ଏବେ ଦାଣ୍ଡରେ ଗଡ଼ି ହାଟରେ ପଡ଼ିଛି ରାଜ୍ୟ ପଦ୍ମ ପାର୍ଟିର ଭିତିରି କନ୍ଦଳ । ଚର୍ଚ୍ଚା ସୃଷ୍ଟି କରିଛି ବିଜେପି ସାଂସଦ ଓ ବିଧାୟକଙ୍କ ମଧ୍ୟରେ କଳି । ସମ୍ବଲପୁର ସାଂସଦ ନୀତେଶ ଗଙ୍ଗଦେବଙ୍କ ବିରୋଧରେ ସଙ୍ଗିନ୍ ବୟାନବାଜି ରଖିଛନ୍ତି ଦେବଗଡ଼ ବିଜେପି ବିଧାୟକ ସୁବାସ ପାଣିଗ୍ରାହୀ । ସ୍ୱାମୀ –ସ୍ତ୍ରୀଙ୍କ ମଧ୍ୟରେ କଳି ଯୋଗୁ ସମ୍ବଲପୁର ସାଂସଦ ନୀତେଶ ଗଙ୍ଗଦେବ ତାଙ୍କ ନିର୍ବାଚନମଣ୍ଡଳୀରେ ନିଜ ଲୋକପ୍ରିୟତା ହରାଇଥିବା ବିଧାୟକ ସୁବାସ ପାଣିଗ୍ରାହୀ କହିଛନ୍ତି । ଏପରିକି ବିଧାୟକ ଅବା ସାଂସଦ ପାଇଁ ଛିଡା ହେବା ଯୋଗ୍ୟତା ଆଉ ଗଙ୍ଗଦେବଙ୍କର ନାହିଁ ବୋଲି ବିଜେପି ବିଧାୟକ କହିଛନ୍ତି । ବିଧାୟକ ପାଣିଗ୍ରାହୀ ଏପରି ବି କହିଛନ୍ତି ଯେ, ନିଜ ସ୍ତ୍ରୀଙ୍କ ଦ୍ୱାରା ଗୃହ ବନ୍ଦୀ ହୋଇ ରହିଛନ୍ତି ସମ୍ବଲପୁର ସାଂସଦ । ଆମ ସାଂସଦ ତାଙ୍କ ଲୋକପ୍ରିୟତା ହରାଇସାରିଲେଣି । ସେ ସାଂସଦରେ ଛିଡା ହେଲେ ହାରିବେ । ବିଧାୟକ ଛିଡା ହେଲେ ବି ହାରିବେ । ସେ ଯଦି ଛିଡା ହୁଅନ୍ତି, ତେବେ ହାରିବା ପକ୍କା ।
ସାଂସଦ ଲୋକମାନଙ୍କ ପାଖକୁ ଆଉ ଗଲେ ନାହିଁ । ଲୋକଙ୍କ କୌଣସି କାମ କଲେ ନାହିଁ । ଲୋକେ ତାଙ୍କୁ ଘୃଣା କରୁଛନ୍ତି । ସ୍ୱାମୀ- ସ୍ତ୍ରୀ ଭିତରେ ଲଢ଼େର ଯୋଗୁ ନିଜ ଲୋକପ୍ରିୟତା ବି ହରାଇଛନ୍ତି ସାଂସଦ । ତେଣୁ ସେ ଆଗାମୀ ନିର୍ବାଚନରେ ଛିଡା ନ ହେବା ଭଲ ବୋଲି କହିଛନ୍ତି ବିଜେପି ବିଧାୟକ ସୁବାସ ପାଣିଗ୍ରାହୀ । ରାଜ୍ୟ ବିଜେପି, ଖାସ୍ କରି ସମ୍ବଲପୁରର ଦୁଇ ଦଳୀୟ ବିଧାୟକ ଓ ସାଂସଦଙ୍କ ମଧ୍ୟରେ ଉତ୍କଟ ହୋଇଥିବା କନ୍ଦଳ ଯୋଗୁ ଏବେ ଜିଲ୍ଲାରେ ପଦ୍ମଗାଡ଼ିଆ ଅପଦସ୍ଥ ହେବା ସ୍ଥିତିକୁ ଆସିଛି । ଆଗାମୀ ଦିନରେ ଏହାର ପ୍ରଭାବ ଦଳୀୟ ଭୋଟ୍ ରାଜନୀତି ଉପରେ ପଡ଼ିବ ବୋଲି ଆଶଙ୍କା କରାଯାଉଛି । ସେପଟେ ନୀତିଶ ଗଙ୍ଗଦେବଙ୍କୁ ଆଉ ସମ୍ବଲପୁରରୁ ବିଜେପି ସାଂସଦ ପ୍ରାର୍ଥୀ କରିବାର ସମ୍ଭାବନା ଆଦୌ ନାହିଁ କହିଲେ ଚଳେ । କାରଣ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସମ୍ବଲପୁର ଲୋକସଭା ଆସନରୁ ଆସନ୍ତା ନିର୍ବାଚନରେ ସାଂସଦ ପ୍ରାର୍ଥୀ ହେବେ ବୋଲି ଦଳୀୟ ମହଲରେ ଏକପ୍ରକାର ସ୍ଥିର ହୋଇଥିବା କୁହାଯାଉଛି । ତେଣୁ ଧର୍ମେନ୍ଦ୍ରଙ୍କ ସମ୍ଭାବ୍ୟ ପ୍ରାର୍ôଥତ୍ୱକୁ ଦୃଷ୍ଟିରେ ରଖି ମୁକୁ ଭାଇ କ୍ୟାମ୍ପର ପ୍ରୋତ୍ସାହନରେ ବିଧାୟକ ସୁବାସ ପାଣଗ୍ରାହୀ ଏବର ସାଂସଦ ନୀତେଶ ଗଙ୍ଗଦେବଙ୍କୁ ଶବ୍ଦବାଣରେ ଆକ୍ରମଣ କରିଥିବା ପଲିଟିକାଲ୍ କରିଡରରେ ଚର୍ଚ୍ଚା ହେଉଛି ।
