୍କ ଭଳି ଜଣେ ସଦା ଚଞ୍ଚଳ ଓ ଏକଦମ୍ ଅସ୍ଥିର ବ୍ୟକ୍ତିତ୍ୱଙ୍କ ପାଇଁ ଏପରି ନିରବତାକୁ ବେଶୀ ଦିନ ଯାଏ ସମ୍ଭାଳିବା ମୁସ୍କିଲ ହୋଇ ପଡ଼ିବାରୁ ଏବେ ପୁଣି ବହି ଉନ୍ମୋଚନ ଓ ସଭାସମିତିରେ ଭାଷଣବାଜି କାମ ଅଳ୍ପ ବହୁତେ ଆରମ୍ଭ ହୋଇଛି । କିଛିଦିନ ତଳେ ନିଜ ନିର୍ବାଚନ ମଣ୍ଡଳୀ ଖଣ୍ଡପଡ଼ାକୁ ମଧ୍ୟ ସୌମ୍ୟ ବାବୁ ଅଚାନକ ଗସ୍ତରେ ଯାଇ କିଛି ଅନୁଗାମୀଙ୍କୁ ଭେଟି କଂଗ୍ରେସ ଫେରିବାର ସଂକେତ ଦେଇଥିଲେ । ଏହି ସଂକେତ ଦିଆନିଆବେଳେ ହାତ ପାର୍ଟିକୁ ଫେରିବା ପାଇଁ କୁଆଡ଼େ ଚାରି ନିର୍ବାଚନ ଫଳାଫଳକୁ ସେ ଅପେକ୍ଷା କରିଥିବା କଥା ବି କହିଥିଲେ । ଏବେ ହିନ୍ଦୀ ହାର୍ଟଲ୍ୟାଣ୍ଡର ତିନି ରାଜ୍ୟରେ ହାତ ପାର୍ଟି ମାଟି କାମୁଡ଼ିବା ପରେ ସୌମ୍ୟଙ୍କୁ କିଛିଟା ଦ୍ୱନ୍ଦ୍ୱ, ଆଶଙ୍କା, କିନ୍ତୁ ଓ ତଥାପି ଚିନ୍ତା ଘାରିଛି ।
ପାର୍ଟି ଭିତରେ ପଟ୍ଟନାୟକ ପରିବାର ଲିଗାସୀର ଧରିବେ ମଙ୍ଗ !
ତେବେ ସୂତ୍ର କହିବା ଅନୁସାରେ, କଂଗ୍ରେସକୁ ସୌମ୍ୟରଂଜନଙ୍କ ଲେଉଟାଣି ପ୍ରସଙ୍ଗ ଦଳ ହାଇକମାଣ୍ଡଙ୍କ ଚୂଡ଼ାନ୍ତ ମୋହରକୁ ଅପେକ୍ଷା କରି ରହିଛି । କୁହାଯାଉଛି, ରାଜ୍ୟ ହାତ ପାର୍ଟିରେ ପୂର୍ବତନ ମୁଖ୍ୟମନ୍ତ୍ରୀ ସ୍ୱର୍ଗତଃ ଜାନକୀବଲ୍ଲଭ ପଟ୍ଟନାୟକଙ୍କ ଥିବା ଅଂଶଧନ ଓ ସାଂଗଠନିକ ଭିତ୍ତିଭୂମି ତଥା ନିଜସ୍ୱ ଭୋଟ୍ ଏବଂ ପଟ୍ଟନାୟକ ପରିବାର ଲିଗାସୀର ଉତ୍ତରଦାୟାଦ ଭାବେ ସୌମ୍ୟଙ୍କୁ ହାତ ଦଳ ପୁଣି ପାର୍ଟିକୁ ଫେରାଇ ଆଣିବ । ନିରଞ୍ଜନ ପଟ୍ଟନାୟକ ଅବସର ବୟସରେ ପହଞ୍ଚିଥିବାବେଳେ ତାଙ୍କ ପୁଅ ଦଳ ଭିତରେ ନିଜ ସ୍ଥାନ ସେମିତି ଦୃଢ଼ କରିନାହାନ୍ତି । ବଡ଼ କଥା ହେଉଛି, କଂଗ୍ରେସକୁ ବିଦା କରିବାରେ ପ୍ରମୁଖ ଭୂମିକା ନେଇଥିବା ଶ୍ରୀକାନ୍ତ ଜେନା ଏବେ ଦଳ ବାହାରେ ନିର୍ବାସିତ ଜୀବନ କାଟୁଥିବାବେଳେ ହାତ ପାର୍ଟିରେ ସୌମ୍ୟଙ୍କ ଆଉ ଜଣେ କଟ୍ଟର ବିରୋଧୀ ଲୁଲୁ ମହାପାତ୍ର ଆଉ ନାହାନ୍ତି । ଏଣୁ ସୌମ୍ୟ କଂଗ୍ରେସକୁ ଫେରିଲେ ଦଳ ଭିତରେ ତାଙ୍କୁ ସେମିତି ବିରୋଧର ଆଶଙ୍କା ନାହିଁ । ଖାଲି ଏତିକି ନୁହେଁ, ଜାନକୀ ପଟ୍ଟନାୟକଙ୍କ ପ୍ରଭାବ ରହିଥିବା ବୋଲଗଡ଼ ବେଗୁନିଆ ବିଧାନସଭା ଆସନଟି ସୌମ୍ୟ ନିଜ ପାଇଁ ସୁରକ୍ଷିତ ଆସନ ବୋଲି ଭାବି ପ୍ରସ୍ତୁତି ଆରମ୍ଭ କରିଥିବା କୁହାଯାଉଛି । କାରଣ ଖଣ୍ଡପଡ଼ାରୁ ପ୍ରାର୍ଥୀ ହେଲେ ତାଙ୍କର ଜିତିବା ଚାନ୍ସ ନାହିଁ ବୋଲି ସେ ନିଶ୍ଚିତ । କିନ୍ତୁ ବେଗୁନିଆରେ ସେ ନିଜେ ତିଆରି କରିଥିବା ନେତା ତାଙ୍କ ପାଇଁ କଣ୍ଟା ସାଜିବାର ସମ୍ଭାବନା ଅଧିକ । ସେ ଯାହା ହି ହେଉ, ସୌମ୍ୟ କଂଗ୍ରେସକୁ ଫେରିବା ପାଇଁ ଏବେ ଠିକଣା ବେଳକୁ ଅପେକ୍ଷା କରି ରହିଥିବା ତାଙ୍କ ସମର୍ଥକ ମହଲରେ ଚର୍ଚ୍ଚା ହେଉଥିବା ସୂତ୍ର କହୁଛି ।
