ଅଧାରୁ ପାଠ ଛାଡିଥିବା ପିକେଙ୍କ ଜୀବନ କେମିତି ବଦଳିଥିଲା ?

ସୋମବାର ସକାଳ ୯’ରେ ପ୍ରଶାନ୍ତ କିଶୋର ଦୁଇ ଲାଇନର ଗୋଟିଏ ଟ୍ୱିଟ୍ କରିଥିଲେ । ଏହି ଟ୍ୱିଟରେ ସେ ଗୋଟିଏ ରାଜନୈତିକ ଦଳର ନାମ ଉଲ୍ଲେଖ କରିଥିଲେ । ଦଳର ନାମ ଥିଲା ଜନ ସୁରାଜ ପାର୍ଟି । ଜନ ସୁରାଜ ପାର୍ଟି ବା ଜେଏସପି ହେଉଛି ପ୍ରଶାନ୍ତଙ୍କ ନୂଆ ଦଳ, ଯାହାକୁ ସେ ନିଜ ପାଇଁ ଗଢିଛନ୍ତି । ୨୦୧୪ରେ ବିଜେପି ବିଜୟର ବିନ୍ଧାଣୀ, ନୀତିଶ-ଲାଲୁଙ୍କୁ ଏକାଠି କରିଥିବା ଓ କଂଗ୍ରେସର ଅଫର ପ୍ରତ୍ୟାଖାନ କରିଥିବା ପ୍ରଶାନ୍ତ ନିଜ ରାଜନୈତିକ ଦଳ ଗଠନ କରିବା ସହିତ ଗୋଟିଏ କଥା କହିଦେଇଛନ୍ତି, ଆଉ ତା’ ହେଉଛି ସେ ଅନ୍ୟମାନଙ୍କ ପାଇଁ ରଣନୀତି ତିଆରି କରିବା ଅପେକ୍ଷା ନିଜ ପାଇଁ ଏବେ କାମ କରିବେ ।

ଟ୍ୱିଟରରେ ନିଜ ବାୟୋର ପ୍ରଶାନ୍ତ ନିଜକୁ ଗାନ୍ଧୀବାଦୀ,ପରମ୍ପରା ବିରୋଧୀ, ସମତାବାଦୀ, ମାନବବାଦୀ ଓ ଜନତାଙ୍କ ଆକାଂକ୍ଷା ଉପରେ ବିଶ୍ୱାସ କରୁଥିବା ବ୍ୟାକ୍ତି ଭାବେ ବର୍ଣ୍ଣନା କରନ୍ତି ।

ଟ୍ୱିଟରରେ ପ୍ରଶାନ୍ତ କେବଳ ୮୫ ଜଣଙ୍କୁ ଫଲୋ କରନ୍ତି । ଏହି ୮୫ ଜଣଙ୍କ ମଧ୍ୟରେ ନା ମୋଦି ଅଛନ୍ତି ନା ଶାହା । ଅଧିକ ସାମ୍ବାଦିକଙ୍କୁ ଫଲୋ କରୁଥିବା ପ୍ରଶାନ୍ତ ମାତ୍ର ତିନି ଜଣ ଆଂଚଳିକ ନେତାଙ୍କୁ ଫଲୋ କରନ୍ତି । ସେହି ତିନି ଜଣ ହେଉଛନ୍ତି ଷ୍ଟାଲିନ୍, କ୍ୟାପ୍ଟେନ ଅମରିନ୍ଦର ସିଂହ ଓ ଅସାଉଦ୍ଦିନ ୱେୱେସି ।

ବିହାରରୁ ଆରମ୍ଭ ହେବ ଯୁଦ୍ଧ

ପିକେଙ୍କ ଦଳ ତା’ର ପ୍ରଥମ ନିର୍ବାଚନ ବିହାରେ ଲଢିବ । ଲାଗୁଛି ନୀତିଶଙ୍କ ଉପରେ ପ୍ରତିଶୋଧ ନେବାକୁ ପିକେ ଯୋଜନା କରିଛନ୍ତି । କାରଣ ୨୦୧୯ରେ ନୀତିଶ ପିକେଙ୍କୁ ତାଙ୍କ ଦଳରୁ ବାହାର କରିଦେଇଥିଲେ । ତେବେ କଥା ହେଉଛି ବିହାରର ଜାତୀୟ ସମୀକରଣକୁ ଭେଦ କରିବା ଏତେ ସହଜ ନୁହେଁ । ଆଉ ବିହାର ମଧ୍ୟ ସେହି ରାଜ୍ୟ ଯେଉଁଠି ସ୍ୱାଧିନତା ପରଠାରୁ ଅନେକ ରାଜନୈତିକ ଦଳ ଜନ୍ମ ନେଇ ସମାଧିସ୍ଥ ହୋଇଛନ୍ତି ।

ହାଇଦ୍ରାବାଦ କାହିଁକି ଖାସ ?

ପିକେ ନାମରେ ପ୍ରସିଦ୍ଧ ପ୍ରଶାନ୍ତଙ୍କ ଜୀବନରେ ହାଇଦ୍ରାବାଦର ଗୁରୁତ୍ୱ ଢେର ଅଧିକ । ଏହି ସହରରେ ରହିଛି ତାଙ୍କ କମ୍ପାନୀ ଆଇପ୍ୟାକର ମୁଖ୍ୟାଳୟ । ଏହା ସହିତ ଏହି ସହରରେ ହିଁ ସେ ଭେଟିଥିଲେ ଜଣେ ଡାକ୍ତରଙ୍କୁ ଯିଏ ପରବର୍ତ୍ତି କାଳରେ ତାଙ୍କ ପତ୍ନୀ ହୋଇଥିଲେ । କେବେ ଇଂଜିନିୟରିଂ କରିନଥିବା ପ୍ରଶାନ୍ତଙ୍କ ଟିମରେ ଅଛନ୍ତି ଦେଶର ପ୍ରସିଦ୍ଧ ଆଇଆଇଟିର ବିଦ୍ୟାର୍ଥୀ । ପିକେଙ୍କ କମ୍ପାନୀ ଦେଶର ବଡ଼ବଡ଼ ଇଂଜିନିୟରିଂ କଲେଜରେ ପ୍ଲେସମେଣ୍ଟ କ୍ୟାମ୍ପ ଲଗାଇଥାନ୍ତି । ପିକେ ଦେଶର ପ୍ରଶିଦ୍ଧ ରାଜନୈତିକ ରଣନୀତିକାର ବନିବାର କାହାଣୀ ବେଶ ରୋଚକ । ୧୯୭୬ କିମ୍ବା ୭୭ରେ ଜନ୍ମିତ ପିକେ ଏକ ସାସାରାମର ଏକ ବ୍ରାହ୍ମଣ ପରିବାରରେ ଜନ୍ମ ହୋଇଥିଲେ । ତାଙ୍କ ପିତା ବିହାର ସରକାରରେ ଡାକ୍ତର ଥିଲେ.

ଇଣ୍ଟର ପରେ ପଢାରେ ଲାଗିଥିଲା ବ୍ରେକ୍

ପିକେଙ୍କ ପାଠପଢା ବିହାରର ବକ୍ସରରୁ ଆରମ୍ଭ ହୋଇଥିଲା । ଗଣିତରେ ଧୁରନ୍ଧର ଥିଲେ । ବାପା ଚାହୁଁଥିଲେ ସେ ଡାକ୍ତର କିମ୍ବା ଇଂଜିନିୟର ହୁଅନ୍ତୁ । କିନ୍ତୁ ପିକେଙ୍କର ଏହି ଦୁଇ ପେଶାରେ ଟିକେ ମଧ୍ୟ ଇଛା ନଥିଲା । ପ୍ରଥମେ ସେ ଦିଲ୍ଲୀର ହିନ୍ଦୁ କଲେଜରେ ନାମ ଲେଖାଇଥିଲେ । କିନ୍ତୁ ସେଠାରୁ ଘରକୁ ଚାଲି ଆସିଥିଲେ । ପ୍ରାୟ ଦୁଇ ବର୍ଷ ତାଙ୍କ ପଢା ବନ୍ଦ ରହିଥିଲେ । ଦୁଇ ବର୍ଷ ପରେ ସେ ପୁଣି ପଢା ଆରମ୍ଭ କରିଥିଲେ । କିନ୍ତୁ ଗ୍ରାଜୁଏସନ ସମୟରେ ଆହୁରି ବର୍ଷେ ବ୍ରେକ୍ ନେଇଥିଲେ । ଅର୍ଥାତ ଇଣ୍ଟର ଓ ପିଜି ମଧ୍ୟରେ ସେ ମୋଟ ୩ ବର୍ଷ ପାଠରୁ ଦୁରରେ ଥିଲେ ।

ଜାତିସଂଘର ବଡ଼ ଚାକିରି ଛାଡିଛନ୍ତି

୫ ଫୁଟ ୯ ଇଂଚର ପିକେଙ୍କୁ ଗ୍ରାଜୁଏସନ ପରେ ପରେ ଜାତିସଂଘର ପବ୍ଲିକ ହେଲ୍ଥରେ ଭଲ ଚାକିରି ମଧ୍ୟ ମିଳିଥିଲା । ପ୍ରଥମ ପୋଷ୍ଟିଂ ହାଇଦ୍ରାବାଦରେ ଥିଲା । ସେଠାରେ ସେ ମନଲଗାଇ କାମ କରିଥିଲେ । ଏହି ସମୟରେ ତାଙ୍କ ଦକ୍ଷତା ଅନେକଙ୍କୁ ପ୍ରଭାବିତ କରିଥିଲା । ଏହି ସମୟରେ ତାଙ୍କର ସାକ୍ଷାତ ଡାକ୍ତର ଜାହ୍ନବୀଙ୍କ ସହିତ ହୋଇଥିଲା । ଯାହାଙ୍କୁ ସେ ପରବର୍ତ୍ତି କାଳରେ ବିବାହ କରିଥିଲେ.

ସେହି ସର୍ଭେ ଯାହା ମୋଦିଙ୍କ ସହିତ ମିଶାଇଥିଲା

ଏହା ପରେ ସେ ଜେନେଭା ଯାଇଥିଲେ । ଜାତିସଂଘରେ ତାଙ୍କ ନାମ ପରିଚିତ ହେବାରେ ଲାଗିଥିଲାଥ । ଏହି ସମୟରେ ସେ ଗୋଟିଏ ସର୍ଭେ କରିଥିଲେ । ୪ ଟି ରାଜ୍ୟରେ କୁପୋଷଣ ସମସ୍ୟାକୁ ନେଇ ଏହି ସର୍ଭେ ହୋଇଥିଲା । ଏହି ଚାରି ରାଜ୍ୟ ଭିତରୁ ଗୋଟିଏ ଥିଲା ଗୁଜୁରାଟ । ସେତେବେଳେ ଗୁଜୁରାଟର ମୁଖ୍ୟମନ୍ତ୍ରୀ ଥିଲେ ନରେନ୍ଦ୍ର ମୋଦି । ରିପୋର୍ଟରେ ଗୁଜୁରାଟର ସ୍ଥାନ ସଭା ତଳେ ଥିଲା । ଦିନେ ଗୁଜୁରାଟ ମୁଖ୍ୟମନ୍ତ୍ରୀଙ୍କ ଅଫିସରୁ ଏନେଇ ଫୋନ୍ ଆସେ । ପ୍ରଶ୍ନ ଥିଲା ଗୁଜୁରାଟ କାହିଁକି ତଳେ ? ଏହା ପରେ ମୁଖ୍ୟମନ୍ତ୍ରୀଙ୍କ ସହିତ ସାକ୍ଷାତ ପାଇଁ ତାଙ୍କୁ ଗାନ୍ଧିନଗରରୁ ଡାକରା ଆସେ ।

ଚାକିରି ଛାଡିବା ନିଷ୍ପତ୍ତି ସହଜ ନଥିଲା

ମୋଦିଙ୍କ ସହିତ ତାଙ୍କ ସାକ୍ଷାତ ହୋଇଥିଲା । ମୋଦି ତାଙ୍କଠାରେ କିଛି ଦେଖିଥିଲେ । ପିକେଙ୍କୁ ସେ ଗୁଜୁରାଟ ମୁଖ୍ୟମନ୍ତ୍ରୀ ଅଫିସରେ କାମ କରିବାକୁ ଅଫର ଦେଇଥିଲେ । ପରିବାରର ବିରୋଧ ସତ୍ୱେ ପିକେ ଅଫର ଗ୍ରହଣ କରିଥିଲେ । ଏହା ପରେ ସେ ଧିରେ ଧିରେ ଟିମ୍ ମୋଦିଙ୍କ ନିକଟତର ହୋଇଥିଲେ । ୨୦୧୧ରେ ସେ ମୋଦିଙ୍କ ନିର୍ବାଚନ ପ୍ରଚାର ସହିତ ଯୋଡି ହୋଇଥିଲେ । ଭାଷଣ ଲେଖିବାଠାରୁ ଆନାଲିଟିକ୍ସ ପ୍ରସ୍ତୁତ କରିବା ଆରମ୍ଭ କରିଥିଲେ । ୨୦୧୨ ନିର୍ବାଚନରେ ତାଙ୍କ କାର୍ଯ୍ୟ ପ୍ରଶଂସନୀୟ ଥିଲା । ତେଣୁ ସେ ଟିମ୍ ମୋଦିର ଅଭିନ୍ନ ଅଙ୍ଗ ହୋଇ ଯାଇଥିଲେ ।

ସୋସିଆଲ ମିଡିଆ ଓ ପିକେ

୨୦୧୪ ସାଧାରଣ ନିର୍ବାଚନରେ ସେ ସୋସିଆଲ ମିଡିଆକୁ ମୁଖ୍ୟ ଅସ୍ତ୍ର କରିଥିଲେ । କଂଗ୍ରେସ ଭଳି ଦଳ ଓ ଏପରିକି ବିଜେପିରେ ମଧ୍ୟ ସୋସିଆଲ ମିଡିଆକୁ ଅସ୍ତ୍ର କରାଯିବାକୁ ଅନେକ ହସରେ ଉଡାଇ ଦେଇଥିଲେ । କିନ୍ତୁ ୨୦୧୪ ନିର୍ବାଚନରେ ବିଜେପିର ବିଜୟ ପିକେଙ୍କ ବିଶ୍ୱାସ ଉପରେ ମୋହର ମାରିବା ସହିତ ତାଙ୍କୁ କରିଥିଲା ବ୍ରାଣ୍ଡ୍ ।

କିନ୍ତୁ ଗୋଟିଏ ସମୟ ପରେ ଟିମ୍ ମୋଦି ଓ ପିକେ ଅଲଗା ରାସ୍ତାର ପଥିକ ହୋଇଥିଲେ । ମୋଦିଙ୍କ ଛାୟାତଳୁ ବାହାରି ସେ ମୋଦି ବିରୋଧୀଙ୍କ ପାଇଁ ପ୍ଲାନ୍ ବନାଇବା ଆରମ୍ଭ କରିଥିଲେ । ୨୦୧୫ ବିହାର ନିର୍ବାଚନରେ ତାଙ୍କ ରଣନୀତି ପାଇଁ ଲାଲୁଙ୍କ ଦଳ ଓ ନୀତିଶଙ୍କ ଦଳ ମଧ୍ୟରେ ମେଣ୍ଟ ହୋଇ ପାରିଥିଲା । ବିଜେପିକୁ ବିହାରରେ ପରାଜୟର ମୁହଁ ଦେଖିବାକୁ ମିଳିଥିଲା । ସେ ମଧ୍ୟ ମମତାଙ୍କୁ ବିଜେପିର ଭିଷଣ ଆକ୍ରମଣରୁ ୨୦୨୧ରେ ବଂଚାଇଥିଲେ । ଏବେ ନିଜ ରାଜନୈତିକ ଦଳ ଗଢିଥିବା ପିକେ କେତେ ସଫଳ ହେଉଛନ୍ତି ତାହା ଦେଖିବାକୁ ବାକି ରହିଲା । ଅନ୍ୟମାନଙ୍କ ପାଇଁ ରଣନୀତି ବନାଇ ସଫଳ ହୋଇଥିବା ପିକେ ନିଜ ଦଳକୁ ସଫଳ କରି ପାରୁଛନ୍ତି କି ନାହିଁ ତାହା ଦେଖିବାକୁ ବାକି ରହିଲା । ଯଦି ପିକେ ବିଫଳ ହୁଅନ୍ତି ତେବେ ଏହା ସାବ୍ୟସ୍ତ ହୋଇଯିବ ଯେ, କ୍ଷମତା ହାସଲ ପାଇଁ କେବଳ ରଣନୀତି ଯଥେଷ୍ଟ ନୁହେଁ, ଏଥିପାଇଁ ଏକ ବିଶ୍ୱସନୀୟ ଚେହେରା ବି ଆବଶ୍ୟକ । ଆଉ ଯଦି ସଫଳ ହୁଅନ୍ତି ତେବେ ଏହା ସାବ୍ୟସ୍ତ ହେବ ଯେ, ରଣନୀତି ହିଁ ଯଥେଷ୍ଟ ।