ପେଟ୍ରୋଲ ପମ୍ପରେ ତେଲ ପକାଇବା ବେଳେ ଆପଣଙ୍କ ନଜର ପ୍ରଧାନମନ୍ତ୍ରୀ ମୋଦିଙ୍କ ସେହି ପୋଷ୍ଟର ଉପରେ ନିଶ୍ଚିତ ଭାବେ ପଡିଥିବ ଯେଉଁଥିରେ ଉଜ୍ୱଳା ଗ୍ୟାସ କେମିତି ମା’ମାନଙ୍କ ଆଖିରୁ ଲୁହ ପୋଛିଛି ସେ କଥା କୁହାଯାଇଛି । ଗୋଟିଏ ସମୟରେ ଉଜ୍ୱଳା ସ୍କିମକୁ ମୋଦି ସରକାରଙ୍କ ସବୁଠାରୁ ମହତ୍ୱାକାଂକ୍ଷୀ ଓ ସଫଳ ଯୋଜନା ବୋଲି କୁହାଯାଉଥିଲା । ଏପରିକି ୨୦୧୯ରେ ମୋଦି ସରକାର ପାର୍ଟ-ଟୁ କେବଳ ଗ୍ୟାସ୍ ସିଲିଣ୍ଡର ପାଇଁ ସମ୍ଭବ ହୋଇଥିଲା ବୋଲି ମଧ୍ୟ କୁହାଗଲା । ସେତେବଳେ ଓଡ଼ିଶାର ଜଣେ ମନ୍ତ୍ରୀ ଏହି ଯୋଜନା ପାଇଁ ସବୁ କ୍ରେଡିଟ୍ ନିଜେ ନେଇଥିଲେ । ତାଙ୍କ କଠିନ ପରିଶ୍ରମ ପାଇଁ ଉଜ୍ୱଳା ମହିଳାଙ୍କ ଜୀବନରେ ଉଜାଲା ଆଣିବା ସହିତ ଭୋଟ୍ ଆଣିଛି ବୋଲି ତାଙ୍କ ଚେଲା ଚାମଣ୍ଡା ବୁଲେଇ ବଙ୍କେଇ ପ୍ରଚାର କରୁଥିଲେ । ଅବଶ୍ୟ ପୋଷ୍ଟରରେ ବଡ଼ ବଡ଼ ଛବି ପ୍ରଧାନମନ୍ତ୍ରୀଙ୍କର ଥିଲା । ମନେ ପକାନ୍ତୁ ୨୦୧୪ ପରେ ଅନେକ ସବସିଡ୍ ଗ୍ୟାସ୍ ମଧ୍ୟ ଛାଡି ଦେଇଥିଲେ । କାରଣ ସେମାନଙ୍କୁ ପ୍ରଧାନମନ୍ତ୍ରୀ ଏମିତି କରିବାକୁ ଆହ୍ୱାନ କରିଥିଲେ । ସେମାନେ ସବସିଡି ଗ୍ୟାସ୍ ଛାଡିଲେ ଜଣେ ଗରିବ ମହିଳାଙ୍କୁ ଚୁଲିର ଧୁଆଁରେ ଆଉ ହନ୍ତସନ୍ତ ହେବାକୁ ପଡିବ ନାହିଁ ବୋଲି କୁହାଯାଇଥିଲା । ଅନେକ ଭଲ ନାଗରିକ ନିଜ ଇଛାରେ ସବସିଡି ଯୁକ୍ତ ଗ୍ୟାସ ଟାଙ୍କି ସରେଣ୍ଡର ମଧ୍ୟ କରିଥିଲେ । କିନ୍ତୁ ୭ ବର୍ଷ ପରେ ଲାଗୁଛି ଉଜ୍ୱଳା ଫେଲ ମାରିଛି ।
ବିଫଳତାର ଉଦାହରଣ କେନ୍ଦ୍ରର ଉଜ୍ଜ୍ୱଳା ଯୋଜନା
ଆକାଶଛୁଆଁ ଗ୍ୟାସ୍ ଦର ଯୋଗୁଁ ଏବେ ଗରିବ ମହିଳା ଗ୍ୟାସ୍ ଜାଳିବାକୁ ନାପସନ୍ଦ କଲେଣି । ପୁଣି ସେହି ଚୂଲି ଉପରେ ଭରସା କରୁଛନ୍ତି । ଦୁଃସ୍ୱପ୍ନ ପାଲଟିଛି କେନ୍ଦ୍ରର ଅଚ୍ଛେଦିନ୍ ପ୍ରତିଶ୍ରୁତି । ମଧ୍ୟବିତ୍ତଙ୍କ ବଜେଟ୍ ବିଗାଡ଼ିଲାଣି ଗ୍ୟାସ ଦର ବୃଦ୍ଧି । ଗତ ସାଢେ ତିନି ବର୍ଷରେ ରନ୍ଧନ ଗ୍ୟାସର ମୂଲ୍ୟ ୭୦ ପ୍ରତିଶତ ବୃଦ୍ଧି ପାଇଛି । ଯାହାକୁ ନେଇ ସମାଲୋଚନାର ଶିକାର ହେଉଛନ୍ତି କେନ୍ଦ୍ର ସରକାର ।
ତେଜ ହରାଇଲାଣି ଉଜ୍ଜ୍ୱଳା ଯୋଜନା । ଘରେ ପଡ଼ି ପଡ଼ି ଗ୍ୟାସ୍ ଟାଙ୍କିରେ ଲାଗିଲାଣି କଳଙ୍କି । ବର୍ଦ୍ଧିତ ଗ୍ୟାସ୍ ଦର ଦେଖି ପୁଣି ଚୂଲି ଜାଳିଲେଣି ମହିଳା । ଚୁଲି ଧୁଆଁରୁ ମୁକ୍ତି ପାଇଁ ଆରମ୍ଭ ହୋଇଥିବା ଉଜ୍ଜଳା ଯୋଜନା ଆଜି ସଙ୍କଟ ପାଲଟିଗଲାଣି । ଦୁଃସ୍ବପ୍ନ ପାଲଟିଛି କେନ୍ଦ୍ରର ଅଚ୍ଛେଦିନ୍ ପ୍ରତିଶ୍ରୁତି । ମଧ୍ୟବିତ୍ତଙ୍କ ବଜେଟ୍ ବିଗାଡ଼ିଲାଣି ଗ୍ୟାସ ଦର ବୃଦ୍ଧି । ଗତ ସାଢେ ତିନି ବର୍ଷରେ ରନ୍ଧନ ଗ୍ୟାସର ମୂଲ୍ୟ ୭୦ ପ୍ରତିଶତ ବୃଦ୍ଧି ପାଇଛି । ଥରେ ଗ୍ୟାସ ସରିଲେ, ରିଫିଲି ପାଇଁ ମଧ୍ୟବିତ୍ତ ପରିବାରରେ ବଜେଟ୍ ନାହିଁ ।
ଗାଁ ମହିଳାଙ୍କ ଭରସା ଚୁଲି
ଗାଁରେ ଅନେକ ଉଜ୍ୱଳା ସ୍କିମରେ ଗ୍ୟାସ ପାଇଥିଲେ । ଦୁଃଖକଷ୍ଟରେ ସେମାନେ ଗ୍ୟାସ୍ ରିଫିଲିଂ ମଧ୍ୟ କରୁଥିଲେ । କିନ୍ତୁ ଏବେ ଯେଉଁଭଳି ଭାବେ କେନ୍ଦ୍ର ସରକାର ଗ୍ୟାସ ଦର ବଢାଇ ଚାଲିଛନ୍ତି ସେଥିରେ ଗାଁ ଗହଳିରେ ରହୁଥିବା ଉଜ୍ୱଳା ଧାରକଙ୍କ ଅବସ୍ଥା କହିଲେ ନସରେ । କାଠ ଚୁଲିରେ ରୋଷେଇ କରି ଆଖିରୁ ଯେତିକି ଲୁହ ବାହାରୁ ନଥିଲା ସେତିକି ଲୁହ ଗ୍ୟାସ୍ ରିଫିଲିଂ ବେଳେ ବାହାରୁଛି । ତେଣୁ ଅନେକଙ୍କ ଗ୍ୟାସ୍ ଏବେ ଭାଡିକୁ ଉଠିଯାଇଛି । ଗ୍ୟାସ ଚୁଲାର ଯାଗା ନେଇଛି ପୁରୁଣା ଚୁଲି ।
ବାଲେଶ୍ବର ଜିଲ୍ଲା ଅଙ୍ଗାଗଡ଼ିଆ ଗାଁ ବାସିନ୍ଦା ପାର୍ବତୀ ସୋରେନଙ୍କ ଉଦାହରଣ ନିଅନ୍ତୁ । ଛୋଟ ବଡ଼ ହୋଇ 15 ଜଣିଆ ପରିବାର । 2 ବର୍ଷ ପୂର୍ବରୁ ତାଙ୍କୁ ଉଜ୍ଜ୍ବଳା ଯୋଜନାରେ ମାଗଣା ଟାଙ୍କି ଓ ଷ୍ଟୋଭ୍ ମିଳିଥିଲା । ସେତେବେଳେ 650 ଟଙ୍କାରେ ଗ୍ୟାସ୍ ପୂରାଇ 15 ଦିନ ରୋଷେଇ କରୁଥିଲେ । ହେଲେ ଏବେ ହଜାରେ ଟଙ୍କା ଦେଇ ଗ୍ୟାସ୍ ପୂରାଇବାକୁ ସକ୍ଷମ ନୁହଁନ୍ତି । ଦୁଇ ତିନି ମାସ ହେଲାଣି ଗ୍ୟାସ୍ ଟାଙ୍କିକୁ ବସ୍ତାରେ ପୂରାଇ ରଖି ଦେଇଛନ୍ତି । କାଠ ଚୁଲି ହିଁ ଏକ ମାତ୍ର ଭରସା ।
ସୋନପୁରରେ ମଧ୍ୟ ଘରେ ଘରେ ସମାନ ସ୍ଥିତି । କେନ୍ଦ୍ର ସରକାରଙ୍କର ଏହି ମହତ୍ବାକାଂକ୍ଷୀ ଯୋଜନା ଲୋକଙ୍କ କାମରେ ଆସୁନି । କାହାର ଗ୍ୟାସ ଟାଙ୍କି ଖତ ଗଦାରେ ପଡିଥିବା ବେଳେ କାହାର ଘରେ ନାମକୁ ମାତ୍ର ଶୋଭାବର୍ଦ୍ଧନ କରୁଛି ସଲିଣ୍ଡର । କେନ୍ଦ୍ର ସରକାରଙ୍କର ଏହି ଖାଉଟି ମାରଣ ନୀତିକୁ ତିବ୍ର ବିରୋଧ କରିଛନ୍ତି ଉପଭୋକ୍ତା ।
ଯାଜପୁର ଜିଲ୍ଲାରେ ବି ଉଜ୍ଜଲା ଯୋଜନାର ବିଫଳତା କିଛି କମ୍ ନୁହେଁ । ଗ୍ୟାସ୍ ଛାଡି କେବେଠୁ ମହିଳା ମାନେ ଚୁଲିକୁ ଆଦରି ସାରିଲେଣି । ଗ୍ୟାସ୍ ଦର ବୃଦ୍ଧି ଆଉ ମଧ୍ୟବିତ୍ତ ପରିବାରକୁ ସୁହାଉନି ବୋଲି ଗୃହିଣୀ କହିଛନ୍ତି ।
ଗରିବ ମହିଳାଙ୍କ ମୁହଁରେ ଖୁସି ଆଣିବାକୁ ୨୦୧୬ ମେ ପହିଲାରେ ଉଜ୍ଜଳା ଯୋଜନା ଆରମ୍ଭ କରିଥିଲେ କେନ୍ଦ୍ର ସରକାର । ବିଫଳତାର ଲମ୍ବା ତାଲିକାରେ କେନ୍ଦ୍ର ସରକାରଙ୍କ ଆଉ ଏକ ଯୋଜନା ବି ଯୋଡି ହୋଇଯାଇଛି । ଉଜ୍ୱଳା ଗ୍ୟାସ୍ ଜାଳିବାକୁ ହେଲେ ଗରିବଙ୍କୁ କେତେଦିନର ପେଟର ଭୋକ ମାରିବାକୁ ହେବ ତା’ର ହିସାବ ଚାଲିଛି । ଚାଉଳ, ଡାଲିରେ କାଟଛାଣ୍ଟ କଲେ ମଧ୍ୟ ଉଜ୍ୱଳା ଗ୍ୟାସ ଚିଲିକା ମାଛ ଆକାଶ କଇଁଆ ହୋଇଯାଇଛି ।
