୨ ହଜାର କୋଟି ଟଙ୍କାର ଆୟୋଡିନ୍ ବଟିକା କିଣି ଠୁଳ କରିଛି ଆମେରିକା, ଜାଣନ୍ତୁ କାରଣ କ’ଣ

କରୋନା କାଳରେ ଆୟୋଡିନ୍ ଟିକା ଷ୍ଟକ୍ କରୁଛି ଆମେରିକା । ଆମେରିକା ଦେଖାଦେଖି ୟୁରୋପର ଅନେକ ଦେଶ ମଧ୍ୟ ଫସଫେଟ୍ ଆୟୋଡାଇଡ୍ ବଟିକା କିଣି ଷ୍ଟକ୍ କରିବା ଆରମ୍ଭ କରିଦେଲେଣି । ଯେଉଁଥିପାଇଁ ଆୟୋଡିନ୍ ବଟିକା ଦାମରେ ୧୦ ପ୍ରତିଶତ ବୃଦ୍ଧି ଘଟିଛି । ତେବେ ଏଇଠି ଆପଣଙ୍କ ମନକୁ ପ୍ରଶ୍ନ ଆସୁଥିବ ଆମେରିକା ଯଦି ଆୟୋଡିନ୍ ବଟିକା କିଣି ଥାକ ମାରୁଛି ତେବେ ଏହା ପଛରେ ବଡ଼ କାରଣ ଥିବ । ହୁଏତ କରୋନା ଭଳି ଆଉ ଗୋଟିଏ କିଛି ରୋଗ ଆସୁଛି । ସେଥିପାଇଁ ଅଙ୍କଲ ସାମ୍ ନିଜକୁ ପ୍ରସ୍ତୁତ କରୁଛି । ଆପଣ ଠିକ୍ ଭାବୁଛନ୍ତି କିନ୍ତୁ ଅନୁମାନରେ ଟିକିଏ ଭୁଲ ଅଛି । ଆମେରିକା କୌଣସି ରୋଗ ପାଇଁ ଆୟୋଡିନ୍ ବଟିକା କିଣୁନି । ପରମାଣୁ ଯୁଦ୍ଧ ପରିସ୍ଥିତିରେ ନିଜ ନାଗରିକଙ୍କୁ ବଂଚାଇବା ପାଇଁ ବଟିକା କିଣୁଛି ।

ପୁଟିନଙ୍କ ଧମକ ପରେ ଆୟୋଡିନ୍ ବଟିକା ଠୁଳ

ପରମାଣୁ ଆକ୍ରମଣ ଭୟରେ କେବଳ ଆମେରିକା ନୁହେଁ ୟୁରୋପର ଅନେକ ଦେଶ ମଧ୍ୟ ଆୟୋଡିନ ଠୁଳ କରିବାରେ ଲାଗିଲେଣି । ପରମାଣୁ ଯୁଦ୍ଧ ଓ ଆୟୋଡିନ୍ ମଧ୍ୟରେ ସମ୍ପର୍କ କ’ଣ ଜାଣିବା ଆଗରୁ ଜାଣିନିଅନ୍ତୁ କେଉଁ ଦେଶ ସବୁ ଆୟୋଡିନ୍ ଠୁଳ କରୁଛନ୍ତି ଓ ପୁଟିନଙ୍କ କେଉଁ ଧମକ ସେମାନଙ୍କୁ ଏମିତି କରିବାକୁ ବାଧ୍ୟ କରିଛି ।

ଆମେରିକା ଭଳି ପୋଲାଣ୍ଡ,ବ୍ରିଟେନ୍ ଓ ୟୁରୋପିଆନ ୟୁନିୟନର ଅନେକ ଦେଶ ଆୟୋଡିନ୍ ବଟିକା କିଣିବାରେ ଲାଗିଛନ୍ତି । ପୋଲାଣ୍ଡର ୧୬ ପ୍ରଦେଶରେ ଆୟୋଡିନ୍ ବିତରଣ କେନ୍ଦ୍ର ମଧ୍ୟ ପ୍ରତିଷ୍ଠା ହୋଇଛି । ଦେଶର ୩୪ ଲକ୍ଷ ଜନସଂଖ୍ୟା ପାଇଁ ପୋଲାଣ୍ଡ ସରକାର ୫୫ ଲକ୍ଷ ଆୟୋଡିନ୍ ବଟିକା କିଣିଛନ୍ତି । ଏଣେ ୟୁରୋପୀୟ ସଂଘ ୟୁକ୍ରେନକୁ ୫୫ ଲକ୍ଷ ପୋଟାସିୟମ ଆୟୋଡାଇଡାଇଡ୍ ବଟିକା ପଠାଇବା କଥା କହିଛି ।

ସେପ୍ଟେମ୍ବର ୨୪ ତାରିଖ ଦିନ ଭ୍ଲାଦିମିର ପୁଟିନ ଧମକ ଦେଇ କହିଥିଲେ ଯେ ,ଆମେ ଦେଶର ସୁରକ୍ଷା ପାଇଁ ସବୁଠାରୁ ଭୟାନକ ଅସ୍ତ୍ର ମଧ୍ୟ ବ୍ୟବହାର କରିବୁ । ଆମ ପାଖରେ ଦୁନିଆର ସବୁଠାରୁ ଭୟାନକ ଅସ୍ତ୍ର ରହିଛି । ପାଶ୍ଚାତ୍ୟ ଦେଶ ତାଙ୍କ ଧମକକୁ ହାଲୁକାରେ ନିଅନ୍ତୁ ନାହିଁ ବୋଲି ମଧ୍ୟ ସେ ଚେତାବନୀ ଦେଇଥିଲେ ।

ପୁଟିନଙ୍କ ସବୁଠାରୁ ଭୟାନକ ଅସ୍ତ୍ର ଦ୍ୱାର ବିଧ୍ୱଂସ ସୃଷ୍ଟିର ଧମକର ଅର୍ଥ ଭାବେ ପରମାଣୁ ଯୁଦ୍ଧକୁ ନିଆଯାଉଛି । ତେଣୁ ଆମେରିକା ଆୟୋଡିନ୍ ବଟିକା ଠୁଳ କରୁଛି । ରାସାୟନିକ,ବାୟୋଲଜିକାଲ ଓ ପରମାଣୁ ଯୁଦ୍ଧରୁ ରକ୍ଷା ପାଇବା ପାଇଁ ଆମେରିକା ଭଳି ଦେଶ ଆୟୋଡିନ୍ ବଟିକା ଠୁଳ କରୁଛି ।

ଆୟୋଡିନ୍ କେମିତି ପରମାଣୁ ଆକ୍ରମଣ କାଳରେ ଜୀବନ ବଂଚାଏ ?

ଯେଉଁ ଅଂଚଳ ଉପରେ ପରମାଣୁ ଆକ୍ରମଣ ହୁଏ ସେଠାର ବାୟୁମଣ୍ଡଳରେ ରେଡିଓଆକ୍ଟିଭ ଆୟୋଡିନ୍ ଭାସିବାକୁ ଲାଗେ । ଏହାକୁ ଦେଖି ହୁଏନା କି ଛୁଇଁ ହୁଏନା । ଏହାର କୌଣସି ବାସ୍ନା ନଥାଏ । ରେଡିଓଆକ୍ଟିଭ୍ ଆୟୋଡିନ୍ ବା ଆଇ-୧୩୧ ଶରିରରେ ପ୍ରବେଶ କରି କ୍ୟାନସର ,ଟ୍ୟୁମର,ଲୁକୋମିଆ,ଆଖି ରୋଗ ସୃଷ୍ଟି କରିବା ସହିତ ମାନସିକ ଅବସାଦର କାରଣ ହୋଇଥାଏ । ଆଇ-୧୩୧ ସହିତ ସମ୍ପର୍କରେ ଆସିବା ଦ୍ୱାରା ମାତ୍ର କେଇ ଘଣ୍ଟା କିମ୍ବା ଦିନ ମଧ୍ୟରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥାଏ । ଏହିଭଳି ସମୟରେ ପ୍ରାକୃତିକ ଆୟୋଡିନ୍ କାମରେ ଆସିଥାଏ ।

ପ୍ରାକୃତିକ ଆୟୋଡିନ୍ ୩୭ ପ୍ରକାରର ହୋଇଥାଏ । ଏହା ମଧ୍ୟରୁ ଆୟୋଡିନ୍-୧୨୭ ମାନବ ଶରିରର କ୍ଷତି କରିନଥାଏ । ଏହି ଆୟୋଡିନ୍ ଆଇ ୧୩୧ରୁ ମଣିଷକୁ ରକ୍ଷା କରିଥାଏ । ଦୁଇଟି ଔଷଧ ପୋଟାସିୟମ ଓ ଆୟୋଡିନକୁ ମିଶାଇ ପୋଟାସିୟମ ଆୟୋଡାଇଡ୍ ବଟିକା ତିଆରି । ଏହି ବଟିକା ଖାଇବା ଦ୍ୱାରା ଆଇ ୧୩୧ ଆୟୋଡିନ୍ ଶରିର ମଧ୍ୟକୁ ପ୍ରବେଶ କରି ପାରିନଥାଏ । ତେଣୁ ଆମେରିକା ଭଳି ଦେଶ ନିଜ ନାଗରିକଙ୍କ ପାଇଁ ପୋଟାସିୟମ୍ ଆୟୋଡାଇଡ୍ ଔଷଧ କିଣି ଷ୍ଟକ୍ ରଖୁଛନ୍ତି ।

ଆୟୋଡାଇଡ୍ ଫସଫେଟ୍ ବଟିକା ତିନୋଟି ବାଟରେ ଜୀବନ ରକ୍ଷା କରିଥାଏ ।

୧. ଆମେରିକାର ସେଣ୍ଟର ଫର ଡିଜିଜ୍ କଣ୍ଟ୍ରୋଲ ଆଣ୍ଡ୍ ପ୍ରିଭେନସନ୍ ଅର୍ଥାତ ସିଡିସି ଅନୁସାରେ ପୋଟାସିୟମ ଆୟୋଡାଇଡ୍ ଔଷଧରେ ନନ୍ ରେଡିଓଏକ୍ଟିଭ ଆୟୋଡିନ ଅଧିକ ମାତ୍ରାରେ ଥାଏ । ଫଳରେ ଏହି ଔଷଧ ଖାଇଥିବା ବ୍ୟକ୍ତିଙ୍କ ଶରିରରେ ଅଧିକ ମାତ୍ରାରେ ଆୟୋଡିନ ଥାଏ । ତେଣୁ ବାହାରୁ ଆଉ ଅଧିକ ଆୟୋଡିନ୍ ଶରିରକୁ ପ୍ରବେଶ କରି ପାରିନଥାଏ ।

୨.ପରମାଣୁ ବିସ୍ଫୋରଣ ପରେ ଆଇ-୧୩୧ ଶରିର ମଧ୍ୟକୁ ପ୍ରବେଶ କରିବା ଦ୍ୱାରା ଥାୟରାଇଡ୍ ଗ୍ଲାଣ୍ଡରେ ଟିସ୍ୟୁ ସୃଷ୍ଟି ହୋଇଥାଏ । ଯାହାକୁ ଏହି ଔଷଧ ନଷ୍ଟ କରିଥାଏ ।

୩. ଆଇ-୧୩୧ ଶରିରରେ ପ୍ରବେଶ କରିବା ସହିତ ଟ୍ୟୁମର ସୃଷ୍ଟି ହୋଇଥାଏ । ଏହି ଔଷଧ ଟ୍ୟୁମରକୁ ନଷ୍ଟ କରିଥାଏ ।

ଏହା ଶତ ପ୍ରତିଶତ ସୁରକ୍ଷା ଦେଇଥାଏ କି ?

ସିଡିଏସ ଅନୁସାରେ ଏହା ଶତ ପ୍ରତିଶତ ସୁରକ୍ଷା ଦେଇନଥାଏ ।ଶରିର ମଧ୍ୟକୁ କେତେ କେତେ ରେଡିଓଆକ୍ଟିଭ୍ ଆୟୋଡିନ୍ ପ୍ରବେଶ କରିଛି ତା’ ଉପରେ ଔଷଧର ପ୍ରଭାବ ନିର୍ଭର କରିଥାଏ । ୪୦ ବର୍ଷରୁ କମ ବୟସ୍କଙ୍କୁ ଏହି ଔଷଧ ଦିଆଯାଏ । ଗର୍ଭବତୀ ଓ ସ୍ଥନ୍ୟପାନ କରାଉଉଥିବା ମହିଳା ମଧ୍ୟ ଏହାକୁ ଖାଇ ପାରିବେ ।

ଆଗରୁ କେବେ ଏହି ଔଷଧ ବ୍ୟବହାର ହୋଇଛି ?

୧୯୮୬ ମସିହାରେ ସୋଭିଏତ ଋଷର ଚେର୍ଣ୍ଣୋଭିଲ ପରମାଣୁ ରିଆକ୍ଟର ଦୁର୍ଘଟଣା କାଳରେ ଲୋକଙ୍କୁ ଏହି ଔଷଧ ଦିଆଯାଇଥିଲା । ସେହିଭଳି ୨୦୧୧ରେ ଜାପାନରେ ଆସିଥିବା ସୁନାମୀ ଓ ଭୂକମ୍ପ କାଳରେ ଫୁକୁସିମା ନ୍ୟୁକ୍ଲିୟର ପାୱାର ପ୍ଲାଣ୍ଟ କ୍ଷତିଗ୍ରସ୍ତ ହୋଇଥିଲା । ସେହି ସମୟରେ ଜାପାନ ସରକାର ନିଜ ନାଗରିକଙ୍କ ପାଇଁ ଏହି ଔଷଧ କିଣିଥିଲେ ।