କରୋନା ପ୍ରଭାବରୁ ବିଭିନ୍ନ ଦେଶ ଧିରେ ଧିରେ ମୁକ୍ତି ପାଉଥିବା ବେଳେ ଏହାର ଅନ୍ତୁଡିଶାଳ ଚୀନ ପୁଣିଥରେ କରୋନା କବଳରେ ପଡ଼ିଛି । ସ୍ଥିତି ଏତେ ସାଂଘାତିକ ଯେ, କମ୍ୟୁନିଷ୍ଟ୍ ସରକାର ଦେଶରେ ଲକଡାଉନ୍ ଲାଗୁ କରିଥିଲେ । କିନ୍ତୁ ବ୍ୟାପକ ଜନ ଅସନ୍ତୋଷ ପରେ ଲକଡାଉନ୍ ହଟାଇବାକୁ ବାଧ୍ୟ ହୋଇଥିଲେ । କିନ୍ତୁ ଏବେ ଲକଡାଉନ୍ ହଟାଇବା ଜିନ୍ ପିଙ୍ଗ ସରକାର ପାଇଁ ମୁଣ୍ଡବିନ୍ଧାର କାରଣ ହୋଇଛି । ଲକଡାଉନ୍ ହଟାଯିବା ପରେ ଦେଶରେ କରୋନା ସଂକ୍ରମଣ ବେକାବୁ ହୋଇ ପଡ଼ିଛି । ଦେଶରେ ଔଷଧ ଅଭାବ ଭିତରେ ସରକାର କରୋନା ସଂକ୍ରମିତଙ୍କୁ ଟ୍ରାକ୍ କରିବାରେ ବିଫଳ ହେଉଛନ୍ତି । ଯାହା ମହାମାରୀକୁ ଅଧିକ ମାରାତ୍ମକ କରିବ ବୋଲି ଆଶଙ୍କା କରାଯାଉଛି ।
ଟେନସନରେ ଜିନ୍ ପିଙ୍ଗ,କରୋନା କରୁଛି ଦୁର୍ବଳ
କିଛି ଦିନ ତଳେ ଚୀନର ବିଭିନ୍ନ ସହରରେ କଠୋର ପ୍ରତିବନ୍ଧକ ବିରୋଧରେ ବ୍ୟାପକ ବିରୋଧ ପ୍ରଦର୍ଶନ ହୋଇଥିଲା । ସାଧାରଣ ଲୋକ ରାଷ୍ଟ୍ରପତି ସି ଜିନପିଙ୍ଗଙ୍କୁ କ୍ଷମତା ଛାଡିବାକୁ ଆହ୍ୱାନ କରିଥିଲେ । ଜିନପିଙ୍ଗଙ୍କୁ ବ୍ୟାପକ ବିରୋଧର ସମ୍ମୁଖୀନ ହେବାକୁ ପଡ଼ିଥିଲା । ଗତ ତିନି ଦଶନ୍ଧି ମଧ୍ୟରେ ଚୀନରେ ଏଭଳି ବିରୋଧ ପ୍ରଦର୍ଶନ ହୋଇନଥିଲା । ଚୀନ୍ ସ୍ଥିତ ଆପଲର ସବୁଠାରୁ ବଡ଼ କାରଖାନାରେ ବିରୋଧର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ଯେଉଁ ଭିଡିଓରେ ଶ୍ରମିକଙ୍କୁ ପୋଲିସ ପିଟୁଥିବାର ଦେଖିବାକୁ ମିଳିଥିଲା । ଏମିତିକି ଆମେରିକାରେ ହ୍ୱାଇଟ୍ ହାଉସ୍ ସମ୍ମୁଖରେ ମଧ୍ୟ ଚୀନ୍ ବଂଶୋଦ୍ଭବ ବିରୋଧ ପ୍ରଦର୍ଶନ କରିଥିଲେ । ଚୀନକୁ ସ୍ୱାଧିନ କର ବୋଲି ସେମାନେ ନାରା ଦେଉଥିଲେ । ଏସବୁ ଦେଖିଲେ ଜଣା ପଡୁଛି ଯେ, ସେଠାକାର ଜନତା ଏକଛତ୍ରବାଦୀ ସରକାରର ନୀତିକୁ ସମର୍ଥନ କରୁନାହାନ୍ତି କି ଜିନ୍ ପିଙ୍ଗଙ୍କ ସହିତ ନାହାନ୍ତି । କିନ୍ତୁ ଭାରତ ଭଳି ଦେଶରେ ଜନତା ଲକଡାଉନକୁ ବିରୋଧ କରିଥିଲେ ମଧ୍ୟ ଏଭଳି ବ୍ୟାପକ ବିକ୍ଷୋଭ ହୋଇନଥିଲା କି ସରକାର ପରିବର୍ତ୍ତନ ଦାବି ଉଠିନଥିଲା ।
ମହଙ୍ଗା ପଡ଼ିପାରେ ୟୁଟର୍ଣ୍ଣ
କରୋନା କଟକଣାକୁ ନେଇ ଚାପରେ ଆସି ଚିନ୍ ସରକାର ୟୁଟର୍ଣ୍ଣ ନେଇଛନ୍ତି । କିନ୍ତୁ ଏଭଳି ୟୁଟର୍ଣ୍ଣ ଚୀନ୍ ସରକାରକୁ ମହଙ୍ଗା ପଡିପାରେ । ଯାହାର ଲକ୍ଷଣ ଦେଖିବାକୁ ମିଳିଲାଣି । କଟକଣା ହଟିବା ପରେ ସଂକ୍ରମଣ ମାମଲା ବୃଦ୍ଧି ପାଇବାରେ ଲାଗିଛି । ଅନେକ ରୋଗୀଙ୍କୁ ଟ୍ରାକ୍ କରିବା ପ୍ରଶାସନ ପକ୍ଷରେ ଅସମ୍ଭବ ହୋଇ ପଡ଼ିଛି । ଚୀନରେ ଔଷଧ ସରିବାରେ ଲାଗିଛି । ହସ୍ପିଟାଲରେ କରୋନା ସଂକ୍ରମିତଙ୍କ ସଂଖ୍ୟା ବଢିବାରେ ଲାଗିଛି । ଅନେକ ଡାକ୍ତର ନିଜେ ସଂକ୍ରମିତ ହେବା ପରେ ମଧ୍ୟ ଚିକିତ୍ସା କରୁଥିବା ଅଭିଯୋଗ ହେଉଛି । ଏମିତିରେ ସରକାର ପୁଣିଥରେ କଠୋର କଟକଣା ଲାଗୁ କରିପାରନ୍ତି । କିନ୍ତୁ ଏହା ସରକାରକୁ ହରଡ଼ଘଣାରେ ପକାଇ ପାରେ । କାରଣ ଲୋକ କରୋନା ମାଡ଼ ସହିତ ଲକଡାଉନ୍ କୁ ସହିବା ପକ୍ଷରେ ନାହାନ୍ତି ।
