ୟୁକ୍ରେନ୍ ଉପରେ ଯେଉଁଭଳି ଭାବେ ଋଷ ଆକ୍ରମଣ କରିଛି ତାକୁ ନେଇ ଭାରତରେ ଦୁଇପ୍ରକାର ମତ ଦେଖିବାକୁ ମିଳିଛି । ସୋସିଆଲ ମିଡିଆରେ ଗୋଟିଏ ଗୋଷ୍ଠୀ ଏଥିପାଇଁ ଋଷକୁ ନିନ୍ଦା କରୁଥିବା ବେଳେ ଆଉ ଗୋଟିଏ ଗୋଷ୍ଠୀ କହୁଛନ୍ତି ଯେ, ଋଷର ଏହି ଆକ୍ରମଣ ଭାରତକୁ ପାକ୍ ଅଧିକୃତ କାଶ୍ମୀର ଅଧିକାର କରିବାର ମୌକା ଦେଇଛି । ସେମାନଙ୍କ କହିବା ହେଉଛି ଯେମିତି ଋଷ ଏହାକୁ ଆକ୍ରମଣ କିମ୍ବା ଯୁଦ୍ଧ ବୋଲି ନକହି ସେନା କାର୍ଯ୍ୟାନୁଷ୍ଠାନ ବୋଲି କହୁଛି ସେମିତି ଭାରତ ମଧ୍ୟ କରୁ । କାରଣ ପାକ୍ ଅଧିକୃତ କାଶ୍ମୀର ଭାରତର । ତେବେ ଏହା ଏତେ ସହଜ ନୁହେଁ । ଭାରତ ଚାହିଁଲେ ପାକ୍ ଅଧିକୃତ କାଶ୍ମୀରରେ ସାମରିକ କାର୍ଯ୍ୟାନୁଷ୍ଠାନ କରିପାରିବ କିନ୍ତୁ ଏଥିରେ କିଛିଟା ପେଞ୍ଚ ରହିଛି । ଆସନ୍ତୁ ଜାଣିବା ସେଗୁଡିକ ସବୁ କ’ଣ ?
ଭାରତ ଋଷ ନୁହେଁ
ପ୍ରଥମ କଥା ହେଉଛି ଭାରତ ଋଷ ନୁହେଁ । ଆମେ ଯେତେ ଶକ୍ତିଶାଳୀ ହେଲେ ମଧ୍ୟ ଋଷ ଭଳି ଶକ୍ତିଶାଳୀ ନୁହେଁ । ଏହା ହେଉଛି ସବୁଠାରୁ ବଡ଼ ପେଂଚ । ଆଉ ପାକିସ୍ତାନ ଉପରେ ଆକ୍ରମଣ ସମୟରେ ଚୀନ ପରିବର୍ତ୍ତିତ ବିଶ୍ୱ ବ୍ୟବସ୍ଥାରେ ନିଶ୍ଚୟ ଇସଲାମାବାଦକୁ ସମର୍ଥନ କରିବ ।
ପାକିସ୍ତାନ ୟୁକ୍ରେନ୍ ନୁହେଁ
ଋଷର ସାମରିକ ଶକ୍ତି ସମ୍ମୁଖରେ ୟୁକ୍ରେନ୍ କିଛି ମଧ୍ୟ ନୁହେଁ । ପାରମ୍ପାରିକ ଯୁଦ୍ଧରେ ପାକିସ୍ତାନ ଭାରତୀୟ ସେନା ସମ୍ମୁଖରେ ତିଷ୍ଟି ପାରିବ ନାହିଁ । କିନ୍ତୁ ସମସ୍ୟା ହେଉଛି ଯେ, ଏହା ପାକିସ୍ତାନ ମଧ୍ୟ ଜାଣିଛି । ତେଣୁ ପାକିସ୍ତାନ ନିଜକୁ ଆଣବିକ ଅସ୍ତ୍ରରେ ସଜିତ କରିଛି । ଆଉ ପାକିସ୍ତାନ ତ’ ଖୁଲମଖୁଲା କହୁଛି ଏହାର ପରମାଣୁ ଅସ୍ତ୍ର ଭାରତ ବିରୋଧରେ ଉଦ୍ଧିଷ୍ଟ । ଏହା ସହିତ ଭାରତ ମଧ୍ୟ ‘ପ୍ରଥମେ ବ୍ୟବହାର ନକରିବା’ ନୀତିକୁ ଆପଣାଇଛି । କିନ୍ତୁ ପାକିସ୍ତାନ ପରମାଣୁ ଅସ୍ତ୍ରକୁ ନେଇ ସେଭଳି କିଛି ନୀତି ରଖିନାହିଁ । ଏହା ନିଜ ଇଛାରେ ଯୁଦ୍ଧ ଆରମ୍ଭରୁ ମଧ୍ୟ ପରମାଣୁ ଅସ୍ତ୍ର ପ୍ରୟୋଗ କରିପାରେ । ଏହିଠାରେ ହିଁ ସମୀକରଣ ବଦଳି ଯାଉଛି । ଭାରତକୁ ଏକ ପରମାଣୁ ଯୁଦ୍ଧ ପାଇଁ ପ୍ରସ୍ତୁତ ହୋଇ ଆକ୍ରାମକ ହେବାକୁ ପଡିବ ।
ପାକିସ୍ତାନକୁ ସମର୍ଥନ କରିବ ଚୀନ
ୟୁକ୍ରେନ୍ ନାଟୋ ଓ ଆମେରିକା ସମର୍ଥନ ଆଶା କରୁଥିଲା । ଭାବୁଥିଲା ୟୁରୋପ ତାକୁ ଋଷ ଦାଦାଗିରିର ମୁକାବିଲା ପାଇଁ ସାହାଯ୍ୟ କରିବ । କିନ୍ତୁ ଠିକ ସମୟରେ ନାଟୋ, ଆମେରିକା ଓ ୟୁରୋପର ବାକି ଦେଶ ୟୁକ୍ରେନକୁ ଏକୁଟିଆ ଛାଡି ଦେଇଛନ୍ତି । କିନ୍ତୁ ପାକିସ୍ତାନ ସହିତ ଭାରତର ଯୁଦ୍ଧ ବେଳେ ଅନେକ ସମ୍ଭାବନା ରହିଛି ଯେ, ଚୀନ୍ ନିଜ ସବୁ ପାଗର ବନ୍ଧୁ ସହିତ ଛିଡା ହେବ । ଆହୁରି ମଧ୍ୟ ଚୀନ୍ ଓ ଋଷ ମଧ୍ୟରେ ଯେଉଁ ନୂଆନୂଆ ପ୍ରେମ ସୃଷ୍ଟି ହୋଇଛି ତାହା ଋଷକୁ ଅତିକମରେ ନିରବ ରହିବାକୁ ବାଧ୍ୟ କରିପାରେ । ଋଷ ୧୯୭୧ ଭଳି ଖୋଲାଖୋଲି ଭାରତର ସମର୍ଥନ କରି ନପାରେ । କିମ୍ବା ଆମେରିକା ଭାରତ ଦୋସ୍ତିରେ ଅସନ୍ତୁଷ୍ଟ ଋଷ ପଟ ପରିବର୍ତ୍ତନ କରି ପାକିସ୍ତାନକୁ ସମର୍ଥନ କରିପାରେ । କାରଣ ଜିଓ ପଲିଟିକ୍ସରେ ସବୁକିଛି ସମ୍ଭବ । ଯେଉଁ ଆମେରିକା୧୯୭୧ରେ ପାକିସ୍ତାନ ସମର୍ଥନରେ ତା’ର ସପ୍ତମ ନୌଭେଳା ପ୍ରେରଣ କରିଥିଲା ଏବେ ସେହି ଆମେରିକା ଓ ପାକିସ୍ତାନ ମଧ୍ୟରେ ସମ୍ପର୍କ ଭଲ ନାହିଁ । ଏମିତିରେ କିଛି ବି ହୋଇପାରେ ।
