ସେ ସିଗାରେଟ୍ ଉପରେ ସିଗାରେଟ୍ ଟାଣି ଚାଲିଥିଲା । ମଦନିଶାର ମଦହୋସ ସେହି ସୈତାନ ଜଣେ ଜୀବନ୍ତ ବ୍ୟକ୍ତି ଉପରେ ପରିଶ୍ରା କରୁଥିଲା । ସ୍ୱାଧିନତାର 75 ବର୍ଷ ପରେ ଏଭଳି ଚିତ୍ର ସେହି ରାଜ୍ୟରୁ ଆସୁଛି ଯେଉଁ ରାଜ୍ୟରେ ବିଜେପିର ସରକାର ଅଛି । ଆଉ ଯିଏ କାଳେ ଚିତ୍ର ଓ ଚରିତ୍ର ଉପରେ ବିଶ୍ୱାସ କରେ । ଏହେ ଏହି ଚିତ୍ରକୁ ଦେଖି କେବଳ ଗୋଟିଏ ପ୍ରଶ୍ନ ମନକୁ ଆସୁଛି ବିଜେପିର ବୁଲଡୋଜର ଏହି ସୈତାନର ଘରମୁହାଁ ହେବ କି ?
ଇଏ ନେତା ନୁହେଁ ସୈତାନ
ମଧ୍ୟପ୍ରଦେଶର ସିଧିରେ ଜଣେ ଆଦିବାସୀ ଯୁବକଙ୍କ ଉପରେ ପରିସ୍ରା କରିବାର ଏହି ଚିତ୍ର ଏବେ ଦେଶକୁ ଦୋହଲାଇ ଦେଇଛି । ଦେଶର ଅନ୍ତରଆତ୍ମାକୁ ଦୋହଲାଇ ଦେଇଥିବା କାଣ୍ଡ କରିଥିବା ବ୍ୟକ୍ତି ଜଣକ ହେଉଛନ୍ତି ଜଣେ ସ୍ଥାନୀୟ ବିଜେପି ନେତା । ରାଜ୍ୟରେ ସରକାର ନିଜ ଦଳର ତେଣୁ ମଦନିଶାରେ ବାବୁ ଜଣେ ଆଦିବାସୀ ଯୁବକଙ୍କ ଉପରେ ମୁତିଦେଲେ । ଏହି କାଣ୍ଡ କରିଥିବା ବ୍ୟକ୍ତିର ନାମ ହେଉଛି ପ୍ରବେଶ ଶୁକ୍ଲା । ବିଜେପି ବିଧାଯକ କେଦାରନାଥ ଶୁକ୍ଲାଙ୍କ ପ୍ରତିନିଧି । ବିଧାୟକ ଯେତେବେଳେ ନିଜ ଦଳର ସେତେବେଳେ ଡର କାହାକୁ ? ତେଣୁ ପ୍ରବେଶ ଶୁକ୍ଲା ମଣିଶ ଉପରେ ପରିସ୍ରା କରିବାକୁ ପଛାଇଲେ ନାହିଁ ।
ମାମଙ୍କ ବୁଲଡୋଜର ପ୍ରବେଶର ଘରେ ପ୍ରବେଶ କରିବ ତ ?
ବିଜେପି ଶାସିତ ରାଜ୍ୟରେ ଏବେ ବୁଲଡୋଜର ଫୁଲ ସ୍ପିଡରେ ବୁଲୁଛି । କେଉଁଠି କିଛି ହେଲେ ଅଦାଲତ ରାଯ ଦେବା ଆଗରୁ ବୁଲଡୋଜର ଅଭିଯୁକ୍ତଙ୍କ ଘର ଆଗର ପହଂଚି ଯାଉଛି । ଘର ଭାଙ୍ଗୁଛି । ସିଦ୍ଧି ମୁତ୍ର କାଣ୍ଡ ପରେ ଏବେ ବିଜେପି ବୁଲଡୋଜରକୁ ଲୋକ ସୋସିଆଲ ମିଡିଆରେ ଖୋଜୁଛନ୍ତି । ମଧ୍ୟପ୍ରଦେଶର ମାମା ଓରଫ ଶିବରାଜ ଚୌହାନଙ୍କ ବୁଲଡୋଜର କେଉଁ ରାସ୍ତା ଦେଇ ପ୍ରବେଶଙ୍କ ଘର ଆଡକୁ ଯାଉଛି କିମ୍ବା ଯିବ ବୋଲି ଲୋକ ପଚାରୁଛନ୍ତି ।
ବିଜେପି ନେତାଙ୍କ ମୁହଁ ସିଲ୍
ଏଣେ ବିଜେପି ନେତା କିନ୍ତୁ ଏହି ପ୍ରସଙ୍ଗକୁ ନେଇ ମୁହଁରେ ତୁଣ୍ଡି ଭିଡ଼ିଛନ୍ତି । ପ୍ରବେଶର ଘର ଉପରେ ବୁଲଡୋଜର ଚଢିବ କି ନାହିଁ ପ୍ରଶ୍ନର ଉତ୍ତରରେ ବିଧାୟକ କେଦାରନାଥ ଶୁକ୍ଲା କହୁଛନ୍ତି ସିଏ ଆଗରୁ ମୋର ପ୍ରତିନିଧି ଥିଲା । ଏବେ ନାହିଁ । ଅଭିଯୁକ୍ତଙ୍କ ବିରୋଧରେ ଏନଏସଏ ଲାଗୁ କରାଯିବ । କିନ୍ତୁ ବୁଲଡୋଜର କଥା ଉଠିବାରୁ ବିଧାୟକ ଚୁପ ରହିଛନ୍ତି । ମଧ୍ୟପ୍ରଦେଶର ବଡ଼ବୋଲା ଚିତାତିଳକ ଲଗାଉଥିବା ଗୃହମନ୍ତ୍ରୀ ନରୋତ୍ତମ ମିଶ୍ରଙ୍କୁ ସମାନ ପ୍ରଶ୍ନ ପଚରା ଗଲେ କହୁଛନ୍ତି ମୁଖ୍ୟମନ୍ତ୍ରୀ କହିଛନ୍ତି ମାନେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । କିନ୍ତୁ ବୁଲଡୋଜର କୁଆଡେ ଗଲା ପଚାରିଲେ ମିଶ୍ର ଚୁପ । କହୁଛନ୍ତି ଘର ଯଦି ତା’ବାପା ଜେଜେବାପାଙ୍କର ହୋଇଥିବ କିମ୍ବା ଘର ଯଦି ସରକାରୀ ଜମି ଉପରେ ନଥିବ ତେବେ ବୁଲଡୋଜର ଭାଙ୍ଗିବ କେମିତି । ଏଠି ପ୍ରଶ୍ନ ଉଠୁଛି ଆଗରୁ ଯେତେ ଘର ମାମାଙ୍କ ବୁଲଡୋର ଭାଙ୍ଗିଛି ସବୁ କଣ ସରକାରୀ ଜମି ଉପରେ ତିଆରି ହୋଇଥିଲା ଓ ଏବାବଦରେ ସରକାରୀ କଳ କେମିତି ତୁରନ୍ତ ଉପସଂହାରକୁ ଆସିଗଲେ । ଏମିତି ନୁହେଁ ତ ବିଜେପି ବୁଲଡୋଜର ଖାଲି ଗୋଟିଏ ବିଶେଷ ବର୍ଗକୁ ଟାର୍ଗେଟ୍ କରେ ?
