ମୁମ୍ବାଇ: ରିଲାଏନ୍ସ୍ ଇଣ୍ଡଷ୍ଟ୍ରିଜ୍’ର ଅଧ୍ୟକ୍ଷ ମୁକେଶ ଅମ୍ବାନିଙ୍କୁ ଦିଆଯାଇଛି ହତ୍ୟା ଧମକ । ଇ-ମେଲ୍ ମାଧ୍ୟମରେ ଏହି ହତ୍ୟା ଧମକ ମିଳିଛି । ୨୦ କୋଟି ଟଙ୍କା ଦିଅ, ନହେଲେ ହତ୍ୟା କରାଯିବ ବୋଲି ଜଣେ ଅଜ୍ଞାତ ବ୍ୟକ୍ତି ଏହି ଧମକ ଦେଇଛନ୍ତି । ଏହି ହତ୍ୟା ଧମକ ମିଳିବା ପରେ ମୁକେଶ ଅମ୍ବାନୀଙ୍କ ସୁରକ୍ଷା ବ୍ୟବସ୍ଥାକୁ ଆହୁରି ଅଧିକ କଡ଼ାକଡ଼ି କରି ଦିଆଯାଇଛି । ଏଥିଲାଗି ୫୫ ଜଣ ସୁରକ୍ଷାକର୍ମୀ ସଜାଗ ହୋଇ ଉଠିଛନ୍ତି ।
ମାସକୁ ଗଣନ୍ତି ମୋଟା ଅଙ୍କର ଟଙ୍କା
ମୁକେଶ ଅମ୍ବାନୀ, ସ୍ତ୍ରୀ ନୀତା ଅମ୍ବାନୀ, ପୁଅ ଅନନ୍ତ,ଆକାଶ ଏବଂ ବୋହୂମାନଙ୍କ ସହ ଆଣ୍ଟେଲିଆରେ ରୁହନ୍ତି । ମୁକେଶଙ୍କୁ ଜେଡ୍ ପ୍ଲସ୍ ସିକ୍ୟୁରିଟି ଦିଆଯାଇଛି । ଏହାର ଖର୍ଚ୍ଚ ସେ ନିଜେ ଉଠାନ୍ତି । ଏଥିରେ ୫୫ ସୁରକ୍ଷାକର୍ମୀଙ୍କ ଅଭେଦ୍ୟ ସୁରକ୍ଷା କବଚ ମୁକେଶଙ୍କୁ ମିଳିଛି । ସେମାନଙ୍କ ମଧ୍ୟରେ ୧୦ରୁ ଅଧିକ ଏନ୍ଏସଜି କମାଣ୍ଡୋ, ପୋଲିସ ଅଫିସର ସାମିଲ ଅଛନ୍ତି । ସେହିଭଳି ନୀତାଙ୍କୁ ମଧ୍ୟ ୱାଇ କାଟାଗୋରୀର ସୁରକ୍ଷା ମିଳୁଛି । ଉଭୟଙ୍କ ସୁରକ୍ଷାରେ ରେଞ୍ଜ ରୋଭର ଭଳି ଦାମୀ କାର ମଧ୍ୟ ରହିଛି । ଏଥିଲାଗି ମୁକେଶଙ୍କୁ ମାସକୁ ୧୫-୧୬ ଲକ୍ଷ ଟଙ୍କା ଖର୍ଚ୍ଚ ହେଉଛି ।
ପୋଲିସ କରୁଛି ତଦନ୍ତ
ଇ-ମେଲ୍ ମାଧ୍ୟମରେ ମୁକେଶଙ୍କୁ ହତ୍ୟା ଧମକ ମିଳିଛି । ମୁକେଶ ଅମ୍ବାନିଙ୍କ କମ୍ପାନିକୁ ଆସିଥିବା ଏହି ଇ-ମେଲ୍ରେ ଉଲ୍ଲେଖ ଅଛି ଯେ, ଆପଣ ଆମକୁ ୨୦ କୋଟି ଟଙ୍କା ନ ଦେଲେ, ଆମେ ଆପଣଙ୍କୁ ହତ୍ୟା କରିବୁ । ଆମ ପାଖରେ ଭାରତର ସର୍ବୋତ୍ତମ ଲକ୍ଷ୍ୟଭେଦୀ ଗୁଳି ଚାଳନାକାରୀ (ସୁର୍ଟ) ଅଛନ୍ତି । ମୁକେଶ ଅମ୍ବାନୀଙ୍କ ସୁରକ୍ଷା ଦାୟିତ୍ୱରେ ଥିବା କର୍ମଚାରୀଙ୍କ ଅଭିଯୋଗ ଆଧାରରେ ମୁମ୍ବାଇର ଗାମଦେବୀ ପୁଲିସ ‘ଆଇପିସି’ ଧାରା ୩୮୭ ଓ ୫୦୬ (୨) ଅନୁଯାୟୀ ଉକ୍ତ ଅଜ୍ଞାତ ବ୍ୟକ୍ତିଙ୍କ ନାମରେ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ।
ହତ୍ୟା ଧମକ ପ୍ରଥମ ନୁହେଁ
ହତ୍ୟା ଧମକ ପାଇବା ମୁକେଶଙ୍କ ପାଇଁ ଏହା ପ୍ରଥମ ଘଟଣା ନୁହେଁ । ଗତବର୍ଷ ମୁକେଶ ଅମ୍ବାନୀ ଓ ତାଙ୍କ ପରିବାରବର୍ଗଙ୍କୁ ଫୋନ୍ ଯୋଗେ ହତ୍ୟା ଧମକ ଦିଆଯାଇଥିଲା । ଏହି ଘଟଣାରେ ବିହାରର ଦରଭଙ୍ଗା ଅଞ୍ଚଳର ଜଣେ ବ୍ୟକ୍ତିଙ୍କୁ ଗିରଫ କରାଯାଇଥିଲା । ଅଭିଯୁକ୍ତ ଜଣକ ଥିଲେ ରାକେଶ କୁମାର ମିଶ୍ରା ନାମରେ ଜଣେ ବେକାର ବ୍ୟକ୍ତି । ସେ ମୁକେଶଙ୍କ ପରିବାରବର୍ଗ ଓ ମୁମ୍ବାଇରେ ଥିବା ‘ସାର ଏଚ୍ଏନ୍ ରିଲାଏନ୍ସ୍ ଫାଉଣ୍ଡେସନ୍ ହସ୍ପିଟାଲ୍’କୁ ବୋମା ପକାଇ ଧ୍ୱଂସ କରିଦେବେ ବୋଲି ଧମକାଇ ଥିଲେ । ସେହିପରି, ୨୦୨୧ରେ ଦକ୍ଷିଣ ମୁମ୍ବାଇ ଅନ୍ତର୍ଗତ ମୁକେଶଙ୍କ ବାସଭବନ ‘ଆଣ୍ଟିଲିଆ’ ବାହାରେ ୨୦ଟି ବିସ୍ଫୋରକ ‘ଜେଲାଟିନ୍ ଷ୍ଟିକ୍’ ଥିବା ଗୋଟାଏ ସ୍କର୍ପିଓ କାରରୁ ମଧ୍ୟ ଏକ ଧମକ-ପତ୍ର ଉଦ୍ଧାର କରାଯାଇଥିଲା । ସେଥିରେ ଲେଖାଯାଇଥିଲା: ଏ ହେଉଛି କେବଳ ‘ଟ୍ରେଲର ।
