କ୍ରିଷ୍ଟିନା ପାଇସ୍କୋଭାଙ୍କୁ ମିସ୍ ୱାର୍ଲ୍ଡ ମୁକୁଟ

ମୁମ୍ବାଇ: ୭୧ ତମ ବିଶ୍ୱ ସୁନ୍ଦରୀ ମୁକୁଟ ପିନ୍ଧିଛନ୍ତି ଚେକ୍ ରିପବ୍ଲିକର କ୍ରିଷ୍ଟାଇନା ପାଇସକୋଭା । ଶନିବାର ମୁମ୍ବାଇରେ ଥିବା ଜିଓ ୱାର୍ଲ୍ଡ କନଭେନସନ୍ ସେଣ୍ଟରରେ ଏହାର ଗ୍ରାଣ୍ଡ ଫିନାଲେ ଅନୁଷ୍ଠିତ ହୋଇଯାଇଛି । ଗତ ବର୍ଷର ବିଜେତା ପୋଲାଣ୍ଡର ମିସ୍ ୱାର୍ଲ୍ଡ ୨୦୨୨ କରୋଲିନା ବିଏଲାଭସ୍କା ଚଳିତ ବର୍ଷର ୨୪ ବର୍ଷୀୟ କ୍ରିଷ୍ଟାଇନାଙ୍କୁ ତାଙ୍କ ଉତ୍ତରାଧିକାରୀ ଭାବେ ମୁକୁଟ ପିନ୍ଧାଇଥିଲେ । ଏହି ସୌନ୍ଦର୍ଯ୍ୟ ପ୍ରତିଯୋଗିତାରେ ଲେବାନନ୍‌ର ୟାସ୍ମିନା ଜାଏତୁନ୍ ପ୍ରଥମ ରନର୍ସ ଅପ୍ ହୋଇଛନ୍ତି ।

ଭାଗ ନେଇଥିଲେ ୧୧୫ଟି ଦେଶର ପ୍ରତିଯୋଗୀ

ଚେକ୍ ରିପବ୍ଲିକ୍‌ର କ୍ରିଷ୍ଟିନା ପାଇସ୍କୋଭା ୧୧୫ଟି ଦେଶର ପ୍ରତିଯୋଗୀଙ୍କ ସହ ପ୍ରତିଦ୍ୱନ୍ଦ୍ୱିତା କରିଥିଲେ । ଏହି ବିଶ୍ୱ ସୁନ୍ଦରୀ ପ୍ରତିଯୋଗିତାରେ ପୃଥିବୀର ମହିଳାମାନଙ୍କ ଅନୁଗ୍ରହ, ସୌନ୍ଦର୍ଯ୍ୟ ଏବଂ ଦକ୍ଷତାକୁ ଆଲୋକିତ କରିଥିଲା । ବିଜେତା ଘୋଷଣା ହେବା ପୂର୍ବରୁ ଫାଇନାଲିଷ୍ଟମାନେ ପ୍ରଶ୍ନ ଏବଂ ଉତ୍ତର ରାଉଣ୍ଡ ସହିତ ବିଭିନ୍ନ ବର୍ଗରେ ପ୍ରତିଯୋଗିତା କରିଥିଲେ । ଭାରତୀୟ ଡିଜାଇନର୍ ଆର୍ଚାନା କୋଚର ସ୍ୱତନ୍ତ୍ର ରେଶମ କପଡା ବ୍ୟବହାର କରି ବିଶ୍ୱ ସୁନ୍ଦରୀ ୨୦୨୪ ପ୍ରତିଯୋଗୀମାନଙ୍କ ପାଇଁ ସମସ୍ତ ପୋଷାକର ଷ୍ଟାଇଲ୍ ଏବଂ ଡିଜାଇନ୍ କରିଥିଲେ ।

ସ୍ୱେଚ୍ଛାସେବୀ ଭାବେ କାମ କରନ୍ତି କ୍ରିଷ୍ଟିନା

କ୍ରିଷ୍ଟିନା ଜଣେ ଛାତ୍ର, ସ୍ୱେଚ୍ଛାସେବୀ ଏବଂ ଅନ୍ତର୍ଜାତୀୟ ମଡେଲ ଅଟନ୍ତି । ଏହା ସହିତ ସେ ଉଭୟ ଆଇନ ଓ ବ୍ୟବସାୟ ପରିଚାଳନାରେ ଡିଗ୍ରି ହାସଲ ପାଇଁ ଅଧ୍ୟୟନ କରୁଛନ୍ତି । ସେ କ୍ରିଷ୍ଟିନା ପାଇସ୍କୋ ଫାଉଣ୍ଡେସନ ପ୍ରତିଷ୍ଠା କରି ତାଙ୍କ ସେବା କାର୍ଯ୍ୟ ଜାରି ରଖିଛନ୍ତି । କ୍ରିଷ୍ଟିନାଙ୍କର ସବୁଠାରୁ ଗର୍ବିତ ମୁହୂର୍ତ୍ତ ଥିଲା ତାଞ୍ଜାନିଆରେ ଗରିବ ପିଲାଙ୍କ ପାଇଁ ଏକ ଇଂରାଜୀ ସ୍କୁଲ ଖୋଲିବା । ସେ ଭାଓଲିନ ବଜାଇବାକୁ ଭଲ ପାଆନ୍ତି ଏବଂ ସଙ୍ଗୀତ ଏବଂ କଳା ପ୍ରତି ତାଙ୍କର ସ୍ୱତନ୍ତ୍ର ଆଗ୍ରହ ଅଛି । ୨୮ ବର୍ଷର ବ୍ୟବଧାନ ପରେ ଭାରତରେ ମିସ୍ ୱାର୍ଲ୍ଡ ୨୦୨୪ ପ୍ରତିଯୋଗିତାର ୭୧ତମ ସଂସ୍କରଣକୁ ନେଇ ବିପୁଳ ଉତ୍ସାହ ଦେଖିବାକୁ ମିଳିଥିଲା ।

ଚୟନ ପାଇଁ ଥିଲେ ୧୨ ଜଣ ବିଚାରପତି

ଏଥିରେ ଭାରତର ପ୍ରତିନିଧିତ୍ୱ କରିଥିଲେ ଫେମିନା ମିସ୍ ଇଣ୍ଡିଆ-ୱାର୍ଲଡ ୨୦୨୨ର ବିଜେତା ସିନି ସେଟ୍ଟୀ । ଏହି ବୈଶ୍ୱିକ ମଞ୍ଚରେ ସିନିଙ୍କ ପ୍ରତିନିଧିତ୍ୱ ମଧ୍ୟ ବେଶ୍ ପ୍ରଭାବଶାଳୀ ଥିଲା । ଚଳଚ୍ଚିତ୍ର ନିର୍ମାତା କରଣ ଜୋହର ଏବଂ ମିସ୍ ୱାର୍ଲ୍ଡ ୨୦୧୩ ମେଗାନ୍ ୟଙ୍ଗ୍ ହୋଷ୍ଟ ଭାବେ ମଞ୍ଚରେ ଉପସ୍ଥିତ ଥିବା ବେଳେ ପ୍ରସିଦ୍ଧ କଳାକାର ନେହା କକ୍କର, ଟୋନି କକ୍କର ଏବଂ ଶାନ୍‌ଙ୍କ ଚମତ୍କାର ପରିବେଷଣ ଦେଖିବାକୁ ମିଳିଥିଲା । ଏହି କାର୍ଯ୍ୟକ୍ରମରେ ପୋଲାଣ୍ଡର ମଡେଲ କାରୋଲିନା ବିଲାସ୍କା, ମିସ୍ ୱାର୍ଲ୍ଡ ୨୦୨୧ ମଧ୍ୟ ଉପସ୍ଥିତ ଥିଲେ । ସୌନ୍ଦର୍ଯ୍ୟର ପରବର୍ତ୍ତୀ ବିଶ୍ୱ ପ୍ରତିନିଧି ଚୟନ ପାଇଁ ୧୨ ଜଣିଆ ବିଚାରପତି ପ୍ୟାନେଲ ଗୁରୁତ୍ୱପୂର୍ଣ୍ଣ ଦାୟିତ୍ୱ ନେଇଥିଲେ । ଏହି ସମ୍ମାନିତ ପ୍ୟାନେଲରେ ଚଳଚ୍ଚିତ୍ର ପ୍ରଯୋଜକ ସାଜିଦ ନାଡିଆଡୱାଲା, କ୍ରିକେଟର ହରଭଜନ ସିଂହ, ସାମ୍ବାଦିକ ରଜତ ଶର୍ମା, ଅଭିନେତ୍ରୀ ତଥା ସମାଜସେବୀ ଅମୃତା ଫଡନାଭିସ, ବଲିଉଡ ଅଭିନେତ୍ରୀ କ୍ରିତି ସାନନ୍ ଏବଂ ପୂଜା ହେଗଡେ ପ୍ରମୁଖ ରହିଥିଲେ ।