ନୂଆଦିଲ୍ଲୀ: ୯୩ ବର୍ଷ ବୟସରେ ବୃଦ୍ଧଙ୍କୁ ମିଳିଲା ମତଦାନର ଅଧିକାର । ଛତିଶଗଡ କାଙ୍କେର ଜିଲ୍ଲା ଅନ୍ତର୍ଗତ ଭାନୁପ୍ରତାପପୁର ବିଧାନସଭା କ୍ଷେତ୍ରରୁ ଏଭଳି ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି । ଗତକାଲି ଛତିଶଗଡ ବିଧାନସଭା ନିର୍ବାଚନରେ ପ୍ରଥମ ପର୍ଯ୍ୟାୟରେ ୨୦ଟି ସିଟ ପାଇଁ ମତଦାନ ହୋଇଛିି । ଏଭଳି ସମୟରେ କାଙ୍କେର ଜିଲ୍ଲାର ଭୋସାକହ୍ନାରରେ ବସବାସ କରୁଥିବା ଶେରସିଂ ହିଡକୋ ୯୩ ବର୍ଷ ବୟସରେ ପ୍ରଥମଥର ପାଇଁ ଭୋଟ ଦେଇଛନ୍ତି ।
ଥରଟେ ବି ଦେଇ ନ ଥିଲେ ଭୋଟ
୧୮ବର୍ଷ ପୂରିଗଲେ ସମସ୍ତଙ୍କୁ ଭୋଟ ଦେବାର ଅଧିକାର ମିଳିଥାଏ । କିନ୍ତୁ ଶେରସିଂଙ୍କୁ ୯୩ ବର୍ଷ ବୟସ ହୋଇଥିଲେ ମଧ୍ୟ ଭୋଟ ଦେବାରୁ ବଞ୍ôଚତ ହୋଇଛନ୍ତି । ଏପର୍ଯ୍ୟନ୍ତ ତାଙ୍କୁ ଭୋଟ ପରିଚୟପତ୍ର ମିଳି ନ ଥିଲା । ଏହି କାରଣରୁ ତାଙ୍କର ଭୋଟ ଦେବାର ଅଧିକାର ନ ଥିଲା । ଭୋଟର ପରିଚୟପତ୍ର ପାଇଁ ବାରମ୍ବାର ଆବେଦନ କରିଥିଲେ ମଧ୍ୟ ମିଳି ନ ଥିଲା । ଏତେ ବର୍ଷ ବିତି ଯାଇଥିଲେ ହେଁ ଶେରସିଂ ଥରଟେ ହେଲେ ବି ଭୋଟ ଦେଇପାରି ନ ଥିଲେ । ଚଳିତ ବର୍ଷ ଯାଞ୍ଚ ସମୟରେ ଶେରସିଂ ହିଡକୋଙ୍କ ନାମ ମତଦାତା ସୂଚୀରେ ରହିଥିବା ଜାଣିବାକୁ ମିଳିଥିଲା । ଏହାପରେ ତୁରନ୍ତ ଶେରସିଂ ହିଡକୋଙ୍କ ଭୋଟ ଦେବାରେ ହେଉଥିବା ତ୍ରୁଟିର ସମାଧାନ କରାଯାଇଥିଲା । ବିଭାଗୀୟ ଅଧିକାରୀମାନେ ଶେରସିଂ ହିଡକୋଙ୍କ ନାମ ମତଦାତା ସୂଚୀରେ ଯୋଡି ତାଙ୍କର ଭୋଟର ପରିଚୟପତ୍ର ପ୍ରସ୍ତୁତ କରିଥିଲେ । ଶେଷରେ ୯୩ବର୍ଷ ବୟସରେ ଭୋଟ ଦେବାର ଅଧିକାର ପାଇଥିଲେ ଶେରସିଂ । ଭୋଟର ଆଇକାର୍ଡ ପ୍ରସ୍ତୁତ ହେବା ପରେ ଆଜି ପ୍ରଥମଥର ପାଇଁ ନିଜର ମତଦାନ କରି ବୃଦ୍ଧ କହିଛନ୍ତି, ‘ଯାହା ହେଉ ଜୀବନ କାଳ ଭିତରେ ଭୋଟ ଦେବାର ଅଧିକାର ପାଇଲି ।’
